Miaśnikovič zaniaŭsia lnozavodami 1

Prem'jer-ministr Michaił Miaśnikovič zapatrabavaŭ pakoryć tempy rabot pa rekanstrukcyi lnozavodaŭ.

Hetaje daručeńnie kiraŭnik urada zrabiŭ 19 lipienia na pasiadžeńni prezidyuma Savieta ministraŭ, na jakim byŭ razhledžany chod rabot pa budaŭnictvie i rekanstrukcyi lnozavodaŭ, paviedamiła pres-słužba Savieta ministraŭ.

Miaśnikovič adznačyŭ, što siońnia halina zabiaśpiečana nieabchodnymi technałohijami, śpiecyjalistami, hatunkami kultur. «Kaniešnie, jość jašče pytańni pa miechanizavanaj uborcy i cierableńni lnu, pa ŭdaskanaleńni hetaj techniki. Minpram i NAN zajmajucca hetymi pytańniami. Mahli b i bolš aktyŭna zajmacca, ale ŭ pryncypie tut zruchi realnyja», — ličyć prem'jer-ministr.

Jon padkreśliŭ, što kiraŭnik dziaržavy pryniaŭ šerah rašeńniaŭ, jakija zabiaśpiečvajuć finansavańnie rekanstrukcyi Aršanskaha lnokambinata, jość adpaviednyja biźnies-płany, raboty viaducca pa zapłanavanym hrafiku. «Razam z tym pramiežkavaje źviano — pierapracoŭka lnotrasty ŭ ilnovałakno — znachodzicca ŭ vielmi niezdavalniajučym stanie. Taja infarmacyja, što ŭ nas jość, havoryć pra biezadkaznaje staŭleńnie bolšaści abłvykankamaŭ i Minsielhascharča da rekanstrukcyi dziejnych ilnozavodaŭ», — ličyć kiraŭnik urada.

Usiaho ŭ Biełarusi 44 lnozavody.

Na ich dziejničajuć 64 linii pa pierapracoŭcy doŭhaha lnovałakna i 65 — pa pierapracoŭcy karotkaha. Pavodle infarmacyi Minsielhascharča bolš čym 20% linij pa doŭhim vałaknie i bolš čym 60% pa karotkim vykarystoŭvajecca 20 i bolš hadoŭ pry terminach amartyzacyi 9 hadoŭ. Prezident daŭ daručeńnie na praciahu hetaj piacihodki pieraasnaścić halinu, kab vyjści na vytvorčaść ilnovałakna ŭ 60 tys. t za hod. Dla hetaha vydzieleny srodki na techpieraasnaščeńnie i novaje budaŭnictva 11 lnozavodaŭ, ź ich 3 pavinny pabudavać i 8 pieraŭzbroić. U vyniku rekanstrukcyi lnozavody pavinny być abuładkavanyja sučasnymi linijami pa pierapracoŭcy lnotrasty.

«Na žal, my vymušanyja sabrać pasiadžeńnie prezidyuma Saŭmina, kab źviarnuć uvahu abłvykankamaŭ i Minsielhascharča na vielmi niezdavalniajučyja tempy rabot», — zajaviŭ Michaił Miaśnikovič. Na rekanstrukcyju i techpieraasnaščeńnie takich abjektaŭ adšukanyja lhotnyja kredytnyja resursy ŭ abjomie 574 młrd. rubloŭ. Heta niemałyja hrošy, padkreśliŭ kiraŭnik urada, ale ŭ niekatorych abłaściach i na asobnych zavodach dahetul niama prajektna-kaštarysnaj dakumientacyi. «Inakš jak biezadkaznym staŭleńniem heta nazvać nielha», — skazaŭ prem'jer-ministr. Miaśnikovič paprasiŭ «mienavita z takoha punktu hledžańnia razhledzieć hetaje pytańnie, i ŭ pieršuju čarhu pa acency dziejnaści kadraŭ, jak u centry, tak i na miescach».

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH