Pad Minskam padtrymajuć kažanoŭ 3

U pasiołku Sieńnica Minskaha rajona 4 kastryčnika Centr turyzmu i krajaznaŭstva dziaciej i moładzi «Vietraź» praviadzie pryrodaachoŭnuju akcyju pa padtrymcy papulacyi kažanoŭ, jakija žyvuć pablizu nasielenych punktaŭ.

Jak paviedamiŭ kaardynatar akcyi Rusłan Šajkin, jana arhanizavana pry padtrymcy Minskaha abłasnoha kamiteta pryrodnych resursaŭ i achovy navakolnaha asiarodździa i prymierkavana da Mižnarodnaha dnia abarony žyvioł, jaki adznačajecca ŭ hety dzień.

Pavodle słoŭ Šajkina, padčas akcyi staršakłaśniki škoł Minskaha rajona voźmuć udzieł u vyrabie domikaŭ dla kažanoŭ — rudych viačernic.

Adnoj z prablem ich isnavańnia źjaŭlajecca niedachop naturalnych schoviščaŭ: dupłavatyja drevy, jakija ryžyja viačernicy vybirajuć dla žylla, paŭsiudna vysiakajucca. Miarkujecca, što budaŭnictva niekalkich dziasiatkaŭ domikaŭ dla kažanoŭ budzie spryjać zachavańniu ich papulacyi ŭ Minskim rajonie. Častka domikaŭ budzie raźviešana na terytoryi Centra turyzmu i krajaznaŭstva, častka — pablizu škoł, navučency jakich voźmuć udzieł u akcyi.

Jak adznačyŭ Šajkin, rudyja viačernicy nie zaniesieny ŭ Čyrvonuju knihu Biełarusi, adnak na terytoryi jeŭrapiejskaha kantynienta ŭsie kažany znachodziacca pad achovaj. Z-za vybaru miescaŭ raśsialeńnia pablizu ad čałaviečaha žylla hetyja rukakryłyja asabliva ŭraźlivyja. Pavodle słoŭ śpiecyjalista, 2012 hod abvieščany Suśvietnym hodam kažana. Heta zroblena pa inicyjatyvie Pahadnieńnia pa zachavańni papulacyj jeŭrapiejskich vidaŭ rukakryłych pry padtrymcy Prahramy AAN pa zachavańni navakolnaha asiarodździa.

Šajkin adznačyŭ, što ŭ Biełarusi takaja akcyja ŭ padtrymku kažanoŭ pravodzicca ŭpieršyniu.

Jon raźličvaje, što praca pa zachavańni papulacyi kažanoŭ u Minskim rajonie budzie praciahnuta. Śpiecyjalisty majuć namier adsačyć, nakolki domiki zapatrabavanyja rukakryłymi.

Nastaśsia Janušeŭskaja, BiełaPAN

Chočaš padzialicca važnaj infarmacyjaj ananimna i kanfidencyjna? Pišycie redaktaru «Našaj Nivy» ŭ TH