U Baranavičach miascovyja ŭłady zabaranili pikiet suprać źbiadnieńnia nasielnictva.
Jak paviedamiŭ staršynia Baranavickaj haradskoj arhanizacyi Biełaruskaj partyi levych «Spraviadlivy śviet» Viktar Ciapin, zajaŭku na pikietavańnie suprać rezkaha źnižeńnia ŭzroŭniu žyćcia ludziej, pavyšeńnia cen na tavary i pasłuhi padavaŭ partyjny aktyvist Eduard Karapietaŭ.
Hadzinnaja akcyja z kolkaściu ŭdzielnikaŭ 10 čałaviek płanavałasia na 18 lutaha ŭ starym parku kultury i adpačynku na vulicy Kamsamolskaj. Heta placoŭka vydzielena Baranavickim harvykankamam dla masavych mierapryjemstvaŭ.
Pavodle słoŭ Ciapina, pakolki piśmovaha adkazu na zajaŭku nie było, Karapietaŭ patelefanavaŭ u Baranavicki harvykankam. Tam paviedamili:
pikiet zabaronieny na padstavie taho, što zajaŭnik akcyi nie zaklučyŭ dahavory z orhanami ŭnutranych spraŭ, ustanovaj achovy zdaroŭja i kamunalnym pradpryjemstvam.
«Ja liču, što sapraŭdnaja pryčyna admovy — zacisnuć usie pratestavyja vystupleńni. Pra zaklučeńnie dahavoraŭ mahu skazać adno: pasłuhi hetych dziaržstruktur my ŭžo apłacili padatkami», — zajaviŭ Ciapin.
Jon adznačyŭ, što sioleta heta ŭžo druhi zabaronieny miascovaj uładaj pikiet suprać źbiadnieńnia nasielnictva. Pieršy aktyvisty partyi namiačali na 28 studzienia. U praviadzieńni akcyi było admoŭlena
«I letaś baranavickim aktyvistam demsił zabaranili ŭsie zajaŭlenyja imi akcyi. I kali situacyja nie źmienicca, možna budzie havaryć, što ŭ našym rehijonie prava na praviadzieńnie masavych mierapryjemstvaŭ likvidavana», — reziumavaŭ Ciapin.
