Niamieckaje adździaleńnie Amnesty International zajaviła pra namier vyłučyć Paŭła Sapiełku na mižnarodnuju premiju imia Hranta Dzinka, što ŭručajecca ludziam, jakija pracujuć dziela śvietu, svabodnaha ad dyskryminacyi, rasizmu i hvałtu, ryzykujuć saboj dziela dasiahnieńnia svaich ideałaŭ, karystajucca movaj miru i svaim prykładam natchniajuć i zaachvočvajuć inšych.
Ekśpiertnaja hrupa pa Biełarusi ličyć, što šlacham vyłučeńnia na premiju byłoha advakata Paŭła Sapiełki aŭtarytetnaja pravaabarončaja arhanizacyja dadatkova pryciahnie ŭvahu suśvietnaj hramadskaści da ciažkoha stanovišča advakataŭ u Biełarusi.
U sakaviku 2011 hoda prezidyum Minskaj haradskoj kalehii advakataŭ pad ciskam Ministerstva justycyi pryniaŭ rašeńnie pra vyklučeńnie sp. Sapiełki z šerahaŭ kalehii, tym samym pazbaviŭšy jaho prava zajmacca prafiesijnaj dziejnaściu. Na toj momant advakat abaraniaŭ fihurantaŭ kryminalnych spravaŭ pa padziejach 19 śniežnia 2010 hoda — Andreja Sańnikava, Paŭła Sieviarynca i Źmitra Daškieviča.
***
Hrant Dzink, viadomy žurnalist armianskaha pachodžańnia, hałoŭny redaktar armianskaj haziety «Ahos», jakaja vychodzić u Turcyi, byŭ zabity ŭ 2007 hodzie ŭ Stambule. Mižnarodny fond imia Hranta Dzinka z 2009 hoda ŭručaje premii pamiaci žurnalista. Uznaharody prysudžajucca advažnym hramadskim dziejačam abo žurnalistam, jakija zmahajucca za svabodu słova i pravy čałavieka. Tradycyjna abirajucca dva łaŭreata — hramadzianin Turcyi i zamiežnik. U arhkamitet uvachodziać udava Dzinka Rakiel Dzink, deputaty Jeŭraparłamienta, piśmieńniki i hramadskija dziejačy. Aficyjnaja cyrymonija ŭručeńnia premii štohod prachodzić u Stambule.
