Vystava unikalnych archiŭnych dakumientaŭ, jakija adnosiacca da pieryjadu Biełaruskaj Narodnaj Respubliki (BNR), adkryłasia 23 sakavika ŭ Centralnym dziaržaŭnym archivie Litvy i EHU. Mierapryjemstva prachodzić u ramkach Biełaruskaha tydnia, pryśviečanaha śviatkavańniu Dnia Voli ŭ Vilni.
Jak paviedamili BiełaPAN u pres-słužbie maładziožnaj asacyjacyi StudAlliance, u ekspazicyi pradstaŭleny kopii roznych zvarotaŭ, rezalucyj, asabistych dakumientaŭ zasnavalnikaŭ palityčnych abjadnańniaŭ, dakumientaŭ ab biełaruskim muziei Ivana Łuckieviča, dypłamatyčnych pašpartoŭ biełaruskich palitykaŭ, unikalnyja źviestki ab dziejnaści Barysa Kita.
Vystava adkryli kuratary bakałaŭrskaj prahramy EHU «Kulturnaja spadčyna i turyzm» Juryj Jurkievič i prarektar pa akademičnych pytańniach Alaksandr Kałbaska. Mastackim afarmleńniem vystavy zajmaŭsia Aleś Puškin. U pačatku mierapryjemstva było začytanaje vitalnaje słova staršyni Rady BNR Ivonki Surviły.
Pradstaŭniki EHU pry padtrymcy supracoŭnikaŭ Centralnaha archiva šukali i analizavali histaryčnyja dakumienty, jakija majuć značeńnie dla biełaruskaj historyi 1918-1944 hadoŭ.
U pres-słužbie asacyjacyi adznačyli, što naviedvalniki vystavy ź cikavaściu słuchali apoviad pra dakumienty, raźmieščanyja na vystavie, baćki biełaruskaj niezaležnaści Antona Łuckieviča ŭ vykanańni artysta Piatra Klujeva, jaki źviarnuŭsia da haściej na biełaruskaj, anhlijskaj, polskaj i italjanskaj movach. «Premjer-ministr» ułasnaručna padpisaŭ «pašparty BNR» z asabistym numaram dla kožnaha, chto chacieŭ stać jaje hramadzianinam.
Arhanizatarami vystavy vystupili Jeŭrapiejski humanitarny univiersitet (EHU), Centralny dziaržaŭny archiŭ Litvy i Fond imia Konrada Adenaŭera (KAS).
