U dačynieńni da načalnika adździeła kultury Pinskaha harvykankama Alaksandra Łukašenki zaviedziena kryminalnaja sprava. Pra heta paviedamlaje hałoŭnaje ŭpraŭleńnie baraćby z arhanizavanaj złačynnaściu i karupcyjaj.
Načalnika adździełu kultury Alaksandra Łukašenku padazrajuć u złoŭžyvańni ŭładaj abo słužbovymi paŭnamoctvami.
Vyśvietliłasia, što čynoŭnik u lutym vyjaždžaŭ u Polšču razam z 9 svajakami i znajomymi. Chacia ŭ polski horad Paronin jon pavinien byŭ vieźci miascovy ansambl pieśni i tancu «Paleskija zory».
Paviedamlajecca, što hetym Alaksandr Łukašenka nanios škodu haradskomu biudžetu pamieram 16 miljonaŭ rubloŭ. Raniej čynoŭnik pracavaŭ dyrektaram Pałaca kultury.
Jak kaža Mikałaj, były kaleha čynoŭnika, pakolki proźviščy načalnika adździeła kultury i biełaruskaha kiraŭnika padobnyja, hetaja tema ŭ Pinsku zaraz abmiarkoŭvajecca vielmi žyva:
«Tak, ludzi havorać, paśmiejvajucca. Adnak tut niama čaho śmiajacca, bo śfiera kultury zaraz u Pinsku ŭ zaniapadzie. Kalektyvaŭ zusim užo nie zastałosia, adzin hety ansambl „Paleskija zory“, jaki ŭ Polšču nie trapiŭ. A tak z 2009 hoda kultura ŭ Pinsku ŭ zaniapadzie. Raniej zorki da nas usialakija jechali — i biełaruskija, i rasijskija. A ciapier cišynia».
