Eks-kandydat u prezidenty staŭ kandydatam u deputaty praź Viarchoŭny sud

1 vieraśnia Viarchoŭny sud Biełarusi pryznaŭ abhruntavanaj i zadavoliŭ skarhu Viktara Ciareščanki na rašeńnie Centralnaj vybarčaj kamisii ab admovie ŭ rehistracyi jaho kandydatam u deputaty pałaty pradstaŭnikoŭ,

paviedamiła pres-sakratar Viarchoŭnaha suda Maryja Łapo.

Nahadajem, 29 žniŭnia CVK nie zadavoliŭ skarhu Viktara Ciareščanki, eks-kandydata ŭ prezidenty na vybarach 2010 hoda, na admovu ŭ rehistracyi jaho kandydatam u deputaty pa Šarkaŭščynskaj vybarčaj akruzie № 29. Pryčynaj admovy stali pryznanyja akruhovaj kamisijaj niesapraŭdnymi podpisy.

Padčas pasiadžeńnia Ciareščanka paviedamiŭ, što ŭ jaho jość zajavy vybarščykaŭ, jakija paćviardžajuć fakt rośpisu ŭ jaho padtrymku ŭ prysutnaści členaŭ inicyjatyŭnaj hrupy.

Adnak, jak zajaviła kiraŭnik CVK Lidzija Jarmošyna, Centralnaja kamisija, prymajučy rašeńnie, pavinna zychodzić «z tych dakumientaŭ, jakija zdabyvała akruhovaja kamisija». «My bačym, što jana ich zdabyvała zakonna, nie prymušajučy hramadzian», — padkreśliła Jarmošyna, adznačyŭšy, što paźniej vybarščyki mahli ŭkazać u zajavach fakty, ab jakich paprasiŭ sam Ciareščanka, bo jany viedali jaho.

Kamientujučy rašeńnie Viarchoŭnaha suda, Viktar Ciareščanka adznačyŭ, što jaho skarha razhladałasia bolš za try hadziny.

«Ja zapatrabavaŭ daskanała vyvučyć 24 tłumačeńni vybarščykaŭ, jakija napisali, što jany stavili podpisy ŭ maju padtrymku ŭ prysutnaści členaŭ majoj inicyjatyŭnaj hrupy», — skazaŭ Ciareščanka.

Ab stanoŭčym rašeńni Ciareščanku infarmavali pa telefonie, bo prysutničać siońnia ŭ Minsku na pasiadžeńni suda jon nie moh. «Mnie skazali, što pastanova Centrvybarkama ab admovie ŭ zadavalnieńni skarhi na admovu ŭ rehistracyi admieniena, i mianie zarehistravali kandydatam u deputaty. Ja byŭ pryjemna ździŭleny rašeńniu suda», — zaŭvažyŭ jon.

Pavodle słoŭ Ciareščanki, u CVK užo viedajuć ab rašeńni Viarchoŭnaha suda, i ŭ paniadziełak, 3 vieraśnia, jon zmoža zabrać paśviedčańnie kandydata ŭ deputaty. «Ale ja straciŭ dziesiać dzion ahitacyi — heta vielmi ŭskładniaje pieradvybarnuju kampaniju», — dadaŭ kandydat.

Skarhi na admovu ŭ rehistracyi kandydatami ŭ deputaty CVK razhladała z 28 pa 30 žniŭnia ŭklučna. Z 53 skarhaŭ zadavolena ŭsiaho 11.

U Viarchoŭny sud na hety čas pastupiła vosiem skarhaŭ na rašeńnie CVK. Ź piaci razhledžanych zadavolena pakul adna — Viktara Ciareščanki.

Jak patłumačyła pres-sakratar, sud pracuje ŭ vychadnyja dni ŭ suviazi z tym, što, zhodna z zakanadaŭstvam, skarhi na admovu ŭ rehistracyi pavinny być razhledžanyja na praciahu troch kalandarnych dzion.

BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH