Ahient Hleba: Byli prapanovy navat z ZŠA 12

Alaksandr Hleb ździviŭ futbolnuju hramadskaść, padpisaŭšy kantrakt z adnym z aŭtsajdaraŭ rasijskaj prem'jer-lihi «Kryłami Savietaŭ». Ahient hulca Mikałaj Špileŭski prakamientavaŭ nastupnym čynam niečakany viektar praciahu karjery svajho padapiečnaha. Patłumačyŭ, čamu nie atrymałasia ź inšymi varyjantami. Zakranuŭ temu rasstavańnia z «Barsiełonaj». A taksama ahučyŭ sumu tranśfieru za Hleba, kali b toj nie staŭ volnym ahientam.

— Čamu Alaksandr Hleb vyrašyŭ praciahnuć karjeru ŭ «Kryłach Savietaŭ»?

— My trapili ŭ cejtnot pa časie, bo kantrakt z «Barsiełonaj» razarvali tolki 30 studzienia. Alaksandr admoviŭsia ad finansaŭ katałonskaha kłuba, i ŭsim było zrazumieła, što adbudziecca pierachod u jeŭrapiejskuju kamandu. Kali b chto-niebudź źviarnuŭsia ŭ «Barsiełonu» raniej za 30-je, to im by vystavili b kaśmičny košt tranśfieru.

Niedzie kala piaci miljonaŭ jeŭra. Choć katałoncy kazali: «Niama prablem. Chaj kłuby źviartajucca — budziem vieści pieramovy».

Ale heta čysta taktyčny chod, jaki ŭ nas zabraŭ tolki šmat času. Kali Alaksandr ŭsio ž taki atrymaŭ status svabodnaha ahienta, i na toj momant užo mielisia papiarednija damovy ź jeŭrapiejskimi kamandami, tolki z-za niedachopu času nie paśpieli zaklučyć ździełku. Tamu prablema tolki ŭ časie. U nas zastavaŭsia ŭsiaho adzin dzień da zakryćcia jeŭrapiejskaha tranśfiernaha akna. Jak viadoma, stopracentnuju prapanovu «Alimpijakasa» pa abjektyŭnych pryčynach Alaksandr nie pryniaŭ. Choć u Hrecyi ŭsie pytańni byli praktyčna vyrašanyja.

U vyniku pryjšłosia vybirać z taho, što było.

Razam z rasijskimi partniorami pramanitoryli ŭsie varyjanty i spynilisia na «Kryłach Savietaŭ». Choć było niekalki prapanoŭ u dalokaj Amierycy ŭ lizie MŁS. Ale Alaksandr spyniŭsia na samarskim kłubie.

— Uvohule, źjechaŭ u Samaru ad biezvychodnaści?

— Ja b tak nie skazaŭ. Prosta na hety momant Hlebu patrebna praktyka. U jaho vielizarnaja matyvacyja hulać u futboł. I jašče vielmi važna, što čałaviek, jaki šmat čaho bačyŭ i paśpieŭ zavajavać ŭsie tytuły, zaraz znoŭ staŭ hałodny da futboła. Alaksandr — talenavity hulec. I ŭsim heta viadoma. Letaś Hleba pieraśledvali traŭmy, ale jon hodna vybraŭsia ź situacyi. Paŭtarusia, vyklučna pa abjektyŭnych pryčynach tranśfier u Jeŭropie nie adbyŭsia. Choć, naprykład, byli prapanovy z bundeślihi.

— U prem'jer-lizie «Kryły Savietaŭ» viaduć baraćbu za vyžyvańnie. Niaŭžo dla Hleba, chaj navat i ŭ Rasii, nie znajšłosia bolš mocnaj kamandy?

— Saša pierajšoŭ tudy, kudy paličyŭ patrebnym. I kłub hodna acaniŭ jaho imia.

Spadziajusia, supracoŭnictva atrymajecca karysnym i ŭzajemavyhadnym.

Kantrakt raźličany da kanca čempijanatu, heta značyć napieradzie 12 hulniaŭ.

— Čamu sarvaŭsia pierachod u «Alimpijakas»?

— Hleb pryniaŭ rašeńnie nie padpisvać kantrakt. Usie pytańni da Alaksandra.

— Nakolki praŭdzivaja infarmacyja, byccam maskoŭski «Łakamatyŭ» hatovy byŭ prapanavać Hlebu trochhadovy kantrakt?— Nie adpaviadaje rečaisnaści.

— A pradmietnyja pieramovy z maskoŭskim «Spartakom»?

— Ad rasijskich kłubaŭ, akramia «Kryłaŭ Savietaŭ», kankretnych prapanoŭ nie pastupała.

— «Błekbern», «Viest Chem», «KPR», «Livierpul», «Hałatasaraj» … Chto z hetaha śpisu sapraŭdy cikaviŭsia Hlebam?

— Usie razmovy ŭžo nie majuć značeńnia. Hleb — heta ekskluziŭ dla ŭsich kamand. Paŭtarusia, kankretnyja prapanovy byli. Ale zastavałasia roŭna 24 hadziny da zakryćcia tranśfiernaha akna. Kali b chto-niebudź źviarnuŭsia ŭ «Barsiełonu» pa Alaksandru da 30 studzienia, to jaho b nikoli nie adpuścili biaspłatna. Adziny šaniec — razarvać kantrakt i za dzień padpisać ź inšym jeŭrapiejskim kłubam novaje pahadnieńnie. Uźnik varyjant z «Alimpijakasam», ale pa abjektyŭnych pryčynach ździełka nie adbyłasia. Tamu my i zastalisia bieź Jeŭropy.

— Čamu «Barsiełona» pahadziłasia dać Alaksandru status volnaha ahienta, ale pytańnie vyrašyŭsia tak pozna?

— Hleb — vielmi darahoje zadavalnieńnie. Za toje, što katałoncy pahadzilisia dać status volnaha ahienta, treba skazać dziakuj ludziam, jakija zajmalisia pytańniami Alaksandra. Jany ŭsio ž taki zmahli dacisnuć «Barsiełonu». Choć Saša całkam moh zastacca ŭ Ispanii i pracavaŭ by z kamandaj.

Praŭda, nie hulaŭ b, a tolki treniravaŭsia. Takoje stanovišča spraŭ jaho nie zadavalniała.

— Nie viedaju, źviartajecie ci ŭvahu na kamientary zaŭziataraŭ… Dyk voś bolšaść rasceńvaje pierachod Hleba ŭ Rasiju, kali vyjaŭlacca kulturnym movaj, jak surjozny krok nazad u karjery futbalista.

— Usio vydatna viedajuć, što Hleb i Špileŭski jak adna siamja. Nikoli ŭ žyćci navat nie dazvoliŭ i dumać, što Saša zrabiŭ surjozny krok nazad. Praŭda, u kožnaha svajo mierkavańnie. Liču, rasijskaja prem'jer-liha — nie samy horšy varyjant. Da taho ž, «Kryły Savietaŭ» hodna acanili Alaksandra — unikalnaha i lehiendarnaha futbalista. U toj ža čas vydatna razumieju, što ciapier u nas šmat niadobrazyčliŭcaŭ. Ale Saša pavinien i jašče abaviazkova budzie hulać na samym vysokim uzroŭni. Napieradzie 12 matčaŭ čempijanatu Rasii, a tam žyćcio pakaža.

Andrej Hłuzd, Goals.by

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH