TOP-5 kancertaŭ, jakija varta naviedać da kanca hoda

Ad vieraśnia da śniežnia ŭ Minsku projdzie dziasiatak pieršarazradnych kancertaŭ. Takoha nie było z dakryzisnych časoŭ, kali za hod u Minsk zavitali Stynh, Ełtan Džon, Džo Kokier i jašče niekalki zorak suśvietnaj muzyki. Paśla ŭpaŭ dalar, i Biełaruś viarnułasia ŭ tyja časy, kali hałoŭnaj kancertnaj padziejaj hoda byŭ vystup Nazareth na «Słavianskim bazary».

Adnak vosień 2012 rychtuje nadzvyčaj cikavyja muzyčnyja sustrečy.

1. 8 kastryčnika — Tito & Tarantula. Kłub Dozari

Amierykancy Tito & Tarantula upieršyniu zavitajuć u Biełaruś. Tut jany ŭžo majuć svaju aŭdytoryju dziakujučy saŭndtrekam da filmaŭ Kvencina Tarancina, i Robierta Radryhiesa. Adnak nie Radyryhiesam adzinym žyvie kalektyŭ.

Usie piać albomaŭ Cita Łaryva i kampanii možna śmieła stavić u śpis toj muzyki, jakuju varta pasłuchać.

Jak sapraŭdnyja kalifarnijcy, Tito & Tarantula nie abirali niejki adzin žanr, a spałučyli ŭ svajoj muzycy ŭsio: ad bluza da stoŭnera.

Kvitki: ad 400 tysiač rubloŭ da miljona.

2. 15 kastryčnika — «HBC The Super Trio». Biełdziaržfiłarmonija

Heta virtuoznyja džazavyja muzykanty: adno imia Skota Chendersana robić naviedvańnie hetaha kancerta abaviazkovym dla amataraŭ džaza.

Chendersan nieadnojčy pryznavaŭsia «džazavym hitarystam № 1 u śviecie».

Aproč jaho, u trya ŭvachodziać virtuozny bas-hitaryst Džef Bierlin i bubnač Denis Čembiers — śpis tych muzykaŭ, ź jakimi hrała rytm-siekcyja «HBC The Super Trio», možna raściahnuć da kanca staronki.

Kvitki: ad 200 tysiač rubloŭ

3. 31 kastryčnika — Nickelback. Minsk-Arena.

Jak tołd́ki ni łajali Nickelback, i «najhoršym hurtam płaniety» nazyvali, ale navat krytyki amierykanskaha časopisa Rolling Stone, jakija nie majuć nijakich aŭtarytetaŭ, pisali pra toje, što

hety hurt trapić u rok-n-rolny raj za adzin tolki drajv.

Pa słovach Čeda Kruhiera, kali b Nickelback uzialisia vykanać na kancercie ŭsie svaje chity, šou b raściahnułasia hadzinaŭ na piać. Na albomach Nickelback chitovy patencyjał maje kožnaja druhaja pieśnia. A ich When We Stand Together absalutna zasłužana pieraŭtvaryłasia ŭ miežkantynientalny chit.

Kvitki: ad 400 tysiač da 1,8 miljona rubloŭ.

4. 18 listapada — Džon Makłaflin. Biełaruski muzyčny teatr.

Jaho pryniata ličyć džazavym hitarystam, ale kali ŭzhadać navat nie ŭsie, a tolki najvažniejšyja prajekty Makłaflina (heta i kultavy Mahavisnu Orchestra, i supolny prajekt z Karłasam Santanaj, i hitarnyja partyi na ŭsich hałoŭnych albomach Majłza Devisa), stanovicca zrazumieła, što navat šyrokaje paniaćcie «džaz» ciśnie Makłaflinu ŭ plačach.

Kvitki: ad 170 da 810 tysiač rubloŭ.

5. 21 śniežnia — Merylin Mensan. Pałac sportu

Amierykanski šok-rokier Merylin Mensan, jaki staŭ supierzorkaj90-ch, nie straciŭ svajho statusa i siońnia. Navat samyja addanyja fanaty Mensana nie dumali, što kali-niebudź muzyka zavitaje ŭ Minsk, a kali i zavitaje, to ŭ hłybokaj staraści.