Na Andreja Moŭčana skłali dva pratakoły 2

U dačynieńni da źbitaha supracoŭnikami pravaachoŭnych orhanaŭ aktyvista kampanii «Jeŭrapiejskaja Biełaruś» Andreja Moŭčana ŭ haradskim adździele milicyi Pieršamajskaha rajona 28 maja skłali dva pratakoły.

Jak paviedamiŭ Moŭčan, u milicyi jaho apytali ab padziejach, što adbylisia ź im 19 maja, a zatym dali padpisać dva pratakoły ab administracyjnych pravaparušeńniach. «Adzin pratakoł skłali na padstavie artykuła 17.1 KoAP, što ja „łajaŭsia matam“, a druhi — na padstavie artykuła 23.34 (niezakonnaje pikietavańnie). Ja pacikaviŭsia, što sa mnoj budzie dalej, u adkaz mnie skazali čakać pozvu», — zaznačyŭ aktyvist.

Kažučy pra svaje dalejšyja dziejańni, Mołčan paviedamiŭ, što budzie praciahvać lačycca. «

Treba niejak bolš-mienš adnavić zdaroŭje. Aprača taho, budu zajmacca vučobaj — u červieni pačynajecca siesija, vielmi šmat pracy», — skazaŭ jon.

Jak paviedamlałasia raniej, aktyvist byŭ zatrymany milicyjaj 19 maja kala ŭniviersama «Pieršamajski». U znak salidarnaści sa źniavolenym viciebskim apazicyjanieram Siarhiejem Kavalenkam jon razharnuŭ bieł-čyrvona-bieły ściah, i praź niekalki chvilin da jaho padjechała mašyna z supracoŭnikami milicyi. Paśla taho jak Moŭčan pacikaviŭsia, za što jaho zatrymlivajuć, supracoŭniki milicyi pačali jaho źbivać. Pavodle infarmacyi śviedak, Andreja źbivali i na vulicy, i ŭ mašynie — pra heta jon paśpieŭ paviedamić pa telefonie svajoj siastry, kali znachodziŭsia ŭ milicyi. U adździaleńni siastry paviedamili, što ŭ dačynieńni da zatrymanaha źbirajucca raspačynać kryminalnuju spravu za abrazu prezidenta i źbivańnie supracoŭnika milicyi pry vykanańni.

Pieršapačatkova ŭračy zafiksavali ŭ źbitaha Moŭčana nie tolki čerapna-mazhavuju traŭmu, ale i pierałom skivicy.

Adnak 23 maja doktar skazaŭ Moŭčanu, što pierałom skivicy ŭ jaho stary. Andrej śćviardžaje, što nijakaha pierałomu skivicy raniej u jaho nie było. 25 maja Moŭčana vypisali z balnicy z aficyjna ŭstanoŭlenym dyjahnazam «čerapna-mazhavaja traŭma», dalejšaje lačeńnie jamu prapanavali prachodzić u paliklinicy.

Alaksiej Areška, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH