Pikiet prajšoŭ na placoŭcy kala Kamaroŭskaha rynku. Na im prysutničali 26 kandydataŭ kampanii — jak zarehistravanyja, tak i niezarehistravanyja. Mierapryjemstva, pavodle słoŭ jaho arhanizataraŭ, stała kvintesiencyjaj usich ahitacyjnych pikietaŭ, jakija pravodzili ich kandydaty ŭ deputaty.
Na 26 stendach vybarščykam byli pradstaŭlenyja rachunki za kamunalnyja pasłuhi z zavyšanymi sumami, «novyja kursy valut paśla vybaraŭ», u jakich dołar kaštavaŭ bolš čym 17 tysiač rubloŭ, partrety palitźniavolenych ź ich adrasami i zaklikam pisać im listy i pasyłać telehramy, «załatyja» jajki i «siarebranaja» aharodnina.
Prysutny na pikiecie lidar kampanii «Havary praŭdu!» Uładzimir Niaklajeŭ padziakavaŭ usim udzielnikam kampanii za rabotu. «Nichto nie dumaje, što zaŭtra našy kandydaty trapiać u parłamient. Ale my ŭdzielničali ŭ hetaj kampanii, jak u palityčnaj — kab pryciahnuć na svoj bok hramadzian Biełarusi. Nam nieabchodnaja padtrymka bolšaści nasielnictva na prezidenckich vybarach 2015 hoda», — zajaviŭ Niaklajeŭ.
Kiraŭnik vybarčaha štaba kampanii «Havary praŭdu!» Andrej Dźmitryjeŭ adznačyŭ, što pikiet nie darma prachodzić pad devizam «My nie kidajem». «
My nie kidajem palitźniavolenych — my sočym za ich situacyjaj, i kožny ciapier moža vykazać im svaju salidarnaść, padpisać paštoŭku.My nie kidajem ludziej, jakija stavili podpisy za vyłučeńnie našych kandydataŭ — usie kandydaty ciapier buduć u svaich akruhach praciahvać rabotu ŭ ramkach kampanii „Hramadzianski dahavor“. My nie kidajem svaju temu — pradstaŭlać intaresy ludziej, jakija padpisvalisia i hałasavali za našych kandydataŭ. My budziem praciahvać svaju dziejnaść i paśla vybaraŭ», — zajaviŭ Dźmitryjeŭ.
Pikiet prajšoŭ bieź incydentaŭ pry vialikaj uvazie prachožych i žurnalistaŭ.
