27 sakavika ŭ Mižnarodny dzień teatra ŭ Nacyjanalnym akademičnym teatry imia Janki Kupały adbyłosia ŭručeńnie chrustalnych pryzoŭ i imiannych premij Ministerstva kultury Biełarusi i Biełaruskaha sajuza teatralnych dziejačaŭ.
U biahučym hodzie za addanaść nacyjanalnamu teatru i šmathadovuju tvorčuju dziejnaść pryza «Chrustalnaja Paŭlinka» ŭdastojeny narodny artyst Biełarusi, akcior Nacyjanalnaha akademičnaha teatra imia Janki Kupały Arnold Pamazan.
«Chrustalnaha anioła» atrymaŭ režysior Hrodzienskaha teatra lalek Aleh Žuhžda. «Chrustalnaja zorka» dastałasia artystcy‑vakalistcy Dziaržaŭnaha muzyčnaha teatra Biełarusi Ludmile Stanievič, «Chrustalnaja kvietka» — aktrysie Nacyjanalnaha akademičnaha dramatyčnaha teatra imia Maksima Horkaha Vieranicy Plaškievič.
Byli nazvany i łaŭreaty premij: imia Łarysy Aleksandroŭskaj — kampazitar, mastacki kiraŭnik pradziusierskaha centra «Spamaš» Uładzimir Kandrusievič, imia Ihnata Bujnickaha — akcior Dramatyčnaha teatra Biełaruskaj armii Ihar Filčankoŭ. Premija imia Jeŭścihnieja Miroviča ŭručana režysioru Hrodzienskaha abłasnoha dramatyčnaha teatra Hienadziu Mušpiertu. Premii imia Lubovi Mazaleŭskaj udastojeny mastak Biełaruskaha dziaržaŭnaha teatra lalek Valeryj Račkoŭski, premii imia Kandrata Krapivy — teatralny krytyk, doktar fiłałahičnych navuk Taćciana Arłova.
Uručajučy ŭznaharody teatralnym dziejačam, ministr kultury Biełarusi Uładzimir Maćviajčuk adznačyŭ, što ŭ kulturnym žyćci krainy adbyvajecca mnostva znamianalnych padziej. Pravodziacca fiestyvali pa haradach Biełarusi z udziełam roznych teatralnych kalektyvaŭ, staviacca cudoŭnyja śpiektakli, niezabyŭnyja premjery ŭ biełaruskich teatrach. Tolki ŭ 2006 hodzie ŭ Biełarusi było pastaŭlena 1 tys. 600 śpiektaklaŭ, dzieviać samych talenavitych dziejačaŭ biełaruskaj sceny atrymali dziaržaŭnyja ŭznaharody, skazaŭ ministr.
