Akreścina nie pustuje. Termin za terminam atrymlivajuć aktyvisty Maładoha Frontu — pratestavaj, non-kanfarmisckaj arhanizacyi moładzi.
Paśla zakančeńnia apošniaj adsiedki maładafrontaŭcy navat nie vyjšli samastojna za ścieny izalatara — ich adrazu pryvieźli ŭ samy spraviadlivy sud na śviecie i dali novyja «sutki».Zhodna z pratakołami, usio vyhladaje zakonna: vyzvaliŭsia, vyjšaŭ ź CIP niezaŭvažanym paplečnikami, jakija stajali la dźviarej, pajechaŭ u Malinaŭku, maciuknuŭsia — i znoŭ na Akreścina ŭ izalatary.
Dziažurnyja ź CIP i RUUS na pytańni rodnych i siabroŭ zatrymanych chałodnym hołasam adkazvajuć: «Osvobodiłsia po vriemieni».Na pytańnie, ci bačyli vy jaho na vychadzie, kožny dziažurny daje dasłoŭna taki samy adkaz, niekatoryja, praŭda, apuskajuć vočy dołu.
Na sudzie nad Źmitrom Kramianieckim chadajnictva advakata ab prahladzie videa z kamier zadavolili, ale heta nie ŭratavała Źmitra ad nastupnaha terminu, bo ŭ hety dzień videakamiery staličnaha izalatara... «nie pracavali».
Junakoŭ vinavaciać u adnym i tym ža — brydkasłoŭi, prysudžvajuć adnolkavyja 10 sutak aryštu, i ŭ samaj česnaj prakuratury śvietu hetyja fakty nie vyklikajuć ździŭleńnia.
Jak raspavioŭ adzin z zatrymanych praz advakata, supracoŭniki KDB padčas dopytaŭ u Centry izalacyi adkrytym tekstam paviedamili maładafrontaŭcam: «Budziecie siadzieć, pokul nie źjedzie Pucin!»
«Zakładniki ŭ centry Jeŭropy», — piša pra situacyju sajt mfront.net.
* * *
Administracyjnyja aryšty adbylisia:
Raman Vasiljeŭ asudžany 15.05 na 12 sutak, 26.05 — na 12;
Uładzimir Jaromienak asudžany 17.05 na 7 sutak, 24.05 — na 10;
Źmicier Kramianiecki asudžany 15.05 na 10 sutak, 25.05 — na 10;
Michaś Muski asudžany 9.05 na 10 sutak, ź izalatara jaho advieźli ŭ vajskovuju čaść pad Lepielem, dzie jon budzie słužyć;
Mikoła Dziemidzienka 27.04. asudžany na 15 sutak, za kratami trapiŭ u balnicu i ŭ jaho nieadbytymi zastajucca 3 sutak.
