U mianie nijak u hałavie nie ŭkładvajecca, čamu parłamienckija vybary, jakija ŭsie ličać fikcyjaj, vyklikajuć takuju niervovuju reakcyju siarod apazicyjna nastrojenych biełarusaŭ.
Vybary jašče nie pryznačanyja, a biełaruskaja apazicyja ŭžo raskałołasia na tych, chto budzie ŭdzielničać u vybarach, i tych, chto zaklikaje ich bajkatavać. Pryčym, i tyja, i druhija ličać vybary ŭ Biełarusi farsam.
Paśla 1996 hoda ŭsie biełaruskija vybary byli farsam — i prezidenckija, a parłamienckija, i vybary ŭ miascovyja saviety.
Apazicyja vykarystoŭvała roznuju taktyku padčas vybarčych kampanij za minułyja 16 hadoŭ — ad poŭnaha bajkotu parłamienckich vybaraŭ da varjackaha i biazdumnaha ŭdziełu natoŭpu apazicyjnych kandydataŭ u apošnich prezidenckich vybarach. Ničoha nikoli apazicyi nie dapamahała.
Mianie ździŭlaje isteryja vakoł vybaraŭ u pałatku, jakaja razyhryvajecca ciapier. Zaŭziatyja vorahi ŭłady nasamreč viaduć baraćbu nie z režymam, a adno z adnym. Takoha patoku abraz, jarłykoŭ i hłupstvaŭ z vusnaŭ adnych apazicyjanieraŭ u adras inšych ja nie čytaŭ i nie čuŭ daŭno. Niby ŭsie zvarjacieli.
Pravodziać zakrytyja kruhłyja stały, vyhaniajučy žurnalistaŭ. Potym bjucca za začynienymi dźviaryma i dajuć adno adnamu padsračniki. U internecie złość zalivaje ŭsie forumy i sajty.
Spyniciesia, tavaryšy revalucyjaniery. Apamiatajciesia. Azirniciesia vakoł. Padumajcie i vyrašycie, što vam rabić.
Ja, naprykład, suprać bajkotu parłamienckich vybaraŭ. Ja ŭpeŭnieny, što apazicyja pavinnaja ŭdzielničać u parłamienckaj kampanii. Ale…
Lubyja vybary — heta palityčny praces, u jakim hałasavańnie — tolki finalny akord ci farmalnaść, jakaja zaviaršaje doŭhuju pracu.
Kali vy hetuju pracu zrabili dobra, to atrymajecie dobry vynik, kali ničoha nie rabili, to i na vybarach vam ničoha nie śviecić. Tak adbyvajecca ŭ demakratyčnych dziaržavach. Heta spraviadliva i dla dyktatarskich režymaŭ, jakim jość palityčny režym u Biełarusi.
Vybary — heta akt hramadzianskaj salidarnaści i hramadzianskaj mabilizacyi, kali ludzi achoplenyja ahulnaj idejaj, razam pracujuć na vynik, bačać i ciahnucca da svaich lidaraŭ i delehujuć im svaju siłu i svoj davier. Tamu ludzi i paŭstajuć suprać tych, chto sprabuje skraści ŭ ich hałasy. Kali vybaraŭ niama ci vaša partyja ŭ ich nie ŭdzielničaje, to i padstavy dla paŭstańnia niama.
Vybarčaja kampanija — heta palityčny praces, raściahnuty na miesiacy. Apazicyjnyja partyi farmulujuć i vystaŭlajuć uładam svaje patrabavańni abo ŭmovy ŭdziełu ŭ vybarach. Ich moža być niekalki: vyzvaleńnie palityčnych źniavolenych, dopusk pradstaŭnikoŭ partyj u vybarčyja kamisii i, naprykład, prazrystyja skryni dla hałasavańnia.
Pad hetymi ŭmovami padpišucca i Jeŭropa, i Rasija. Ihnaravańnie hetych umovaŭ biełaruskaj uładaj tolki ŭzmocnić jaje izalacyju.
Čaho damahajecca apazicyja ŭ Biełarusi? Zrynańnia tyranii! Dla hetaha nieabchodna pašyrać bazu prychilnikaŭ i rychtavać mabilizacyju dla rašučaha boju.
Vybary dazvalajuć apazicyi adkryta pravodzić pikiety i pastukacca litaralna ŭ kožnuju kvateru, zajści ŭ kožny dom biez pahrozy nieadkładnaha aryštu.
Chadzicie, stukajciesia, raskazvajcie ludziam pra siabie, dakazvajcie, što vy lepšyja, čym Łukašenka i jaho dzieci.
Paralelna viadzicie dyjałoh z uładaj, patrabujučy vykanańnia sfarmulavanych vami ŭmovaŭ. Vybary — jašče adna vydatnaja nahoda dla kansalidacyi i abjadnańnia pabitych i źniavažanych apazicyjnych sił.
Ale kali ŭłada ihnaruje vašyja patrabavańni, kali jana praciahvaje kraści ŭ vas navat słaby šaniec na pieramohu, to tady vy z čystym sumleńniem možacie admovicca ad udziełu ŭ vybarach za tydzień abo za miesiac da hałasavańnia. Tamu što šancaŭ trapić u parłamient, ja liču, niama nijakich i ni ŭ koha. Chto dumaje inakš, toj naiŭny čałaviek. Adnak my hulajem nie ŭ vybary, my hulajem u bolš składanuju i niebiaśpiečnuju hulniu, u jakoj vybary — tolki adzin z chadoŭ.
Udzielničać u parłamienckich vybarach biez
Ułada imkniecca zrabić usio, kab apazicyja praihnaravała vybary.Ale Łukašenka chitrejšy, čym mnohija pra jaho dumajuć. Režymu nie treba, kab usia apazicyja bajkatavała vybary. Śpiecsłužby ciapier robiać usio, kab raskałoć apazicyjanieraŭ, kab častka kryčała pra bajkot, a druhaja častka pad plaŭki i ululukańnie tavaryšaŭ pa baraćbie z fašyzmam išła na vybarčyja ŭčastki.
My zabyvajem pra toje, što ŭ Biełarusi vybary prachodziać nie pa partyjnych śpisach. Vybary mažarytarnyja, i ŭłada zaŭsiody znojdzie 400 pravieranych kandydataŭ ź liku dajarak i dajaraŭ.
Bajkot tolki daść Łukašenku ideałahičnyja kozyry. Ja litaralna čuju, jak jon kaža panu Sikorskamu: «A ja tut pry čom? Ani, dziebiły, sami atkazaliś ici, vot puść cipier i małčat! Eta ž vašy varšaŭskija biehłyja apazicyaniery vodu mucili, vot sami ź nimi i raźbirajcieś!» I Sikorskamu niama čaho budzie adkazać.
Chto zaklikaje da bajkotu?
Maładyja ramantyki. Moładź rviecca ŭ boj, joj chočacca dać boj apošni i rašučy. Ciapier ja baču novaje pratestnaje pakaleńnie. Adsiedzieŭšy svaje 15 sutak, hetyja ramantyki ličać siabie sapraŭdnymi revalucyjanierami i ŭpeŭnienyja, što da ich žyćcia i baraćby ŭ Biełarusi nie było.
Jany hladziać, naprykład, na mianie, sarakahadovaha žurnalista, jaki kaliś trojčy traplaŭ ŭ zaścienki Łukašenki, jak na staroha i nikčemnaha pierduna. Hety zrazumieła i paciešna. Jany pryhožyja ŭ svaim paryvie. My pavinnyja bierahčy ich, nie kidać tupa na ambrazury, heta našaja budučynia.
Nie choča ŭdzielničać u vybarach i taja častka darosłaha nasielnictva, jakaja stamiłasia ad imitacyi apazicyjnaj dziejnaści i nastojvaje na čymści hieraičnym i jarkim.
Za bajkot vystupaje našaja emihracyja. Siedziačy ŭ Łondanie i Varšavie (viadoma, i ŭ Maskvie) pabityja ŭładami apazicyjaniery prahnuć revanšu, pychajuć nianaviściu da Łukašenki. Jany vostra i baluča pieražyvajuć razryŭ z radzimaj i chočuć novaj revalucyi. Toje, što jany sami nie zmahli hetuju revalucyju zrabić, ich nie biantežyć.
Bajkatavać parłamienckija vybary zaklikajuć, praŭda, i palityki, jakija zastalisia ŭ Biełarusi. Jak praviła, heta tyja, u kaho niama nijakich resursaŭ — ni finansavych, ni čałaviečych — dla praviadzieńnia paŭnavartasnaj kampanii. Naprykład, suprać vybaraŭ — Us. Heta zrazumieła, tamu što jamu asabista ničoha nie śviecić, vakoł jaho jość para niejkich pałkoŭnikaŭ u adstaŭcy, ale na idei bajkotu jon moža zarabić reputacyju śmiełaha i bieskampramisnaha.
Rymašeŭski vystupaje za bajkot? Jamu naohuł varta maŭčać i malicca, malicca i zamolvać svaje palityčnyja hrachi. Jon addaŭ ahulnuju spravu vosieńniu 2010 hoda, kali svaje asabistyja ambicyi pastaviŭ vyšej za ahulnyja intaresy.
Takija ž zdradniki i ŭsie tyja, chto vystaŭlaŭ svaju kandydaturu na prezidenckich vybarach. Jany nie źviarnuli ŭvahi na našyja prośby pra adzinaha kandydata, jany papierlisia na vybary biez šancu na pośpiech. I słuchać ich ciapier ja asabista nie chaču. Ich apraŭdvaje tolki toje, što niekatoryja kandydaty i ich pamočniki zapłacili vielmi vysokuju canu za svaje ambicyi. Kryvažernaść Łukašenki vyratavała ich palityčnuju reputacyju.
Paŭtara hoda ja nie dazvalaŭ sabie ničoha krytyčnaha ŭ adras byłych kandydataŭ u prezidenty, ale napiaredadni čarhovaj kampanii ja nie chaču, kab jany znoŭ zaduryli nam hałavu.
Viktar Ivaškievič patrabuje bajkotu. Ale Viktar, ź jakim u mianie dobryja asabistyja adnosiny, pravaliŭ za apošni čas stolki akcyj, što pavinien ździejśnić niešta nievierahodnaje, kab viarnuć sabie prava vieści kudy b tam ni było narod. Adny hetyja biessensoŭnyja Narodnyja schody čaho kaštujuć.
Ci jość sens u bajkotu?Ci jość šaniec pieranieści na vulicy abureńnie ź internetu? Chto budzie arhanizoŭvać bajkot i ŭ čym jon budzie vyjaŭlacca? Pavieł Znaviec napisaŭ, što bajkot — «heta ŭlotki, haziety i hetak dalej». Tak što «hetak dalej»? Rasšyfruj, patłumač. Ale niama ničoha za hučnymi słovami «tak dalej».
Hod tamu padčas «maŭklivaj revalucyi» ja abryvaŭ telefony apazicyjnych lidaraŭ, prasiŭ ich padtrymać moładź, jakaja vyjšła na vulicy i błukała pa ich jak cialaty. Jaki vynik? Dzie byŭ Znaviec sa svaim «tak dalej». Dzie byŭ Ivaškievič? Jon vyjšaŭ z zaklikaŭ źbirać Narodny schod, i pad udarami śpiecsłužbaŭ bajaźlivyja apazicyjnyja lidary tut ža schavalisia za hety łozunh.
Bajkot vybaraŭ ničoha nie daść. Dy i maštabnaha bajkotu nie budzie, tolki jaho imitacyja ŭ internecie.
Ja zaklikaju ŭsich spakojna i kanstruktyŭna praanalizavać situacyju.
Ja ŭpeŭnieny, što nichto z apazicyjanieraŭ nie trapić u parłamient, ale ja prašu ich jašče raz pasprabavać. Heta ciažka, brydka i navat niebiaśpiečna, ale palityka — mastactva mahčymaha. Vy bjaciesia nie stolki za kresły, vy zmahajeciesia za dušy i rozumy prostych biełarusaŭ, i dla hetaha treba vykarystoŭvać lubuju lehalnuju mahčymaść.
A kali raptam pad naciskam hramadstva i śvietu ŭłada zdryhaniecca i prapuścić 5 abo 10 apazicyjanieraŭ u parłamient, to ŭ Viarchoŭnym Saviecie źjavicca chaj maleńki, ale płacdarm.
