Andrea Ryhoni — novy specdakładčyk PARE pa Biełarusi

Siońnia ŭ Paryžy na pasiadžeńni palityčnaha kamitetu Parlamenckaj asamblei Rady Eŭropy pryznačyli specyjalnaha dakładčyka ŭ spravie Biełarusi. Im staŭ italjanski parlamentar Andrea Ryhoni.

Staršynia padkamitetu pa Biełarusi, jaki dziejničaje ŭ ramkach palitkamitetu, estonski deputat Andreas Cherkiel patłumačyŭ, što apošnim specdakładčykam, jaki padaŭ dakład na razhlad Parlamenckaj asamblei Rady Eŭropy, byŭ Chrystas Purhurydes. Nahadaju, hety dakład byŭ pryśviečany palityčnym źniknieńniam u Biełarusi.

Ale potym dva dakładčyki nia mieli mahčymaści zaviaršyć svaju pracu. Da prykładu, azerbajdžanski deputat Azim Małazade paśla vybaraŭ nie ŭvajšoŭ u skład azerbajdžanskaj delehacyi ŭ PARE. Častkova hetuju pracu vykonvaŭ sam spadar Cherkiel, kali patrebna było terminova padrychtavać dakład u źviazku z prezydenckimi vybarami ŭ Biełarusi.

Adnak pavodle praktyki, staršynia padkamitetu nia moža być adnačasova j specdakładčykam. Spadar Cherkiel spadziajecca na supracoŭnictva z novym specdakładčykam pa Biełarusi — spadarom Andrea Ryhoni.

Spadar Cherkiel patłumačyŭ, čamu nieabchodny dakładčyk pa Biełarusi.

Chierkiel: «Bo pytańni, źviazanyja ź Biełaruśsiu, tyčacca nia tolki vybaraŭ. A heta tyčycca ŭsiaho spektru padziejaŭ, jakija adbyvajucca ŭ hetaj dziaržavie. Dakład u spravie Biełarusi nieabchodna ŭ najbližejšaj budučyni padać u Parlamenckuju asambleju. I spadziajusia, što specyjalny dakład budzie jašče ŭ 2007 hodzie».

Pavodle spadara Cherkiela, sytuacyja ŭ Biełarusi pakul nie pamianiałasia da lepšaha.

Cherkiel: «My vielmi ŭvažliva sočym za tym, što adbyvajecca. Z hledzišča demakratyčnaha raźvićcia, na žal, pazytyŭnych zruchaŭ nie było. Kaniečnie, byŭ vizyt prezydenta Parlamenckaj asamblei, ale pakul niemahčyma zrabić niejkich vysnovaŭ pra toje, jaki heta mieła ŭpłyŭ».

Spadar Cherkiel nazvaŭ vielmi razumnymi patrabavańni eŭrapiejcaŭ, jakija musiać vykanać biełaruskija ŭłady.

Cherkiel: «I pytańni pra palitźniavolenych, niaŭradavyja arhanizacyi j svabodu słova — hetyja patrabavańni zastajucca asnoŭnymi. Kab Biełaruś viarnuła sabie status specyjalna zaprošanaj u Parlamenckaj asamblei Rady Eŭropy, treba mieć pazytyŭnyja zruchi. Pry ciapierašniaj sytuacyi, ja nie baču, što niešta pamianiałasia».

Rasiejski deputat Kanstancin Kasačoŭ zajaviŭ, što «dakładčyk pavinien być abjektyŭny j biesstarońni».

Kasačoŭ: «Uvohule, linija, jakuju viadzie Eŭraźviaz na tatalnuju izalacyju Biełarusi, — kontarpraduktyŭnaja, bo spryjaje tolki kanservacyi tych prablemaŭ, jakija isnujuć unutry Biełarusi j jakija my ŭ Rasiei taksama bačym i pryznajem. Ale, kali my chočam dapamahać i kiraŭnictvu, i narodu Biełarusi, to rabić heta treba praz dyjaloh, a nie praź izalacyju. U hetym sensie pazycyja kiraŭnictva PARE i asabista van der Lindena, jaki niadaŭna naviedaŭ Miensk, ujaŭlajecca nam značna bolš mudraj i perspektyŭnaj».

• 0
• 0
• 0
• 0
• 0
• 0
• 0
• 0