Kalehija Bresckaha abłasnoha suda vyniesła siońnia prysud u dačynieńni da troch byłych słužbovych asob pa spravie ab vybuchu na zavodzie STAA «Pinskdreŭ-DSP» ZAT «Chołdynhavaja kampanija «Pinskdreŭ». Ab hetym karespandentu BIEŁTA paviedamiła dziaržaŭny abvinavaŭca pa spravie Łarysa Karanievič.
Da čatyroch hadoŭ abmiežavańnia voli biez nakiravańnia ŭ papraŭčuju ŭstanovu adkrytaha typu asudžany były dyrektar STAA «Pinskdreŭ-DSP», jakoha pryznali vinavatym u słužbovaj chałatnaści.
Čatyry hady pazbaŭleńnia voli ŭ kałonii pasieliščy atrymaŭ były hałoŭny inžynier ZAT «Chołdynhavaja kampanija «Pinskdreŭ» i try hady pazbaŭleńnia voli, taksama ŭ kałonii va ŭmovach pasialeńnia, — hałoŭny inžynier STAA «Pinskdreŭ-DSP». Jany pryznanyja vinavatymi ŭ parušeńni patrabavańniaŭ pažarnaj biaśpieki, jakoje paciahnuła za saboj hibiel ludziej i materyjalny ŭron pradpryjemstvu ŭ asabliva bujnym pamiery. Usie troje pryznanyja vinavatymi ŭ stvareńni biez prajektnaj dakumientacyi pažaraniebiaśpiečnaj vytvorčaści, u pryvatnaści ŭčastka pa vypusku draŭnianych paliŭnych pielet, dzie i adbyŭsia vybuch, jaki zabraŭ žyćci čatyrnaccaci čałaviek. Abodva byłych hałoŭnych inžyniera ŭziatyja pad vartu ŭ zale suda.
Jak paviedamiła Łarysa Karanievič, usim traim vyniesiena taksama adnolkavaje dadatkovaje pakarańnie ŭ vyhladzie pazbaŭleńnia prava zajmać pasady, źviazanyja z vykanańniem arhanizacyjna-rasparadčych i administracyjna-haspadarčych abaviazkaŭ terminam na 5 hadoŭ.
Svaju vinu byłyja dyrektar i hałoŭny inžynier STAA «Pinskdreŭ-DSP» pryznali častkova, były hałoŭny inžynier chołdynhu — admaŭlaje.
Prysud pakul nie ŭstupiŭ u zakonnuju siłu i moža być abskardžany va ŭstanoŭlenym paradku.
Kryminalnaja sprava ŭ dačynieńni da byłoha hienieralnaha dyrektara ZAT «Chołdynhavaja kampanija «Pinskdreŭ» Łarana Aryniča vydzielena ŭ asobnuju vytvorčaść. Na łavie abvinavačanych jaho siońnia nie było, jon usio jašče znachodzicca ŭ vyšuku.
Trahiedyja na zavodzie STAA «Pinskdreŭ-DSP» adbyłasia 25 kastryčnika 2010 hoda. Vybuchovaj chvalaj razburyła cech pa vytvorčaści draŭniana-stružkavych plit i raźmieščany ŭ im ŭčastak draŭniana-paliŭnych pielet, paškodžana technałahičnaje abstalavańnie. Škoda pieravysiła Br3,9 młrd., u dalaravym ekvivalencie na momant avaryi jana była roŭnaj prykładna 1,2 młn. U momant vybuchu zahinuli dva rabotniki pradpryjemstva, jašče 12 paźniej pamierli ŭ balnicach ad atrymanych apiokaŭ. Usiaho ŭ vyniku hetaj trahiedyi paciarpieŭ 21 čałaviek.
