Hurt Akute pra kancert zamiest «Krambambuli»: «Heta byŭ źbieh abstavinaŭ» 11

Mahiloŭskaja kamanda Akute — pieramožcy «Basovišča», aŭtary alboma, jaki muzyčnyja krytyki paličyli adnym z najlepšych za 2011 hod. Ich muzyka ŭsio čaściej hučyć u roznych załach i klubach. Prykładam hetaha byŭ niadaŭni sumiesny z «Yellow Brick Road» i «Pietlej pristrastija» kancert u mienskim klubie «Re:public» — u toj dzień, kali tam musiła vystupić «Krambambula». Jak tak vyjšła? I čym žyvuć muzyki siońnia?

Pra heta «Našaj Nivie» paviedamili ŭdzielniki Akute Stanisłaŭ Mytnik i Raman Žyharaŭ:

— Jak źjaviŭsia «Akute»?

Raman Žyharaŭ: Možna ličyć, što my prosta praciahnuli hrać paśla raspadu papiaredniaha prajektu. Praŭda, ź nievialikim pierapynačkam na «depres». Ad samaha pačatku miełasia hrać niešta kštałtu sinci-pop muzyki: New order ci Pet shop boys. Kaniešnie, z časam niešta źmianiłasia. Heta zvyčajnaja evalucyja.

— Čamu mienavita «Akute» ? Ź niamieckaha heta: «vostry, aktualny». Mo niamieckaja — vašaja lubimaja mova? Jak pravilna stavić nacisk?

RŽ: My havorym «akUte». I čamu b nie vostry? :) Naša lubimaja mova — biełaruskaja.

— Paśla pośpiechu vašaha alboma «Dzievački i kosmas» pradkazalnaje pytańnie pra nastupny albom. Kali zapłanavany jaho vychad?

RŽ: Užo hetaj viasnoj płanujem vydać druhuju płytku.

Ad liryčnaha kosmasu ŭ joj zastaŭsia chiba što biespavietrany ded spejs…

— Kožny čałaviek hanarycca tym, što zrabiŭ. Jakaja vašaja lubimaja ŭłasnaja pieśnia?

Stanisłaŭ Mytnik: Ja hanarusia kožnaj našaj pieśniaj. My nie robim piesień dla kolkasci.

Vy ŭžo majecie dobry vopyt vystupaŭ na Biełarusi i susiednich krainach. U jakim horadzie vašyja kampazicyi ŭsprymajuć lepš za ŭsio?

RŽ: Nam padabajecca vystupać upieršyniu, u novym horadzie, dzie my dahetul jašče nie byli. A kali ciabie jašče i nie čuli tam, to voś heta sapraŭdnaje vyprabavańnie jakaści, sumlennaści i addanaści svajmu słuchaču. Dla nas absalutna ŭsie harady važnyja i lubimyja. Asabliva biełaruskija.

— A naohuł, što takoje «idealny kancert» u vašym ujaŭleńni?

SM:

Kali u mianie adbudziecca idealny kancert — ja paviešu hitaru na cvik. Bolš nie budzie čaho chacieć. :)

— Darečy, jak vy pišacie pieśni? Što vas natchniaje?

RŽ: Pieśni pišucca sami, naturalna, natchnieńnie prosta tak vyklikać niemahčyma. Heta moža być što zaŭhodna — razmova, pozirk, nadvorje. Nu, a pa muzycy — heta tolki impravizacyja.

— Siońnia my majem šmat prykładaŭ, kali talenavityja vykanaŭcy ź Biełarusi źjazdžajuć u Maskvu, Kijeŭ i tam praciahvajuć tvorčyja pošuki. Ci byli ŭžo dumki pra toje, kab zapisvać rasiejskamoŭnaja pieśni i zachoplivać amataraŭ u Rasii i inšych krainach?

SM: Hałoŭnaje rabić dobra, i mova tut nie pry čym.

Vakarčuk śpiavaje pa-ukrainsku, i jaho słuchajuć… jaho razumiejuć. A pieć pa-rasiejsku śpiecyjalna — heta padobna na kańjunkturščynu.

Jak vy staviciesia da isnavańnia «śpisu zabaronienych muzykaŭ», siarod jakich jość «Lapisy»," Krambambula»? Ci heta ŭdar pa hurtu, abo heta nadaje jašče bolš PR-u i abudžaje narodnuju cikavaść?

SM: I toje, i inšaje.

Usie zabarony vyklikajuć tolki advarotny effiekt i pavialičvajuć zacikaŭlenaść

adnačasova. Ale pra heta jany nie dumajuć.

A čamu vy pahadzilisia vystupać zamiest Volskaha ŭ «Re:public»?

RŽ: Heta tolki źbieh abstavinaŭ, jaki kožny traktuje ŭ svoj bok.

SM:

Damova z nahody kancetu ŭ lutym była jašče ŭ śniežni. Spačatku my zhadzilisia hrać 10 lutaha, potym vyśvietliłasia, što kancert pieraniesieny arhanizatarami na 11 lutaha, a ŭžo potym my daviedalisia, što ŭ hety dzień pavinny byŭ adbycca kancert Volskaha.

— Jak vy staviciesia da inšych biełaruskich kalektyvaŭ? Naprykład, «Raźbitaje serca pacana» kazali, što vy «małajcy» i h.d. U časopisach pisali, što vy «pierapieli N.R.M.». Chto zaraz najlepšy, i dzie znachodziciesia vy?

SM: RSP — małajcy, i ŭ pieršuju čarhu nie tamu, što my z imi dobra siabrujem, a tamu, što pracujuć i robiać piesni, jakija ja potym chadžu i piaju. :) Toje ž samaje tyčycca i hurta «Pietla Pristrastija». Mienavita muzyka była pryčynaj našaha znajomstva. Kazać «chto najlepšy» — vielmi subjektyŭna. Usie hetyja spabornictvy dla mianie dzikaść. I nichto z nas nie staviŭ pierad saboj mety pierajhrać «Paŭłava i-Ka».

— Što vas adroźnivaje ad šerahu inšych hurtoŭ? Stajł a-la Endzi Uorchał?

SM: Staŭleńnie da muzyki — my hetym žyviem.

— Zaraz idzie šmat razmoŭ pra adbor na «Jeŭrabačyńnie». Płanujecie sami ŭziać udzieł kaliści?

RŽ: Uvohule nie baču sensu ŭdzielničać u padobnym. Pakul ničoha adtul u maim płej-liście nie źjaviłasia.

— Jaki b Vy napisali słohan dla «Našaj Nivy» siońnia?

«Naša Niva» — jašče žyva.

* * *

Jak paviedamiŭ muzyčny partał «Tuzin Hitoŭ», svoj novy albom «Nie isnuje» hurt płanuje spačatku vykłaści ŭ sieciva. Sam dysk źjavicca paźniej, jaho vydaduć supolna łejbł «BMA-hrup» i kampanija «Vihma». Heta druhi poŭnafarmatny albom kalektyvu. Na im budzie 10 piesień.

Akute rychtujecca da kancertnych prezentacyj alboma. Pieršaja projdzie ŭ rodnym dla muzykaŭ Mahilovie 8 krasavika ŭ kłubie Cuba (Pieršamajskaja, 29). Pačatak, a 17-j. 21 krasavika Akute zajhraje ŭ Minsku, u kłubie Re:public (Prytyckaha, 62). Pačatak, a 19-j. Akrom taho, hurt 1 i 2 červienia vystupić u Kijevie.

Hutaryŭ Andrej Makajonak

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH