Byłomu lideru «Maładoha frontu» Paŭłu Sieviaryncu, jaki adbyvaje «chimiju» ŭ Połackim rajonie na lesanarychtoŭkach, admovili ŭva ŭmoŭna‑daterminovym vyzvaleńni. Aktyvist nazyvaje takoje rašeńnie «całkam palityčnym».
«Pavał Sieviaryniec nia varty ŭmoŭna‑daterminovaha vyzvaleńnia, pakolki nie pakajaŭsia ŭ złačynstvie». Hetak vyrašyła kamisija Navapołackaj speckamendatury, jakaja 20 lutaha razhledzieła spravu asudžanaha da abmiežavańnia voli Paŭła Sieviarynca.
Nahadajem, z dvuch hadoŭ «chimii» Sieviaryniec adbyŭ paŭtara, jon nia mieŭ spahnańniaŭ za parušeńni dyscypliny j pavodle zakonu moh raźličvać na ŭmoŭna‑daterminovaje vyzvaleńnie. Ale kamisija vyrašyła, što Pavał Sieviaryniec nia staŭ na šlach vypraŭleńnia.
«Mianie vyklikali na kamisiju i prapanavali pakajacca, ale ja admoviŭsia», — raspavioŭ Pavał Sieviaryniec užo darohaj u viosku Małoje Sitna, dzie jamu daviadziecca adbyć jašče šeść miesiacaŭ.
Pavał Sieviaryniec skazaŭ, što ŭ razmovach ź milicyjantami pastaviŭ im svaje ŭmovy.
Sieviaryniec: «Na što ja adkazaŭ, što hetaje pytańnie — ci raskajvajeciesia vy ŭ złačynstvie? — my zadadzim kožnamu supracoŭniku milicyi, jaki parušaŭ zakon u čas dyktatury».
Pytańnie pra ŭmoŭna‑daterminovaje vyzvaleńnie Paŭła Sieviarynca raźladałasia ŭ čas, kali dziejničajuć prapanovy Eŭraźviazu da biełaruskaha režymu ab naładžvańni dyjalohu — Eŭropa hatovaja iści nasustrač paśla vyzvaleńnia palitviaźniaŭ dy inšych krokaŭ dziela demakratyzacyi. Miž tym sam Pavał Sieviaryniec kaža, što nikoli nie čakaŭ ad biełaruskaha režymu realnych krokaŭ nasustrač patrabavańniam abjadnanaj Eŭropy.
Sieviaryniec: «Režym Łukašenki moža stać biełaruskim, tolki kali pakajecca ŭ antybiełaruskich dziejańniach i zrobić peŭnyja dziejańni. Heta pieradača ŭłady demakratam, vypraŭleńnie sytuacyi ź biełaruskaj movaj, vyśviatleńnie praŭdy pra źnikłych. Tolki paśla takoha pakajańnia mahčymyja razmovy z hetym režymam, u tym liku i z boku Eŭropy».
Pavodle Paŭła Sieviarynca, razam ź im na «chimii» adbyvajuć pakarańnie bolej za dźvieście čałaviek. Heta pieravažna asudžanyja za niavypłatu alimentaŭ, chulihanstva, kradziažy. Kožnyja try miesiacy skład «chimikaŭ» abnaŭlajecca amal na pałovu, u tym liku i praz umoŭna‑daterminovaje vyzvaleńnie, kaža Pavał Sieviaryniec. Pavodle jaho, «admova jamu ŭva ŭmoŭna‑daterminovym vyzvaleńni całkam palityčnaja».
U vioscy Małoje Sitna Pavał Sieviaryniec pracuje stropalščykam na lesanarychtoŭcy. Jon raspavioŭ, što ŭ niekatoryja dni davodziłasia pracavać u vielmi mocny maroz.
Sieviaryniec: «Minus 32 hradusy było ŭ pačatku lutaha. I ciapier, kali pracujem u druhuju źmienu da dvanaccataj nočy, byvaje składana. Ale, miarkuju, Daškievič i Kazulin pramianiali b hetyja marazy na svaju turmu ź vialikim zadavalnieńniem. Im ciapier značna ciažej».
U volny ad pracy čas Pavał Sieviaryniec planuje pisać artykuły na palityčnyja temy, a taksama praciahvać pracu nad ramanam pra biełaruskaje žyćcio.
U biełaruskich turmach i na «chimii» zastajucca prynamsi šeść źniavolenych, jakich u Biełarusi j śviecie ličać palitviaźniami. Heta Alaksandar Kazulin, Źmicier Daškievič, Mikałaj Statkievič, Artur Fińkievič, Kaciaryna Sadoŭskaja, Pavał Sieviaryniec. Naziralniki nie vyklučajuć, što jany vyjduć na volu paśla amnistyi, jakuju rychtujuć biełaruskija ŭłady. Za apošnija try miesiacy na volu vyjšli palityčnyja aktyvisty Cimafiej Drančuk, Ivan Kruk, Andrej Klimaŭ, Mikałaj Astrejka.
