Siarhiej Dubaviec, u 1996 h. redaktar «Našaj Nivy», supracoŭnikam jakoj byŭ palitviazień Słavamir Adamovič, pryjšoŭ u «amierykanku» i zdoleŭ pierakanać palitviaźnia spynić suchuju haładoŭku pratestu.
Hanna Soŭś: Siarhiej, davajcie zhadajem 1996 hod. Jak vy trapili ŭ SIZA KDB? Jakija arhumenty vy vykarystoŭvali?
Siarhiej Dubaviec: Mianie zaprasiŭ śledčy Słavamira. Ja pryjšoŭ. Mianie pryviali ŭ «Amerykanku», navat zrabili ekskursiju, načalnik hetaj ustanovy pavadziŭ pa pavierchach i kamerach. Paśla ja siadzieŭ u vialikim kabinecie na pieršym paviersie, pryviali Słavamira. Pamiataju, što jon byŭ zialony. Pry našaj hutarcy prysutničali śledčy i načalnik turmy. Što ja kazaŭ, ja nia pamiataju,
Soŭś: Jak by vy mahli patłumačyć, što pierakanała — vašaja prysutnaść, vaš aŭtarytet ci Słavamir užo byŭ hatovy spynić haładoŭku?
Dubaviec:
Ja dumaju, što Słavamir byŭ hatovy. Jon stajaŭ na krai i heta byŭ vybar: abo žyć dalej, abo… Jon zrabiŭ słušny vybar.
Soŭś: Siońnia ŭ interviju «Svabodzie» jon skazaŭ, što jaho zasmučaje toje, što mnohija stali zanadta časta vykarystoŭvać haładoŭku i časam heta byvaje ź nia vielmi krytyčnych nahodaŭ. Hetaje častaje vykarystańnie apazycyjanerami, represavanymi haładoŭki źnižaje jaje vartaść i ŭłady ŭžo surjozna nie ŭsprymajuć haładoŭku. Ci vy zhodnyja ź im?
Dubaviec: Ja całkam zhodny.
Adno chaču dadać, što ŭłady nie ŭsprymajuć nie tamu, što haładoŭki zanadta častyja i devalvujecca ich kaštoŭnaść. Devalvujecca ŭ vačach ludziej, a nia ŭładaŭ.Što da ŭładaŭ, dyk jany prosta rasčałaviečylisia, stracili vielmi važnyja maralnyja ŭłaścivaści čałavieka, takija jak miłasernaść i supieražyvańnie.
Soŭś: Pakul nie zaŭvažna šyrokich akcyjaŭ salidarnaści z Kavalenkam. Pra heta nie chaciełasia b havaryć, ale kali Siarhiej Kavalenka pamre, ci heta ŭzrušyć biełaruskaje hramadztva, ci ŭskałychnie jaho, ci budzie mieć efekt?
Dubaviec:
Ja dumaju, što nia ŭzrušyć, tamu što ŭ nas niama biełaruskaha hramadztva. U nas nacyja ŭ pačatkovym stanie farmavańnia. I takija rečy jak salidarnaść siońnia nia dziejničajuć.Nu, a kali zdarycca toje, pra što vy kažacie, dyk, na maju dumku, heta źjava symbaličnaja. Siarhiej Kavalenka — taki ž hieroj biełaruskaj nacyi, jak, naprykład, Kastuś Kalinoŭski.
Soŭś: Jak vyratavać Siarhieja Kavalenku — jaki vaš adkaz?
Dubaviec: My majem spravu z symbaličnym učynkam, z podźviham. Tamu tut pytańnie: što jość «vyratavać»? Słovy tut nie dapamohuć.
Ja b nie znajšoŭ słovaŭ dla taho, kab pierakanać Siarhieja Kavalenku spynić haładoŭku, bo całkam padzialaju sens jahonaha ŭčynku ŭ baraćbie z antybiełaruskim režymam. Idzie schavanaja vajna, u jakoj ja adnaznačna na tym baku, što i Siarhiej. Adzinaje, što ja moh by zrabić — heta zamianić jaho na jahonym miescy.Ja da hetaha hatovy. Dumaju, u Biełarusi šmat tych, chto moh by zamianić jaho.
Soŭś: Ci vy mahli b zaraz źviarnucca da Siarhieja Kavalenki? Mahčyma jon vas pačuje, mahčyma, svajaki pierakažuć jamu vašyja słovy.
Dubaviec: Siarhiej, ja ŭžo skazaŭ, što całkam padtrymlivaju hety ŭčynak.
Heta adzin ź vielmi niešmatlikich učynkaŭ u sučasnaj Biełarusi, jakija napaŭniajuć biełarusaŭ honaram za svaju nacyju.I znoŭ paŭtarusia, što kali b znajšłasia takaja mahčymaść, ja hatovy zamianić ciabie na tvaim miescy.
