Aleś Michalevič byŭ samym pamiarkoŭnym kandydatam u prezidenty ad apazicyi na vybarach 2010 hoda. Adnak paśla padziejaŭ 19 śniežnia jon apynuŭsia ŭ SIZA KDB, adkul byŭ vypuščany ŭ lutym pad padpisku pra niavyjezd. U vyniku Aleś Michalevič zdoleŭ vyjechać za miažu.
Siarod inšaha, Michalevič viadomy vialikaj niepryjaźniu da rasiejskaha šansona. A da čaho ž jon pryjazny? Śpiecyjalna dla «NN» spadar Aleś raspavioŭ pra svaju lubimuju muzyku.
— Źmicier Bartosik. «Na ruinach Vialikaha Kniastva». Bartosik adekvatna aceńvaje biełaruskuju rečaisnaść, ale jaho pieśni mianie natchniajuć, matyvujuć da pracy i dapamahajuć pavieryć u toje, što vielmi chutka my budziem žyć u Biełaruskaj Biełarusi. «Na radzimu viartajucca kniazi», i dziakuj za heta Bartosiku.
Krama. Homielski vals. Kali byŭ školnikam, pačaŭ słuchać «Bondu», «Ulis» i «Mroju». Ciažka vyłučyć ź ich adzin hurt, najbolš lubimy. Ale pieśniu «Kramy» «Homielski vals» (a «Krama» dla mianie źjaŭlajecca praciaham «Bondy») słuchaju najčaściej. Dziakuj Varaškieviču!
DDT. «Mietiel» («Ihraj, kak možieš, syhraj…») Ja ros na pieśniach Juryja Šaŭčuka. Dla kožnaha etapa ŭ žyćci byli svaje pieśni, ale vybarčuju kampaniju 2010 hoda dapamahała vytrymać pieśnia «Mietiel». Asabista ŭdziačny adnamu z achoŭnikaŭ «Amierykanki» za toje, što staviŭ padčas prahułak akustyčny albom Šaŭčuka. A jašče pamiataju, jak Jury Šaŭčuk bolš za 20 hadoŭ tamu na kancercie va Uruččy prychinuŭ da hrudzi
Queen, «Don't stop me now». Chacia Doors, Beatles, Pink Ployd, Led Zeppelin dy inšyja rokavyja hurty, na jakich ja vyras, siońnia pryjemna pačuć, ale sam ich pieśni praktyčna nie staŭlu. Zatoje ŭsio čaściej słuchaju Queen. «Don't stop me now» i ŭ vyniku «We are the champions».
Źmicier Vajciuškievič. «Dzie moj kraj». Pieśnia ź niavydadzienaha alboma «Skrypka Dryhvy» na vieršy Uładzimira Karatkieviča, jakaja ŭražvaje jak vierš, ale prosta zapadaje ŭ dušu ŭ muzyčnym vykanańni Vajciuškieviča. I chacia albom «Skrypka dryhvy» tak i nie byŭ vydadzieny, chaču padziakavać aŭtaru idei alboma Alesiu Sušu, bo vieršy Karatkieviča pajšli ŭ masy.
