Nibyta praz praterminavanuju spłatu padatkaŭ.
Jak paviedamiła žonka palitviaźnia Alesia Bialackaha Natalla Pinčuk, Aleś atrymaŭ rašeńnie suda Pieršamajskaha rajona Minska ad 29 sakavika 2012 h. (sudździa Volha Michajłaŭna Bahamja, pry ŭdziele pradstaŭnikoŭ inśpiekcyi Ministerstva padatkaŭ i zboraŭ taho samaha rajona Sobalevaj, Todryk i Kartašovaj) «ab spahnańni pieni» ŭ sumie 140 266 151 rub. i dziaržaŭnaha myta 7 013 307 rub. U rašeńni jość słovy: «Otvietčik na sudiebnoje zasiedanije nie javiłsia».
Nahadajem, što pavodle prysudu ad 24 listapada 2011 h. Aleś Bialacki zasudžany na čatyry z pałovaj hady kałonii ŭzmocnienaha režymu, spahnańnie kampiensacyi nibyta naniesienaj «škody dziaržavie» sumaj 721 454 017 rub. i dziaržaŭnaj pošliny 36 072 700 rub.Hrošy dziakujučy składkam amal 800 čałaviek byli całkam spłačanyja da razhladu kasacyjnaj skarhi, adnak heta nie paŭpłyvała na razhlad spravy ŭ sudzie vyšejšaj instancyi.
Farmalna źjaŭleńnie novych hrašovych pretenzij da Alesia Bialackaha — praz 4 miesiacy paśla vyniasieńnia prysudu — tłumačycca tym, što nibyta nie spłačanyja pieni za praterminavanuju spłatu padatkaŭ. Adnak jurysty zadajuć spraviadlivaje pytańnie, a čamu ž hetyja pieni nie byli ŭklučanyja ŭ prysud ad 24 listapada.
Natalla Pinčuk miarkuje, što heta novaja sproba cisku na Alesia. U intervju Radyjo Svaboda jana zajaviła: «Vidavočna, sprava Alesia nie vyrašana. Toje, što pa prysudzie było spłačana, heta, jak bačym, nie było kančatkovym. Heta novaje rašeńnie moža havaryć ab tym, što mohuć być pryniatyja novyja i novyja rašeńni, jakija mohuć uskładniać situacyju Alesia».
Žonka palitviaźnia źbirajecca asprečvać niezakonnaje, na jaje dumku, rašeńnie ŭ sudzie.
Ciapier čytajuć
U Poznani hiniekołah vydaliŭ 24‑hadovaj biełaruscy matku i jaječniki bieź jaje zhody. Jamu pahražaje da 20 hadoŭ turmy11
Kamientary