U redakcyju «Našaj Nivy» źviarnuŭsia Chačatur Chačaturan ź Viciebska, jaki razam z hrupaj žycharoŭ abłasnoha centra dabivajecca pakarańnia dla śledčych, što siłaj zmušali padletkaŭ ahavaryć siabie.
U listapadzie 2011 hoda jany źviarnulisia z šeraham pytańniaŭ da hienieralnaha prakurora Alaksandra Kaniuka. Adnak adkaz pryjšoŭ ad jaho namieśnika Alaksieja Stuka.
U pryvatnaści, jon adznačaje: «Adnačasova paviedamlaju Vam, što za parušeńni kryminalna-pracesualnaha zakanadaŭstva, dapuščanyja pry rasśledavańni i ažyćciaŭleńni prakurorskaha nahladu za im pa kryminalnaj spravie pa fakcie zabojstva Sidarava D.A. šerah prakurorskich rabotnikaŭ pryciahnuty da dyscyplinarnaj adkaznaści, pryniatyja da ich miery ŭździejańnia adpaviadajuć ciažaru ździejśnienych pravin, padstaŭ dla pryciahnieńnia ich da bolš strohaj adkaznaści niama».
Baćkoŭ padletkaŭ i tych, chto padpisaŭsia ŭ ich abaronu, taki adkaz aburaje.
Chačatur Chačaturan paraŭnoŭvaje spravu svajho syna Alaksandra Łohinava sa spravaj masavaha zabojcy Michasieviča. Śledčy nakiravaŭ jaho syna biez supravadžalnych dakumientaŭ na abśledavańnie ŭ psichijatryčnuju lakarniu «Navinki», dzie toj pravioŭ bolš za miesiac. Tam ža u svoj čas pabyvaŭ niezakonna asudžany pa spravie Michasieviča Aleh Adamaŭ.
Naprykancy lista Ch.Chačaturan adznačaje, što śledčyja pa spravie padletkaŭ pajšli na padvyšeńnie.
