Litesound u pralocie, choć i adyhraŭ narmalna abnaŭlajecca + videa ŭsich piesień 69

Takim čynam, z udmurckimi babulami ŭ finale sustrenucca:

Litva — udzielnik «Słavianskaha bazara» skaryŭ jašče i Jeŭropu,

Bośnija i Hiercahavina — bek-vakalistka akazałasia lepšaj za svajho vakalista,

Sierbija — jeŭrapiejcy dali Želku druhi šaniec,

Ukraina (+ Konha dva ŭ adnoj) — usio ž taki vakał u Hajtany cudoŭny,

Šviecyja — stylova, choć i nie druhaja Abba,

Makiedonija — rok časoŭ SEV i Varšaŭskaj damovy pasłuchajem jašče raz,

Narviehija — tut usie šancy na internacyjanalny chit,

Estonija — krunerskaje majsterstva acanili, ale ci jość šancy?

Malta — a voś i naš hałoŭny supiernik padciahnuŭsia,

Turcyja — usio ž taki ŭschodnija rytmy pracujuć…

A Łajtsaŭnd u pralocie. Choć i adyhrali chłopcy karektna. Biełaruś nie vyjšła, choć šancy byli. Što ž, mo ŭ nastupnym hodzie pašluć niešta nacyjanalna-biełaruskaje ŭrešcie.

* * *

Siońnia adbyvajecca druhaja častka «Jeŭrabačańnia». Suajčyńniki z Litesound sprabujuć upeŭnić Jeŭropu ŭ tym, što jany — hieroi, sierb Želka Joksimavič budzie imknucca źmianić druhoje miesca na pieršaje, ukrainka/kanhalezka Hajtana papularyzuje narodnyja stroi, a 15 inšych śpievakoŭ taksama znojduć, čym ździvić. Hladzim Jeŭrabačańnie razam z «Našaj Nivaj».

Sierbija

Želka Joksimavič

Nije ljubav stvar

Multyinstrumientalist ź Sierbii šturmuje «Jeŭrabačańnie» ŭžo druhi raz — u 2004 hodzie jon dabraŭsia da druhoha miesca, pra što niekatoryja krainy tolki marać. Adnak, z usich adzinaccaci instrumientaŭ, jakimi vałodaje Joksimavič, u pieśni vykarystoŭvajecca adzin rajal. Śpiavaje Joksimavič pa-sierbsku, i hetahučyć vydatna, choć i nazva pieśni ŭsiaho tolki «Kachańnie — nie reč».

Makiedonija Kaliopi

Cerno i belo

A voś jašče adzin vieteran estrady — makiedonskaja śpiavačka Kaliopi, jakaja śpiavaje z 1976 hoda (na fonie brytanskaha ŭdzielnika Champierdzinka jana, kaniečnie ž, małady vykanaviec). Na radzimie Kaliopi — sapraŭdnaja zorka. U jaje bolš za dziesiać albomaŭ i ŭsienarodnaja luboŭ. Pieśnia pra «čornaje i biełaje» pačynajecca jak čarhovaja bałada pad kłavišy, ale praciahvajecca ŭ rokavym klučy. Praŭda, heta rok 80-ch z krain SEV. Hrošy na jaje stavić nie raim.

Niderłandy

Džaan Franka

You and me

Dziaŭčyna ŭ indziejskim stroi śpiavaje pad akustyčnuju hitaru, da jakoj paśla dadajecca kantry-bend z bandža i pierkusijaj. Džaan Franka nahadvaje śpiavačku Džaan Baez — instrumienty, miełodyka, styl i navat imia. Ź inšaha boku kantry-fołk na «Jeŭrabačańni» pačuješ redka. Prynamsi, nie tak časta, jak bałady pad rajal. Druhoje retra za dva dni — jość mierkavańnie, što jana paŭtoryć sumny los izrailskich kankursantaŭ — a škada.

Malta

Kurt Kaleja

This is the night

Pra śpievaka z Malty pakul viadoma adno — jon dvojčy sprabavaŭ trapić na «Jeŭrabačańnie» i jon vielmi padobny na rasijskaha šoumena Ivana Urhanta. Pa hučańni Kurt — najbližejšy kankurent Litesound: toj samy sučasny pop-rok, jaki hučyć na radyjo ŭ miežach 25% zamiežnaj muzyki. Pieśnia maje chitovy patencyjał, i zmahacca biełarusam daviadziecca ŭ pieršuju čarhu ź im.

Biełaruś Litesound

We're the Heroes

A voś hałoŭnaja intryha viečara dla žycharoŭ Biełarusi.

Z čym nam nie pašancavała? Z Maltaj — kali b pierad «Łajtsaŭndami» vystupiła jakaja-niebudź dziaŭčyna z baładaj, było b praściej — a vystupać ź pieśniaj ŭ tym ža styli adrazu paśla ciažka. U mieładyčnym płanie ŭ Biełarusi šancaŭ bolej, a voś pa akcencie my prajhrajem. Tym nie mienš, u rešcie rešt, Biełaruś dasłała na konkurs kahości, chto sočyć za muzyčnaj modaj i kaho lubiać na Radzimie biez płanavaha raspaŭsiudu kvitkoŭ. Chłopcy jany nieadnazančnyja, reputacyja ŭ ich skandalnaja, ale ŭjavić hetuju pieśniu na jakim-niebudź jeŭrapiejskim pop-kanale całkam možna. U finale pasłuchajem jašče raz. Na ščaście, braty na scenie nie bilisia…

Partuhalija

Filipa Soza

Vida Minha

Voś paśla kaho biełarusam było b dobra vystupić. Partuhalija zachoŭvaje svaje tradycyi — mienavita takaja muzyka tam zaŭždy hučała, hučyć i budzie hučać. Možna paspračacca, što 12 bałaŭ ad Rasii jana atrymaje. Reč u tym, što popytam u Rasii takaja muzyka karystajecca jak nidzie. Heta jak śpiavačka Łalita Tores, jakuju ŭ SSSR viedali ŭsie, a ŭ rodnaj Ispanii amal nichto.

Ukraina Hajtana

Be my Guest

Baćka Hajtany pryjechaŭ z Konha, dzie i sama śpiavačka peŭny čas žyła. Mahčyma, hetym tłumačycca jaje zachapleńnie afra-rytmami i miełodyjami. Voś jaje pieśnia, naprykład, maje absalutna soŭłavuju vakalnuju partyju, što ŭžo zrabiła jaje chitom u niekatorych krainach. Pry hetym vielmi pryjemna bačyć ukrainski vianok, čuć jeŭrapiejskija rytmy i «čorny» soŭłavy hołas adnačasova — prosty šlach u finał.

Bałharyja

Safi Marynava

Love Unlimited

Samaje ciažkaje ŭ takich konkursach jak «Jeŭrabačańnie» — vytryvać niejmaviernuju kolkaść pieśniaŭ pra kachańnie. Inšy vypadak — kali jany na roznych movach. Voś i bałharka Safi Marynava śpiavaje pra kachańnie pa-bałharsku. Sama śpiavačka maje cyhanskaje pachodžańnie, adnak cyhanskich rytmaŭ u pieśni niama — heta typovaja elektronika, paśla jakoj Litesound vyhladaŭ by idealna. Naŭrad ci my jaje pačujem u subotu.

Słavienija

Jeva Bota

Verjamem

Pad siaredzinu siońniašni paŭfinał hublaje pačatkovy zapał — druhaja zapar pieśnia hučyć druhasna. Adna radaść, što abiedźvie — na nacyjanalnych movach. Kali vieryć internetu, to ŭ Jevy Bota ŭ Słavienii ŭ lubym vypadku vialikaja budučynia.

Charvatyja

Nina Badryč

Nebo

Nina Badryč taksama nie raz sprabavała trapić na «Jeŭrabačańnie», ale pašancavała tolki sioleta. Ad papiarednich vykanaŭcaŭ jana adroźnivajecca pryjemnym hołasam ź ledź zaŭvažnaj chrypinkaj, što nadaje jaje akustyčnaj pop-soŭł pieśni pryjemnaje adcieńnie. Śpiavaje Nina ad 1995 hoda, da taho pracavała kasirkaj u banku. I pravilna robić, što śpiavaje — na zajzdraść finskim handbalistkam.

Šviecyja Łoryn

Euphoria

Kožnaje «Jeŭrabačańnie» — dobraja mahčymaść pazajzdrościć i adnačasova paspačuvać šviedam. Pazajzdrościć — bo mienavita ad ich u svoj čas pieramahli adzinyja suśvietnyja pop-kumiry AVVA. Paspačuvać — bo bolej tak nie ŭdajecca. Śpiavačka Łoryn maje marakanska-bierbierskaje pachodžańnie, ekzatyčny vyhlad, ale pry hetym niejkuju zusim užo zvyčajnuju pieśniu. A ad šviedaŭ dahetul čakajuć čaho-niebudź «hetkaha».

