Pasolstva Biełarusi ŭ Kyrhyzstanie zaniepakojena «nahniatańniem u šerahu ŚMI infarmacyi adnosna „faktaru Bakijeva“, a taksama abvastreńniem asobnymi hramadskimi abjadnańniami i hrupami asob stanovišča vakoł biełaruskaj dypmisii».Pra heta havorycca ŭ zajavie, apublikavanaj na aficyjnym sajcie biełaruskaha pasolstva ŭ Kyrhyzskaj Respublicy.
Nahadajem, ranicaj 28 žniŭnia na pasolstva Biełarusi ŭ Biškieku byŭ učynieny napad mitynhoŭcaŭ — svajakoŭ achviar dziaržaŭnaha pieravarotu 2010 hoda, jakija patrabujuć ekstradycyi ź Minska skinutaha prezidenta Kurmanbieka Bakijeva i jaho brata Žanybieka. Bakijevy abvinavačvajucca va ŭčynieńni ciažkich kryminalnych złačynstvaŭ. Udzielniki akcyi patrabavali spynieńnia pracy pasolstva i razryvu dypadnosin z uładami Biełarusi, jakija «chavajuć zabojcaŭ».
Jak havorycca ŭ zajavie pasolstva, «u vyniku akcyi kamianiami byli raźbity šyby pieršaha i druhoha pavierchaŭ dypmisii, vonkavyja vitryny, paškodžany kvietkavyja nasadžeńni, pry hetym z boku pikietčykaŭ hučali pahrozy radykalnaha charaktaru».
«Miarkujučy, što za ŭkazanymi dziejańniami mohuć być intaresy peŭnych sił,pasolstva vykazvaje zakłapočanaść takimi pravakacyjnymi dziejańniami, jakija staviać pad pahrozu funkcyjanavańnie dypłamatyčnaha pradstaŭnictva i biaśpieku jaho supracoŭnikaŭ. Na padstavie hetaha vykazvajem nadzieju na pryniaćcie kirhizskim bokam adpaviednych mier», — zajaŭlaje biełaruskaja dypmisija ŭ Biškieku.
«Niahledziačy na apublikavańnie ŭ ŚMI infarmacyi ab tym, što Ministerstva ŭnutranych spraŭ Kyrhyzskaj Respubliki „nie znachodzić u dziejańniach udzielnikaŭ mitynhu kala budynka pasolstva Biełarusi ŭ Kyrhyzstanie ničoha supraćpraŭnaha“, MUS Kyrhyzstana robić nieabchodnyja zachady ŭ suviazi z naŭmysnym pryčynieńniem škody budynku dypmisii», — havorycca ŭ zajavie pasolstva.
Biełaruskija dypłamaty «ličać niekarektnym traktoŭku niekatorymi ŚMI nie paćvierdžanaj i nie pravieranaj infarmacyi pa hetym pytańni, zasnavanaj na kamientaryjach i zajavach pradstaŭnikoŭ vyšejnazvanych hramadskich abjadnańniaŭ, što nie adpaviadajuć rečaisnaści».
«Pasolstva adkryta dla pieramoŭ i hruntoŭnaha abmierkavańnia pytańniaŭ dvuchbakovych adnosin, skiravanych, u pieršuju čarhu, na raźvićcio i ŭmacavańnie ŭzajemadziejańnia braterskich narodaŭ»,- havorycca ŭ dakumiencie.
