Lider «Maładoha frontu» Źmicier Daškievič praciahvaje znachodzicca ŭ karcery Mazyrskaj kalonii, dzie jon abviaściŭ haładoŭku pratestu suprać cisku i źniavah pavodle relihijnaj prykmiety. 27 vieraśnia na sajcie «Maładoha frontu» niaviesta Daškieviča Nasta Pałažanka zajaviła, što da cisku na aktyvista nibyta datyčny načalnik kalonii Juryj Zbaroŭski dy inšyja supracoŭniki kalonii. Praz dva dni na «Svabodu» patelefanavaŭ były načalnik ivacevickaha izalataru Stanisłaŭ Chaładovič i začytaŭ svoj zvarot da načalnika mazyrskaj kalonii:
«Spadar Zbaroŭski Jury Bahdanavič, spynicie ździeki ŭ dačynieńni da Źmitra Daškieviča. Nia ŭciahvajcie siabie dy inšych supracoŭnikaŭ kalonii, vašych padnačalenych, u złačynstvy. Pomnicie, hety režym nia viečny, adkaznaść rana ci pozna pryjdziecca nieści nia tolki maralnuju, ale i kryminalnuju. Źviartajecca da vas były načalnik izalatara časovaha ŭtrymańnia, kapitan milicyi ŭ adstaŭcy Stanisłaŭ Chaładovič, horad Ivacevičy».
28 vieraśnia Stanisłaŭ Chaładovič dasłaŭ u Mazyrskuju kaloniju telehramu z słovami padtrymki Źmitru Daškieviču.
U Mazyrskaj kalonii sytuacyju vakoł palitviaźnia Źmitra Daškieviča pa-raniejšamu nie kamentujuć.
Źmitru Daškieviču za niepadparadkavańnie pavialičyli termin źniavoleńnia jašče na hod i na minułym tydni pieraviali z Hłybockaj kalonii ŭ Mazyrskuju.