Hruzija

Anry Džachadze

I'm a Jocker

Džachadze śpiavaje na hruzinska-anhlijskaj miašancy, z sapraŭdnym hruzinskim barytonam, adnak aranžyroŭka pieśni nie vytrymlivaje krytyki. Sioleta ŭvohule bahata niajakasnych aranžyrovak. Pry hetym niaroŭnaja miełodyja, u jakoj sustrakajucca sapraŭdnyja siurpryzy, uražvaje. Ledź nie fank hučyć miescami. U finał pieśnia moža trapić — adnak nie bolej za toje.

Turcyja

Džan Banoma

Love me Back

Turcyja jak i Partuhalija — muzyčnaja tradycyja tut nastolki mocnaja, što jakuju b pieśniu dla jakoha konkursu ci prosta tak tut nie stvarali, zaŭždy zdahadvaješsia, što pačuješ. Tyja, kamu padabajucca arabskija mieładyčnyja zihzahi i vytančanyja miełodyi ŭschodniaha śvietu, vielmi aceniać hety numar.

Estonija

Ota Lepłend

Kuula

Jak by hučaŭ Džordž Majkł, kali b śpiavaŭ pa-estonsku — niešta padkazvaje, što mienavita tak. U Lepłenda taksama staž śpievaŭ hadoŭ piatnaccać. Usio heta zroblena vielmi prafiesijna i pad abaviazkovy rajal, ale, voś dziva: nie čaplaje. Uźnikaje kramolnaja dumka, što biełarusy b hladzielisia lepiej na lubym miescy, aproč jak pobač z Maltaj.

Słavaččyna

Maks Džejsan Mej

Don't Close Your Eyes

Voś, spadarstva, typovy prykład kamiercyjnaj ciažkaj muzyki — dzie pamiž barabannymi źbiŭkami źjaŭlajecca miełodyja, źjaŭlajecca ciažkaja hitara, rezki bas, i na nivie jakoj užo daŭno i plonna pracujuć dziasiatki viadomych hurtoŭ. Heta nie značyć, što tak ihrać drenna, naadvarot. Voś na YouTube idzie vialikaja sprečka — «nie pieramohuć, bo pieramahaje nie muzyka, a šou, a tut charošaja muzyka» suprać «kali pieramohuć — nikoli bolš nie ŭkluču Jeŭra». I, darečy, sapraŭdnaje imia vykanaŭcy — Mira Šmajda.

Narviehija Tudžy

Stay

Kali vy zaŭvažyli, to siońnia na «Jeŭrabačańni» prosta aryjentalny dzień: voś i narviežski śpiavak Tudžy maje iranskaje pachodžańnie. I miełodyja ŭstupu adniekul z tych ža krajoŭ, a paśla źjaŭlajecca elektronnaja siekcyja, jakaja nahadvaje pra chity hetak siaredziny nulavych. Tym nie mienš takaja muzyka z pośpiecham hučyć na dyskatekach ad fjordaŭ Narviehii da sadovaha tavarystva «Kiraviec» pad Minskam. Tamu šancy na finał u Tudžy jość.

Bośnija i Hiercahavina

MayaSar

Korake Ti Znam

I tut u chmyźniakach apynuŭsia rajal — u sensie, jašče adna fartepijannaja bałada, ciapier na baśnijskaj movie i z nazvaj «Ja paznaju tvaje kroki». Nu jak možna abjektyŭna vybrać ź vialikaj kolkaści kłavišnych baład? Ale, zdajecca, ź siońniašnich — jana najlepšaja. Darečy, sama śpiavačka rehularna vystupaje ź Dzina Merlinam, jaki biez asablivaha pośpiechu ŭdzielničaŭ u Jeŭrabačańni 2011 hoda.

Litva

Doni Monteł

Love is Blind

I zakryvaje druhi paŭfinał litoviec Doni Monteł. Jon śpiavaje pra toje, što kachańnie — ślapoje i vystupaje z zaviazanymi vačyma. Darečy, vielmi zručna. Da siaredziny pieśnia była baładaj pad zdahadajciesia jaki instrumient, ale dalej padklučyłasia rytm-siekcyja, i stała viesialej. Tym nie mienš, kali Doni Monteł trapić u finał, to da pieršaha miesca naŭrad ci dabiarecca.

Padsumoŭvajučy pramiežkavyja vyniki, možam ščyra skazać: pa-pieršaje, u druhim paŭfinale jaŭnych favarytaŭ nie było, jak naprykład «Babuli» ŭ pieršym, pa-druhoje, jak by chto ni staviŭsia da Litesound, ale ŭ pieršuju piaciorku pa ŭzroŭni ich možna brać śmieła, pa-treciaje — jak z hetych ludziej možna abrać ažno dziesiać čałaviek, ujavić składana — ale dačakajemsia vynikaŭ.

Juraś Uskoŭ

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH