Hrodzienski handlovy centr «Karona» budzie dakładnaj kopijaj bresckaha adnajmiennaha hipiermarkieta. Jaho chočuć pabudavać na ŭčastku pa vulicy Pieramohi, na miescy vajskovych kazarmaŭ. Kab zachavać pamiać pra ich, płanujecca zrabić kardonny makiet budynkaŭ impierskaj epochi pačatku XX stahodździa.
Jak raspaviała namieśnik dyrektara TAA «Tytuń Inviest» pa ideałahičnaj pracy Viktoryja Łašova, ahulnaja płošča abjekta składzie bolš za 15 tysiač kvadratnych mietraŭ, ź ich handlovaja — kala 6 tysiač. Novy handlovy centr budzie hipiermarkietam.
Jak udakładnili va ŭpraŭleńni architektury i horadabudaŭnictva harvykankama, ciapier TAA «Tytuń Inviest» zajmajecca adsialeńniem žycharoŭ baraka pa vulicy Pieramohi, jaki idzie pad znos. Staryja vajskovyja kazarmy taksama buduć źniesieny.
Abaroncy histaryčnaj spadčyny prapanujuć zachavać kazarmy i zialonyja nasadžeńni.
Adna ź ich prapanovaŭ — «ŭbudavać» kazarmu ŭ hipiermarkiet.Naprykład, tak pastupajuć u susiednich Polščy i Litvie. Uzory možna ŭbačyć u Biełastoku (halereja «Alfa»), Aŭhustovie (handlovy centr Plaza), Łodzi (halereja «Manufaktura»), Kaŭnasie.
«Ale na źmienu prajekta treba vydatkavać srodki. Škada, što našy inviestary hatovyja razburyć historyju, tolki b nie vydatkavać lišnija hrošy», —kaža krajaznaŭca Ihar Łapiecha.
Va ŭpraŭleńni architektury i horadabudaŭnictva adznačyli, što znojdzieny razumny kampramis pamiž zabudoŭščykam i historykami. Kab zachavać pamiać ab vajskovych kazarmach,
uładalnika hipiermarkieta abaviažuć zrabić nievialiki makiet hetych zbudavańniaŭ, a paśla vystavić jaho ŭ budynku hipiermarkieta.Praŭda, u samim TAA «Tytuń Inviest» ničoha ab padobnych płanach pakul nie paviedamlajuć.
* * *
Vajskovyja kazarmy pa vulicy Pieramohi — heta kompleks z čatyroch budynkaŭ, pabudavany na terytoryi harnizona hrodzienskaj krepaści prykładna ŭ 1914 hodzie. U svoj čas u ich raźmiaščałasia administracyja vajskovaj častki i adnačasova internat dla sałdataŭ, jakija absłuhoŭvali składy. Kazarmy vykarystoŭvalisia pa pryznačeńni da našaha času. U apošnija niekalki hadoŭ budynka pustujuć. Jany dobra zachavalisia i pryciahvajuć uvahu stylna azdoblenymi fasadami. Z pomnikaŭ zaniomanskaj častki horada pa architekturnym i dekaratyŭnych asablivaściach kazarmy možna paraŭnać z Uładzimirskaj carkvoj i Francyskanskim kaściołam.
