U Niamieččynie vyjšła kniha Alaksandra Fiaduty «Amierikanskije stichi».
Jaje skłali vieršy na rasijskaj movie i zaciemki, jakija były palitviazień pisaŭ u śledčym izalatary turmy KDB, ci inačaj — «amierykanki».
Adsiul i nazoŭ knihi.
«Što vyratoŭvaje ŭ turmie? Naprykład, vieršatvorstva "... vusnaŭ šept adniać vy nie mahli". Marmytać i ryfmavać pačynajuć ledź nie ŭsie, chto nikoli nie rabiŭ hetaha na voli. A ŭžo fiłołahu — i sam Boh nakazaŭ« — napisała ŭ pradmovie da vydańnia znanaja rasijskaja paetka i pravaabaronca Natalla Harbanieŭskaja, jakoj daviałosia vysnavać hetuju iścinu ŭ savieckich łahierach.
Kožny vierš, a ich u knihie paŭtara dziasiatka, supravadžajecca prazaičnymi zaciemkami pra abstaviny jaho ŭźniknieńnia.
Ci to heta sproba pasłać vinšavańnie z Dniom zakachanych žoncy Marynie, ci zavočnaje raźvitalnaje słova z kalehaj pa kampanii «Havary praŭdu» Śviatłanaj Navumavaj, ci turemnaja aluzija na bitłaŭski šlahier «Žoŭtaja padvodnaja łodka», ci refleksija na temu vočnaj staŭki z paetam i kandydatam u prezidenty Uładzimiram Niaklajevym — usio prasiaknutaje tonkim liryzmam i nieprychavanaj ščyraściu. A jašče — samaironijaj i lohkim humaram, bieź jakich u turmie — prosty šlach da varjactva.
Samaironija nie pakinuła aŭtara i pry rašeńni vydać napisanaje ŭ turmie. Anatacyju da knihi jon skančvaje słovami: «...vieršy nie nadta atrymalisia, za što ja i prašu daravańnia ŭ čytačoŭ».
