«Hazpram» choča źnieści ŭ Minsku aŭtavakzał «Maskoŭski»
Na jaho miescy miarkujecca pabudavać ofisny centr dla «Biełtranshaza» i spartkompleks.
Čutki pra toje, što roznyja inviestary pakłali voka na terytoryju ŭ rajonie skryžavańnia vulicy Filimonava i praśpiekta Niezaležnaści ŭ Minsku, chadzili daŭno. Paśla taho jak «Biełtranshaz» byŭ pradadzieny «Hazpramu», źjaviłasia infarmacyja pra cikavaść da ŭčastku z boku rasijskaj kampanii. Kiraŭnik «Hazproma» Miler zajaviŭ, što ŭ Minsku budzie pabudavany novy kamfartabielny ofis sa spartkompleksam. Hrošaj na heta rasiejcy škadavać nie źbiralisia. Vierahodna, Minharvykankam ŭsio ž pojdzie nasustrač bahatamu inviestaru.
Nie paškadujuć i aŭtavakzał «Maskoŭski»: jon moža być źniesieny.
Kopiju pratakołu «narady pa pytańni zaklučeńnia inviestycyjnaha dahavora z AAT «Biełtranshaz» pa zabudovie terytoryi ŭ rajonie pierasiačeńnia praśpiekta Niezaležnaści — vulicy Filimonava» raźmiaścili karystalniki forumu Onliner.by. Z dakumienta vynikaje, što praces pieramovaŭ idzie poŭnym chodam.
Tak, na naradzie było pryniata rašeńnie pahadzicca z prapanovami AAT «Biełtranshaz» pa praviadzieńni raźliku strataŭ kampanij, jakija arandujuć pamiaškańni na aŭtavakzale. «Minskprajekt» pavinien budzie raspracavać kancepcyju zabudovy terytoryi. Jašče adno daručeńnie — vyznačyć aryjentyrovačny košt budaŭnictva novaha aŭtavakzała, a taksama transpartnaj raźviazki na skryžavańni praśpiekta Niezaležnaści i vulicy Filimonava. Akramia taho,
śpiecyjalistam nieabchodna raźličyć košt i charaktarystyki 2-3-paviarchovych damoŭ dla šmatdzietnych siemjaŭ u rajonie praśpiekta Pieramožcaŭ — vulicy Viaśnianka.
Pieranosić aŭtavakzał na novaje miesca, miarkujučy pa ŭsim, taksama buduć za košt «Biełtranshaza».
Zhodna z pratakołam narady, dla realizacyi maštabnaha prajekta ŭ bližejšy čas padrychtujuć ŭkaz prezidenta.
* * *
Aŭtavakzał «Maskoŭski» adkryŭsia 19 žniŭnia 1999 hoda. Na 7-m respublikanskim architekturnym forumie «Brest 99» budynak atrymaŭ Hran-pry za lepšuju pabudovu hoda. U 2002 hodzie aŭtavakzał pryznana lepšym architekturnym budynkam hoda.
Kamientary