Vybary ŭ Maskvie: anłajn ad karespandenta NN, jaki zarehistravaŭsia naziralnikam abnaŭlajecca 13

7.05.

Vybary ŭ Maskvie pačalisia. Karespandent «NN» dziažuryć na vybarčym učastku ŭ maskoŭskim spalnym rajonie Tušyna. Jašče da adkryćcia kala ŭvachodu na ŭčastak sabralisia niekalki piensijanieraŭ, jakija čakali, kab prahałasavać jak najchutčej. Ahułam ža ŭ pieršyja chviliny svoj vybar zrabili 9 čałaviek, adzin ź ich pa admacavalnym dakumiencie.

Naziralnikaŭ vosiem, jość i ad KPRF, i ad Pucina, i ad «Spraviadlivaj Rasii». Ale, pakolki znachodzicca ŭvieś čas na ŭčastku nieabaviazkova, pieršyja naziralniki ŭžo paprasilisia źbiehać damoŭ.

7.20.

Jak i astatnija vybarčyja ŭčastki, učastak № 3015 abstalavany prazrystymi ŭrnami i dźviuma vieb-kamierami. Videa z učastka možna hladzieć tut , ale jano, vidać, dastupna tolki naviedvalnikam sajta, zarehistravanym zahadzia.

7.50.

Pieršaja aburanaja vybarca. Skardzicca, što niama hučnaj muzyki, a tamu i niama adčuvańnia śviata.

Maskvičy praciahvajuć hałasavać, ale biez asablivaha impetu. Členy kamisii kažuć, što anšłah budzie, a 12-j pa maskoŭskim časie.

8.25.

Bufiet, adkryty ŭ škole, pracuje zusim nie z tym razmacham, što na vybarach u Biełarusi. Nijakaha ałkaholu, niekalki vidaŭ buterbrodaŭ, sokaŭ i šakaładu. Dyj ceny rynkavyja, bieź źnižak.

8.35.

Dla kamientatara Mikoła ŭdakładniajem: tym, chto hałasuje ŭpieršyniu, nijakich padarunkaŭ nie robiać. Zrešty, pakul na ŭčastak prychodziać adnyja piensijaniery.

8.40.

Miarkujučy pa zapisach u Tvitary, samyja raspaŭsiudžanyja parušeńni — «karusieli» vybarcaŭ, jakija jeduć ad učastka da ŭčastka z admacavańniami, a taksama… iłže-naziralniki ad kandydataŭ u prezidenty. Pakolki na ŭčastku moža prysutničać tolki pa dvoje naziralnikaŭ ad kožnaha kandydata, sapraŭdnych naziralnikaŭ nie rehistrujuć.

9.00.

Infarmacyja pra «karusieli» prychodzić z susiednich učastkaŭ. Moža, zavitajuć i da nas? Zrešty, kamisija vyhladaje sumlennaj. Na apošnich parłamienckich vybarach «Adzinaja Rasija» atrymała na ŭčastku mienš za 25%.

9.30.

Na našym učastku № 3015 zarehistravana kala 2000 vybarcaŭ. Pakul što prahałasavali 150 čałaviek, pryčym až 18 ź ich — pa admacavańni. Z chviliny na chvilinu hrupa siabroŭ kamisii vypravicca abychodzić tych vybarcaŭ, jakija nie mohuć pryjści na ŭčastak sami. U hetym śpisie pakul 56 čałaviek.

9.40.

Pa prośbach vybarcaŭ, na ŭčastak prynieśli prajhravalnik, u jaki ŭstavili dysk z karaokie. Hučać savieckija pieśni biez słovaŭ.

9.55.

Na ŭvachodzie ŭ škołu dziažuryć ź dziasiatak palicejskich ź mietałašukalnikami. Jany praviarajuć usich, chto idzie ź vialikimi sumkami.

10.30.

Adnačasova z prezidenckimi vybarami adbyvajucca i municypalnyja. Kandydataŭ było dzieviać, ale adzin ź ich źniaŭsia. Ludzi starajucca nie afišavać svaju partyjnuju prynaležnaść, jość tolki adzin kamunist i adzin ŁDPRaviec. Astatnija prachodziać jak samavyłučency.

10.35.

Pamiaškańnie, u jakim znachodzicca ŭčastak, nadzvyčaj maleńkaje. Pastajanna źbirajucca čerhi i na atrymańnie biuleteniaŭ, i na ŭvachod u kabinki dla hałasavańnia.

11.30.

12 hadzin pa miascovym časie — pik hałasavańnia. Ludzi iduć sucelnaj płyńniu. Usio adbyvajecca pa praviłach, nichto nie ahituje ni za Pucina, ni za jaho kankurentaŭ. Tolki adna žančyna, jakaja hałasavała pa admacavalnamu, demanstratyŭna pakazała, što jana za Ziuhanava.

11.45.

Pieršaja skarha. Mužčyna narakaje, što u vybarčyja śpisy ŭ kvatery, u jakoj zarehistravanyja tolki jon z žonkaj, zapisany nieviadomy jamu treci čałaviek. Jon padazraje, što kamisija moža paśla ŭkinuć biuleteń ad jaho imia.

12.40.

Učastak možna zanosić u śpis uzornych — nie bačna nivodnaha parušeńnia.

16.05.

Hałasavańnie praciahvajecca, da zakryćcia ŭčastku jašče try hadziny, ale vybarcaŭ užo amal niama.

16.20.

U 19.00 pa biełaruskim časie pačniecca samaje cikavaje — padlik hałasoŭ. Siarod naziralnikaŭ na ŭčastku № 3015 jość adzin pradstaŭnik KPRF z pravam daradčaha hołasa. Jon spadziajecca, što nivodnaj pamyłki ŭ vyniku nie budzie.

16.50.

Jak i ŭ Biełarusi, vybarčyja kamisii składajucca pieradusim z rabotnikaŭ škoły. Tamu na praciahu cełaha dnia adbyvajucca «sustrečy» nastaŭnikaŭ z byłymi vučniami.

17.30.

Kamisija z žacham čakaje padliku hałasoŭ. Vyniki prezidenckich vybaraŭ budzie padličyć lohka, ale adnačasova ź imi pravodziacca jašče i municypalnyja. Zhodna z zakonam, vybarcy mohuć prahałasavać bolš čym za adnaho municypalnaha kandydata. U našym vypadku — za čatyroch. Ale niekatoryja vybarcy hałasujuć za adnaho, niekatoryja — za dvuch. Karaciej, błytanina.

17.40.

Naziralniki na ŭčastkach, dzie hałasavańnie ŭžo skončyłasia, vystaŭlajuć u Tviter pratakoły sa svaich učastkaŭ. Naprykład, u Buracii Pucin ledź-ledź, ale ŭsio ž pieradoleŭ patrebnuju miažu, u jaho kala 53%. U Ziuhanava, jaki na druhim miescy, kala 15%. Procharaŭ — treci.

17.50.

Dla kamientatara Arciomki tłumačym, što takoje «karusieli». Sotni rabočych/biudžetnikaŭ/pucinskaj moładzi niezakonna atrymlivajuć admacavalnyja paśviedčańni, jakija dajuć prava hałasavać u lubym miescy krainy. Arhanizavanymi hrupami jany pierajazdžajuć ad učastka da ŭčastka, dzie hałasujuć za Pucina. Takim samym mietadam falsifikacyj aktyŭna karystalisia va Ukrainie, kali pa krainie raźjazdžali aŭtobusy z šachciorami.

18.10.

Jašče adzin skandał. Prybiehła pakryŭdžanaja babula. Jana žyvie ź invalidam, ale da kvatery jakoj vyjaznaja kamisija nie dajšła, bo nie pracavali ni telefon, ni damafon. Ciapier babula patrabuje, kab kamisija «ŭvažyła čałavieka, jaki čakaŭ ceły dzień». Paśla instrukcyi źvierchu da invalida ŭsio ž adpraŭlajecca kamisija.

18.20.

Tym časam usia Rasija lubujecca, jak na učastku ŭ Dahiestanie nieviadomyja asoby «skarmlivajuć» dziasiatki biuleteniaŭ elektronnaj urnie. Videa možna paśpieć ubačyć tut.

18.30.

Da zakryćcia ŭčastku zastałosia paŭhadziny, ale bolšaść naziralnikaŭ užo pajšło dadomu.

18.45.

U apošnija chviliny padciahnułasia šmat moładzi, nie takoj adkaznaj, jak piensijaniery, što hałasavali ŭranicy.

18.55.

Paru chvilin da kanca hałasavańnia. Usie hatovyja da padliku biuleteniaŭ.

21.35.

Padlik hałasoŭ skončyŭsia.

Zhodna ź jaho vynikami, pieramohu śviatkavaŭ prem'jer-ministr Uładzimir Pucin. Ale pałovy hałasoŭ jon nie nabraŭ, u jaho 46,6%.

Kali b takija vyniki byli ŭ cełym pa krainie, Rasiju čakaŭ by druhi tur.

Druhim na ŭčastku № 3015 staŭ miljanier Michaił Procharavaŭ (21,1%), jaki nienašmat abyšoŭ Hienadzia Ziuhanava (17,4%). Autsajderami stali Siarhiej Mironaŭ (6,3%) i Uładzimir Žyrynoŭski (5,9%).

Padčas padliku nazirałasia poŭnaja svaboda — naziralnikam (karespandentu «NN» i dvum aktyvistam KPRF) dazvalałasia stajać kala samaha stała padlikaŭ i navat pierapraviarać biuleteni, padličanyja členami kamisii.

* * *

Rasijskija vybarščyki ŭ niadzielu hałasujuć na vybarach prezidenta krainy.

Pieršyja vybarčyja ŭčastki adkrylisia na Kałymie i Kamčatcy. U Mahadanskaj vobłaści adčynilisia 110 učastkaŭ, u Kamčackim krai — 127, paviedamlaje Bi-Bi-Si.

U Maskvie ŭ CVK zapracavaŭ hetak zvany «videamur» — ekran, na jaki ciaham dnia budzie vyvodzicca tranślacyja z veb-kamier na vybarčych učastkach.

Hałasavańnie zavieršycca ŭ 20:00 pa minskim časie ŭ niadzielu z zakryćciom učastkaŭ u Kalininhradskaj vobłaści.

Udzieł u vybarach biaruć: prem'jer-ministr Uładzimir Pucin, lidar KPRF Hienadź Ziuhanaŭ, staršynia ŁDPR Uładzimir Žyrynoŭski, kiraŭnik «Spraviadlivaj Rasii» Siarhiej Mironaŭ i niezaležny kandydat, biźniesmien Michaił Procharaŭ.

Nivodnaha kandydata ad praŭdzivaj apazicyi ŭ biuleteniach niama.

Rasijskaja palityčnaja sistema adsiejvaje siły, jakija realna adkidajuć pucinski palityčny ład.

Karespandenty «Našaj Nivy» adpravilisia ŭ Maskvu aśviatlać hetyja vybary i paślavybarčyja pratesty — apazicyja abiacaje, što jany buduć.

Ni ŭ koha niama sumnievaŭ, što Pucin zdabudzie svaich 50 pracentaŭ hałasoŭ.

U krainie, dzie tele- i radyjokanały całkam kantralujucca ŭładaj, hetaha lohka dabicca.

Adnak hetyja vybary, u adroźnieńnie ad hałasavańnia 2008 ci 2004 hadoŭ, majuć svaju intryhu.

Vybaram papiaredničali 100-tysiačnyja akcyi pratestu apazicyi. Jany adnoviacca ŭ paniadziełak i buduć doŭžycca ceły tydzień.

Jaki maštab nabuduć paślavybarnyja pratesty? Jak jany buduć raźvivacca? Jaki scenar na ich padrychtavali pucinskija siłaviki?

Ci paŭtorać jany minski śniežań-2010, ci dazvolać ludziam svabodu vykazvańnia?

Mienavita ad hetaha tydnia budzie zaležać trajektoryja raźvićcia Rasii nastupnyja 6 hadoŭ.

Šeść, bo źmienienaja kanstytucyja padoŭžyła prezidencki termin u Rasii.

Pavodle acenak rasijskaha sacyjołaha Ihara Klamkina, papularnaść Pucina padaje i moža całkam raźviejacca ŭ nastupnyja hady.

Usio bolšuju viadomaść nabyvaje palityčny lidar novaha pakaleńnia — rasijski nacyjanalist Alaksiej Navalny.

Hety błohier źjadnaŭ vakoł siabie pravych i levych. Jon vyłučyŭ niekalki tem, jakija abjadnoŭvajuć rasijskaje hramadstva: baraćba z karupcyjaj, demakratyzacyja palityčnaj sistemy, jeŭrapieizacyja dziaržaŭnych orhanaŭ.

Navalny zaklikaje da manifiestacyj z palityčnymi patrabavańniami. Jon prapanuje raźbić u centry Maskvy namiotavaje miastečka

i pratestavać da taho času, pakul ułady nie zadavolać patrabavańniaŭ apazicyi. U pryvatnaści, patrabujuć praviadzieńnia pieravybaraŭ u Dumu i adstaŭki kiraŭnika Centrvybarkama.

Takim čynam, naša ŭvaha budzie skiravana na Maskvu nie tolki siońnia, 4 sakavika, ale i nastupnyja dni.

Zastavajciesia z «Našaj Nivaj».

Jahor Marcinovič, Maskva

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH