Žoŭtuju presu, tym bolej rasiejskuju, nie čytaju. Ale voś natknuŭsia ŭ siecivie na artykulčyk z "AiF" — i, viedajecie, trochi tarhanuła.
Toje, što hetkim čynam padaje biełaruskuju temu tabloid, — jakraz pakazalna. Bo bulvarnyja medyi padhulvajuć śvietapohladu tak zvanaha prostaha suajčyńnika. Tak što tekścik — infarmacyja dla rozdumu ŭ źviazku z našumiełaj zadumaj naładzić niejkaje nibyta sapraŭdnaje "bratniaje jadnańnie" biez Łukašenki.
Što da prafesijnaha ŭzroŭniu tekściku — nia budziem raźbirać pa kostačkach toje, što "nižej za kalena".
Admietny ž duch, ład myśleńnia.
Voś jon, mesydž:
1. Kali biełarusy nia chočuć abjadnoŭvacca, dyk ci nia čas pierapisać ich ź siabroŭ u vorahi — u adzin rejestar z monstram NATO? (Redaktar, musić, źmiakčyŭ pasaž, ŭziaŭšy "siabroŭ" i "vorahaŭ" u dvukośsie, ad čaho antyteza nabyła zusim niedarečny vyhlad...)
2. Jany — asobny narod? U ich inšyja karani? Pamierci i nia ŭstać!
2. Jość słavianie i jość eŭrapiejcy. Roznyja tam čechi sa słavakami na hanarovy status słavianskich nacyjaŭ ŭžo nia ciahnuć.
3. Biaz našych kredytaŭ małodšyja braty (ci ŭžo nie braty?) prapaduć jak rudyja myšy. Rasieja, ščodraja duša, usich navokał tolki i kormić.
4. U hetych biełarusaŭ roznych prajavaŭ niecyvilizavanaści, saŭkovych pieražytkaŭ, ličy, hetak sama da chalery, jak i ŭ nas, rasiejcaŭ. Jakaja, blin, Eŭropa? Nie vyrablajciesia by mucha na škle: vy takaja ž Azijopa, jak i my!
Voś i ŭsio niachitraje maralite.
Spadabaŭsia adzin z vodhukaŭ na tym samym sajcie.
"Chorošaja staťja, no nie leonťjev, uvy. Niet ledieniaŝich dušu podrobnostiej pro vymirajuŝije biez poddieržki acki brackoj rośsii biełaruskije horoda, pro obmoročnych starikov i t.d. Nizačot".
A ciapier surjozna.
Kładučy ruku na serca, eŭrapiejski vybar dla našaha paspalitaha ludu sapraŭdy nie vyhladaje siońnia nieasprečnaj daminantaj. Sacyjalohija śviedčyć, što pry vybary varyjantaŭ budučyni krainy za uvachodžańnie ŭ Eŭraźviaz vykazvajecca tolki trochi bolej za piatuju častku respandentaŭ. Pryčym za apošnija hady hetaja dola navat trochi źniziłasia.
Ale, pa-pieršaje, eŭrapiejski vybar i EZ (asabliva jak jon malujecca tutejšaj prapahandaj) — nie zusim adno i toje ž.
Pa-druhoje, kali b siońnia ładziŭsia referendum ŭ pytańni abjadnańnia z Rasiejaj, to jon by pravaliŭsia (35,1% vs. 39,3%). Pryčym dola prychilnikaŭ "iadnańnia" skurčyłasia za ličanyja miesiacy. Akurat za toj peryjad, na jaki prypała naftahazavaja vajna.
Pa treciaje, apytańnie elity daje fenamenalny vynik: tam amal pahałoŭna niezaležniki, uklučna z tymi, chto na dziaržaŭnaj słužbie! U zachodniuju pahrozu nia vierać, historyju krainy adličvajuć ad VKŁ (BSSR nabiraje tolki 5%) i vydatna razumiejuć, što źviaz z Rasiejaj — heta kapiec suverenitetu.
Tak što, kažučy ptušynaj movaj sacyjolahaŭ, "u cełym stan rečaŭ raźvivajecca ŭ pravilnym kirunku" :)
To bok supraćlehłym "acki brackoj" intehracyi.
