Litva addaść Biełarusi Kłajpiedu

Siońnia ŭ Miensku prajšła pres‑kanferencyja nadzvyčajnaha i paŭnamocnaha pasła Litvy ŭ Biełarusi Edminasa Bahdonasa. Učora sp.Bahdonas uručaŭ davierčyja hramaty Alaksandru Łukašenku. Pasoł zaznačyŭ, što jon skazaŭ Łukašenku, što pryjechaŭ u Biełaruś z cełym šeraham roznych prajektaŭ. Prezydent zajaviŭ ambasadaru, kab pry patrebie toj zvaniŭ u luby čas. Spadar Bahdonas, praŭda, nie navažyŭsia paprasić numar mabilnaha telefonu Łukašenki.

Litoŭski pasoł šmat žartavaŭ, raskazvaŭ pra asabistaje žyćcio. Jon pierajechaŭ u Miensk razam z žonkaj i 8-hadovym synam (jość jašče 19-hadovaja dačka). Žonka z Kijeva, z hetaj nahody pasoł pažartavaŭ, što praciahvaje tradycyi vialikich kniazioŭ Vitaŭta i Alhierda, ažaniŭšysia sa słaviankaj.

Sp. Bahdonas adznačyŭ, što litoŭskija pradprymalniki i biznesoŭcy zacikaŭlenyja ŭ investavańni ŭ biełaruskuju ekanomiku. «My chočam być pieršymi tut u Biełarusi ŭ hetaj sfery». Ale Litva hatova ŭkładvać u Biełaruś hrošy tolki ŭ tym vypadku, kali atrymaje harantyi ad aficyjnaha Miensku.

Słova «pieršaja» ŭ dačynieńni da Biełarusi z vusnaŭ pasła hučali siońnia nie adzin raz. Taksama jon kazaŭ pra toje, što Litva chacieła b pieršaj pačuć ad biełaruskaha boku kankretnych prapanovaŭ u spravie narmalizacyi adnosinaŭ z Eŭropaj. «U takim vypadku Litva hatovaja stać advakatam Biełarusi ŭ Bruseli». Bahdonas havaryŭ, što nierazumna admaŭlacca ad prapanovaŭ Eŭrakamisii. Za hrošy, jakija Biełaruś vyjhraje ad hetaha, na dumku pasła, možna było b restaŭravać staruju Horadniu ci što‑niebudź jašče. «Našto heta rabić za biełaruskija hrošy, kali možna za eŭrapiejskija?» — pytaŭsia dyplamat.

Taksama Edminas Bahdonas paviedamiŭ, što ŭ Litvie zaraz aktyŭna idzie abmierkavańnie prapanovaŭ prezydenta Adamkusa, jakija jon vykazaŭ u Vašynhtonie, adnosna taho, što Litva hatovaja pradstavić Biełarusi svaje naftavyja terminały ŭ Kłajpiedzie. Nia vyklučana, što bližejšym časam litoŭski bok aficyjna vyjdzie z hetaj prapanovaj na Miensk. U hetym vypadku havorka nia idzie pra pabudovy trubaŭ, a pra tranzyt nafty čyhunačnym šlacham.

U Litvie zaraz prachodzić abmierkavańnie pabudovy razam z Łatvijaj, Estonijaj i Polščaj atamnaj stancyi. Spadar pasoł skazaŭ, što kali Biełaruś razam z hetymi krainami budzie zamaŭlać u francuzaŭ pabudovu enerhablokaŭ, to krainy mohuć atrymać istotnyja źnižki. «My paprosim u francuzaŭ 50% źnižak, stolki, kaniečnie, nie daduć, ale 30% dać musiać. Heta budzie vyhadna ŭsim».

Spadar pasoł vykazaŭ upeŭnienaść, što za čas jahonaj dyplamatyčnaj słužby ŭ Miensk istotna pavysicca tavarazvarot miž našymi krainami. Za apošni hod tavarazvarot skłaŭ tolki $600 młn. Taksama jon vykazaŭ nierazumieńnie, čamu pry litoŭskim pasolstvie akredytavana 150 biełaruskich turystyčnych firmaŭ, bo jon nia bačyć takoha patoku turystaŭ ź Biełarusi. Bližejšym časam pasolstva maje pravieści pravierku ŭsich hetych firmaŭ. Nijakich źmienaŭ u atrymańni litoŭskich vizaŭ nie čakajecca. Štohod pasolstva vydaje zvyš sta tysiač vizaŭ biełaruskim hramadzianam.

Spadar Bahdonas uvieś čas padkreślivaŭ, što my majem supolnuju historyju i vykazaŭ zachapleńnie vydańniem encyklapedyi VKŁ pa‑biełarusku. Jon adznačyŭ, što ŭ Litvie niama takoj knižki. Karespandentu «NN» Edminas Bahdonas paabiacaŭ praz paŭhodu dać interviju na dobraj biełaruskaj movie.

• 0
• 0
• 0
• 0
• 0
• 0
• 0
• 0