U novy navučalny hod — z malitvaj i natchnieńniem

2 vieraśnia kaścioł sv. Judy Tadevuša ŭ pieršuju čarhu vitaŭ školnikaŭ i studentaŭ, nastaŭnikaŭ i vychavacielaŭ. U pačatku novaha navučalnaha i katechietyčnaha hoda jany atrymali Božaje błasłavieńnie. Razam malilisia miascovy ksiondz Mikałaj Lipski i hości — ksiondz Raman Murzič z Parafjanava (Dokšycki dekanat) i vikaryj parafii sv. Antonija Paduanskaha ŭ Viciebsku, uradženiec Pastaŭskaj ziamli ksiondz Anton Łahunionak.

Uračystuju Prymicyjnuju śviatuju imšu ŭznačaliŭ ks. Anton Łahunionak — dva tydni tamu jon atrymaŭ śviatarskaje paśviačeńnie z ruk Apostalskaha nuncyja arcybiskupa Kłaŭdzia Hudžeroci i pa śpiecyjalnym dazvole Papy Bieniedykta XVI udzialiŭ Prymicyjnaje papskaje błasłavieńnie ŭsim prysutnym.

— Siońnia ŭ Hłybokim uračysta adznačajuć Dzień piśmienstva, — adznačyŭ ksiondz Mikałaj Lipski. — Śviata, kali ŭšanoŭvajecca sapraŭdny skarb čałaviectva — kniha. Usim nam treba pamiatać, što samaje važnaje ŭ žyćci kožnaha chryścijanina — Božaje słova. My pavinnyja nie tolki słuchać Jaho padčas supolnaj malitvy, ale i štodnia prymać u svaje sercy. Biblija — hałoŭnaja kniha našaha žyćcia.

Akramia Božaha błasłavieńnia školniki i studenty atrymali padarunki — kanctavary, kuplenyja pa inicyjatyvie parafii.

Paśla śviatočnaj imšy parafijan čakaŭ kancert viadomaha minskaha hurta «Bosaje sonca» i słynnaha biełaruskaha kampazitara i vykanaŭcy Źmitra Vajciuškieviča. Lidar «Bosaha sonca» Aleś Kot-Zajcaŭ (hitara, vakał) u supravadžeńni Ramana Łuhavoha (akardeon) praśpiavaŭ niekalki ŭłasnych tvoraŭ, styl jakich možna było b umoŭna nazvać muzyčnym impresijanizmam. Siarod inšych prahučała liryčnaja pieśnia na vierš polskaha paeta R. Vajačka ŭ aryhinale. U druhim adździaleńni Z. Vajciuškievič padaryŭ słuchačam niekalki pieśniaŭ na vieršy metraŭ biełaruskaj paezii — U. Karatkieviča, R. Baradulina, U. Niaklajeva, Ł. Drańko-Majsiuka. Z asablivaj ciepłynioj była ŭspryniataja ščymlivaja pieśnia pra mamu z supolnaha prajekta Z. Vajciuškieviča i H. Buraŭkina. Impravizavany chor prysutnych družna padchapiŭ «Kałychanku» V. Rainčyka i H. Buraŭkina, a na raźvitańnie prahučała tradycyjnaje «Byvajcie zdarovy, žyvicie bahata». Nie abyšłosia i bieź pieśni «na bis» — joju stała «Ja naradziŭsia tut» z adnajmiennaha alboma. Z. Vajciuškievič niazmušana vioŭ razmovu z publikaj, žartavaŭ, pryhadvaŭ cikavyja historyi i ŭ kancy pakinuŭ u padarunak parafii niekalki kaštoŭnych aŭdyjodyskaŭ.

Hety dzień zapomniŭsia katalikam i jašče adnoj vielmi pryjemnaj padziejaj — u kaściole adkryłasia vialikaja fotavystava. Jaje hałoŭny hieroj — Łučaj va ŭsioj svajoj duchoŭnaj pryhažości. Pastaŭčanin Andrej Macur i minčanin Alfred Mikus zafiksavali na zdymkach najlepšyja momanty niadaŭnich mierapryjemstvaŭ parafii — festaŭ u honar sv. Andreja Baboli, sv. Hanny, uračystaści pieršaj śviatoj kamunii, kryžovaha šlachu ŭ Vialikuju piatnicu i inšaje.

Pra vysoki ŭzrovień vystavy śviedčyć toj fakt, što jaje «baćki» — prafiesijanały svajoj spravy. Andrej Macur — staršynia pastaŭskaha fotakłuba «Śvietosiła», aŭtar šmatlikich piersanalnych i suaŭtar kalektyŭnych fotavystavaŭ. Alfred Mikus — udzielnik fotavystavaŭ u Biełarusi, Rasii, Ukrainie, Łatvii, Hiermanii inšych krainach, pryzior Tydnia słavianskaha mastactva ŭ Bierlinie (2011), finalist konkursu «Jeŭropa vačyma biełarusaŭ» i šmatlikich inšych.

Ludzi, kaścioł, nastroj, emocyi, pieražyvańni — usio heta ciesna pierapleciena ŭ fotazdymkach, jakich u kaściole raźmieščana 70 (!). Vystava zastaniecca ŭ katalickaj śviatyni da kanca hoda.

Mahčymaściaŭ papoŭnić jaje ŭdałymi kadrami budzie jašče šmat. Užo 30 vieraśnia ŭ Łučai adbudziecca novaje mierapryjemstva — śviata Łučaja. Hałoŭnaja meta arhanizatara — ksiandza Mikałaja — padkreślić datu 470-hadovaha dnia naradžeńnia miascovaści. Stanoŭčyja emocyi, vydatny nastroj i jakasny kancert zabiaśpiečanyja. Zaprašajem!

0

0

0

0

0

0

Ina Śniažkova

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH