Ad cyrka da Kramloŭskaha pałaca: Kabzonu — 75 hadoŭ 2
Svoj papiaredni jubilejny kancert Iosif Kabzon pravioŭ z razmacham — śpiavaŭ u Kramloŭskim pałacy ciaham 8 hadzinaŭ. U peŭny momant pierastała chadzić mietro.
Jašče praz hadzinu Iosif Davydavič stamiŭsia, i śpiavaŭ pieśni nie całkam, abjadoŭvajučy ich pamiž saboj. Adnak fakt zastajecca faktam — dla Kabzona kancert na 8 hadzinaŭ heta nie prablema. A pačynaŭ śpiavak svoj tvorčy šlach u cyrku ź pieśniaj «Kuba — luboŭ maja».
Zdavałasia, jon byŭ zaŭždy — adnak pieršy chit u Kabzona źjaviŭsia ŭ 1964 hodzie. «A u nas vo dvorie» ź videa, u jakim Kabzon hulaje pa papiarovaj Maskvie, staŭ kłasikaj savieckaj estrady 60-ch, kali tancavalnyja placoŭki poŭnilisia pieśniami Mahamajeva, Chila i nie apalnaha jašče Abadzinskaha. Vyśvietliłasia, što saviecki narod moža śpiavać pieśni nie tolki ŭ maršavych rytmach sa słovami pra «varožyja vichory».
U 1970-ja Kabzon aktyŭna zmahaŭsia za mir va ŭsim śviecie — abjeździŭ usie kamsamolskija budoŭli, uvieś sacyjalistyčny siektar i častku kapitalistyčnych krain. Zapisaŭ pieśniu pra toje, jak pierapłaŭlali statui Ernesta Če Hievary, jakaja raptoŭna raspaŭsiudziłasia pa błohach paru hadoŭ tamu, usio praz prypieŭ «Ja syn źziańnia, ja paŭstaŭ ź niebyćcia» — tady błohiery žartavali, što Kabzon śpiavaje sam pra siabie.
Z 1971 hoda ažno pa 2004 Kabzon vychodziŭ u finał «Pieśni hoda» — taki vynik i paraŭnać z čymści ciažka. Zvyčajna Kabzona nazyvajuć rasijskim Frenkam Sinatraj — abodva kultavyja estradnyja śpievaki, pra abodvuch chodziać čutki, što jany źviazanyja z mafijaj. Hałoŭnaje — hałasy abodvuch śpievakoŭ stali simvałam ich epoch, jakija zaraz skančvajucca: moda na śpievakoŭ-kruneraŭ pavoli prachodzić. Tym nie mienš, Kabzon nie hublaje-to sa starymi chitami vystupić, to Yellow Submarine razam z «Choram Tureckaha» zaśpiavaje. Admaŭlać jamu ŭ talencie nie davodzicca — prynamsi, jahonyja «Mhnovienija» z «17 imhnieńniaŭ viasny» praśpiavaje badaj što kožny žychar byłoha SSSR, navat kali jaho razbudzić siarod nočy.
Siońnia, 11 vieraśnia, u dzień svajho 75-hodździa lehiendarny śpiavak, narodny artyst i deputat Dziaržaŭnaj dumy, Iosif Kabzon adyhraje vialiki raźvitalny kancert (praŭda, nie pieršy ŭ jahonaj karjery), paśla čaho nazaŭždy pakinie scenu.
