U kancy krasavika — pačatku maja ŭ Biełarusi prahnazujecca rezki rost kolkaści pakusanych klaščami. Pra heta paviedamiła ŭrač-entamołah adździeła epidemijałohii Respublikanskaha centra hihijeny, epidemijałohii i hramadskaha zdaroŭja Śviatłana Jaškova 26 krasavika na pres-kanfierencyi ŭ Minsku.
Pavodle jaje słoŭ, tradycyjna na maj prypadaje siezon najbolšaj aktyŭnaści klaščoŭ, jakija pieranosiać łajm-barelijoz i kleščavy encefalit. Sioleta rostu aktyŭnaści klaščoŭ spryjaje rezkaje paciapleńnie. Akramia taho, ludzi bolš aktyŭna pačali vyjazdžać na pryrodu: pačaŭsia siezon pajezdak na dačy i piknikoŭ. Takim čynam, najbližejšym časam spačatku ŭ niekalki dziasiatkaŭ razoŭ uzraście kolkaść pakusanych klaščami, a zatym budzie adznačany ŭzdym zachvorvańnia ŭ vyniku pieraniesienych imi infiekcyj, prahnazuje śpiecyjalist. Pavodle jaje słoŭ, niepaśpiachovymi ŭ epidemijałahičnych adnosinach pa kleščavym encefalicie źjaŭlajucca 76% terytoryi Biełarusi, pa łajm-barelijozie — 92%.
Jak paviedamiła Jaškova, sioleta ŭ suviazi z rańnim schodam śniehu ŭ paŭdniovych rehijonach pačatak aktyŭnaści klaščoŭ prypaŭ na dekadu raniej, čym letaś. Usiaho za sakavik u Biełarusi ad ukusaŭ klaščoŭ paciarpieła 49 čałaviek, u tym liku 23 dziciaci. Heta hałoŭnym čynam žychary Bresckaj i Hrodzienskaj abłaściej. Pieraniesienych klaščami zachvorvańniaŭ — łajm-barelijozu i kleščavaha encefalitu — pakul sioleta nie adznačana. Rehistrujecca tolki 76 vypadkaŭ łajm-barelijozu, zaražeńnie jakim adbyłosia letaś.
Za 2011 hod u Biełarusi byŭ zarehistravany 1 tys. 71 vypadak zachvorvańnia na łajm-barelijoz i 106 vypadkaŭ kleščavaha encefalitu, vyklikanych klaščami. Kleščavy encefalit taksama moža pieradavacca praz małako, asabliva ŭ viasieńni čas. Letaś u Asipovickim rajonie była adznačana vialikaja ŭspyška: kleščavym encefalitam zachvareła siamja z šaści čałaviek, jakaja ŭžyła niaparanaje małako kazy.
Pavodle słoŭ Jaškovaj, usiaho letaś u suviazi z ukusami klaščoŭ u Biełarusi da miedykaŭ źviarnulisia bolš za 48 tys. čałaviek, u tym liku bolš jak 13 tys. dziaciej.
Śpiecyjalist nahadała pra miery prafiłaktyki ŭkusaŭ klaščoŭ. Vychodziačy na pryrodu, treba maksimalna zakryvać cieła adzieńniem i prymianiać repielenty.
Kožnuju
hadzinu-dźvie varta ahladać adkrytyja ŭčastki cieła. Kali vyjaŭleny klešč, to možna vydalić jaho samastojna, a miesca ŭkusu apracavać rastvoram z utrymańniem śpirtu. Kali vydalić kryvasmoka nie atrymlivajecca, treba źviarnucca ŭ traŭmapunkt ci palikliniku pa miescy žycharstva. U lubym vypadku nieabchodna prakansultavacca z uračom adnosna prafiłaktyki infiekcyj, jakija pieranosiać klaščy.
BiełaPAN
Chočaš padzialicca važnaj infarmacyjaj ananimna i kanfidencyjna?
Pišycie redaktaru «Našaj Nivy» ŭ TH
