Upieršyniu na Akreścina adpravili palitołaha

U budynku byłoha Liceja prajšoŭ čarhovy cyničny palityčny praces.

Da abiedu z Akreścina dastavili ŭ sud akademičnaha dyrektara Biełaruskaha instytuta stratehičnych daśledavańniaŭ (BISS) Alaksieja Pikulika. Źleva — kletka, ale Pikulik siadzić nie ŭ kletcy, a na łavie.

Sudzić Pikulika sudździa Jakunčychin — čarniavy, łysiejučy mužčyna hadoŭ 35-ci, ź ziamlistym tvaram i stomlenymi, niavyspanymi vačyma. Sakratarkaj u sudzie vysokaja pryhožaja dziaŭčyna ŭ čornych łasinach.

Śviedkami vystupajuć Alaksiej Haroška i Alaksiej Karpovič, jakija słužać u Pałku milicyi śpiecyjalnaha pryznačeńnia.

U jakaści śviedki vystupiła mama Alaksieja Pikulika, jakaja adznačyła supiarečnaści ŭ pakazańniach milicyjantaŭ.

U sudzie abvieščany pierapynak.

Na pracesie prysutničajuć kalehi Alaksieja, niekalki žurnalistaŭ, a taksama mama i tata Pikulika. Alaksiej trymajecca badziora i z honaram.

• * *

Pasiedžańnie adnaviłasia kala 17.20.

Sudździa nudnym hołasam, ź intanacyjami jak u telesudach, začytvaje pratakoły i vypisku z rehistra administratyŭnych parušeńniaŭ. Heta ŭžo siomy pratakoł na Pikulika za hety hod (papiarednija byli składzienyja DAI za pieravyšeńnie chutkaści ruchu). Jon u nas staŭ prafiesaram-recydyvistam.

Advakat chadajničaje prasić ab pakazańniach kamier nazirańnia italjanskaha pasolstva, kala jakoha adbyvałasia zatrymańnie Pikulika i dałučyć infarmacyju pra adukacyju, doktarskuju stupień i pracoŭnyja rehalii Pikulika.

Sudździa adchilaje hetyja chadajnictvy.

Pikulik nazyvaje sud sumieśsiu Kafki i «Alisy ŭ krainie cudaŭ». Prosić apraŭdać jaho abo dać štraf, «bo Pucin užo vyjechaŭ».

Kaža, što nie moh razmachvać rukami, bo nios dźvie ciažkija sumki.

«Vy kažacie, što nie razmachvali rukami, a sami pry hetym žestykulujecie», — ź niepaŭtornaj intanacyjaj cicha zaŭvažaje sudździa.

«Heta tamu, što ja čatyry z pałovaj hoda pravučyŭsia ŭ Italii», — adkazvaje Pikulik.

Advakatka biez asablivaj nadziei nahadvaje ab prezumpcyi nievinavataści, prosić zaprasić śviedkaŭ-hramadzianaŭ, a nie milicyjantaŭ, jakija b bačyli, jak Pikulik «łajaŭsia matam i razmachvaŭ rukami», jak śćviardžajuć milicyjanty.

Jašče adzin pierapynak — dla vyniasieńnia rašeńnia.

* * *

Sud paličyŭ vinu dakazanaj. Prysud — aryšt na 5 sutak. Ślozy na vačach mamy Alaksieja. Alaksieja paviali ŭniz, u sini bobik.

Z saboj jamu dazvolili ŭziać ciopłyja rečy.

U Biełarusi za łajanku sadzili apazicyjnych palitykaŭ, žurnalistaŭ, pravaabaroncaŭ. Upieršyniu na sutki adpravili palitołaha.

• 0
• 0
• 0
• 0
• 0
• 0
• 0
• 0