Mahiloŭski abłvykankam nia ličyć stan biełaruskaj movy ŭ rehijonie «žudasnym». Pra heta havorycca ŭ liście namieśniku staršyni partyi BNF Ryhoru Kastusiovu.
Palityk źviartaŭsia da kiraŭnika abłasnoj vertykali Piatra Rudnika, kab davieści jamu, što na Mahiloŭščynie zvužajecca vykarystańnie nacyjanalnaj movy biełarusaŭ. U liście kandydat u prezydenty śćviardžaŭ, što zaćvierdžany Rudnikam «Kompleks pieršačarhovych mier Mahiloŭskaha abłvykankamu pa papularyzacyi biełaruskaj movy na 2010–2012 hady» nie vykonvajecca. Dla papularyzacyi movy Kastusioŭ prapanoŭvaŭ dapamohu partyi BNF.
Pavodle palityka, z adkazu, padpisanaha namieśnikam staršyni abłvykankamu Valeryjem Małaškam, niezrazumieła, ci patrebnaja takaja dapamoha. U liście pra heta nie havorycca, kaža Ryhor Kastusioŭ:
«Mnie dziakujuć za maju hramadzianskuju pazycyju i tut ža zaznačajuć, što abłvykankam taksama zaniepakojeny stanam biełaruskaj movy, ale jany nie pahadžajucca z tym, što jon žudasny i što mnohija dziaržaŭnyja ŭstanovy i arhanizacyi naŭmysna robiać zachady pa zvužeńni ŭžyvańnia biełaruskaj movy. Pieraličvajucca prykłady stanoŭčaj dziejnaści pa papularyzacyi movy. Adznačajecca, što biełaruskamoŭnych škoł u rehijonie amal 53 pracenty. U 223 škołach vykładajucca pradmiety na biełaruskaj movie. Pryznajecca, što ich stanovicca mieniej, bo zakryvajucca, ale adkrytyja biełaruskamoŭnyja klasy ŭ Mahilovie j Horkach. Jašče pracujuć 63 biełaruskamoŭnyja hrupy ŭ haradzkich dziciačych sadkach.
Karaciej, na maje pytańni ja atrymaŭ adpisku. Čynoŭnikam na biełaruskuju movu plavać. Tamu i źjaŭlajucca tajemnyja listy ŭ abłvykankamy ad byłoha rektara Mahiloŭskaha ŭniversytetu imia Kulašova, byłoha ministra adukacyi Radźkova ab spynieńni hvałtoŭnaj biełarusizacyi. U inšych krainach za takija parady čynoŭnik pazbaviŭsia b pasady, a ŭ nas siadziać».
Jak vynikaje z adkazu čynoŭnikaŭ, na čyhunačnym vakzale ŭ Mahilovie infarmacyjnaje tabło raskładu ruchu ciahnikoŭ pierapisana ź biełaruskaj na rasiejskuju movu, bo zamiežnyja hramadzianie nia viedajuć movy biełarusaŭ. Dla biełarusaŭ ich mova zastałasia na stancyjach za horadam.
«Kompleks pieršačarhovych mier Mahiloŭskaha abłvykankamu pa papularyzacyi biełaruskaj movy na 2010–2012 hady» byŭ zaćvierdžany Piatrom Rudnikam 31 śniežnia 2009 hodu. Pra chod jahonaj realizacyi źviestak u dastupnych krynicach infarmacyi vielmi mała.
Hladzi taksama: Zahad čynoŭnikam: nie dapuskać biełarusifikacyi i skaračeńnia ŭžyvańnia ruskaj movy.
