Redkaja kanstruktyŭnaja i kankretnaja inicyjatyva ad apazycyi, nie źviazanaja z demakratyjaj i pravami čałavieka. Heta nievialički, ale biasprojhryšny krok. U pryncypie, ułady mohuć spakojna praihnaravać hetyja patrabavańni — ale dla hramadzkaści tady atrymlivajecca, što mienavita BNF budzie stajać za spraviadlivaść, i Frontu zastaniecca hety fakt pakłaści sabie ŭ kapiłku i zładzić raspaŭsiud infarmacyi pra jaho. Małavierahodna, ale mohuć ułady i adnavić ilhoty moładzi — heta atrymałasia b niepasiarednaj sastupkaj patrabavańniam BNF, što taksama naležała b kłaści ŭ kapiłku i raskručvać.
Prablema ŭ tym, što škalary i studenty pa biełaruskaj zaviadzioncy kasavańnie ilhotaŭ moŭčki prahłynuć. Ale ž takija rečy kopiacca, kopiacca — i adnojčy kolkaść pavinna pierajści ŭ jakaść.
Takija pačynańni musiać arhanična ŭpleścisia ŭ ahulny pasył apazycyi, zrabicca častkaju fundamentalnaj alternatyvy Łukašenku. Ekanomika, sacyjalnaja sfera, adukacyja, achova zdaroŭja — ułady treba krytykavać za kankretnyja pamyłki, jakija na sabie adčuvaje kožny čałaviek, pahatoŭ režym bahata zabiaśpiečvaje apazycyju nahodami dla hetaha.
Darečy, dahetul z boku arhanizavanaj apazycyi nie prahučała aformlenaj u vyraznaj zajavie krytyki prajektu rekanstrukcyi bernardynskaha klaštaru ŭ Miensku, što ździŭlaje. Čamu maŭčyć Partyja BNF, jakaja zaklikanaja być hałoŭnym abaroncam nacyjanalnaj spadčyny? Čamu maŭčyć nacyjanalna śviadomy palityk Milinkievič?
Mahčyma, jany bajacca «zaplamić» inicyjatyvu ab viartańni budynkaŭ svajoj padtrymkaj, kab sprava nie nabyła palityčnaje adcieńnie i ad taho kančatkova zhubiła šaniec być vyrašanaj na karyść viernikaŭ. Pavodle takoj ža lohiki pradprymalnickaja supolnaść raniej sprabavała dystancyjanavacca ad palityčnaj apazycyi: kali pytańnie nia budzie mieć pryncypovy i symbaličny charaktar, dabicca ad uładaŭ miłaści nibyta moža być praściej.
Ale heta trahičny i naiŭny samapadman, bo ŭłada tolki i čakaje raźjadnańnia siłaŭ, što supraćstajać joj.
Heta nia pieršaja padobnaja inicyjatyva Partyi BNF za apošni čas. Napiaredadni ŭhodkaŭ Čarnobylskaj katastrofy va ŭpravie BNF arhanizavany zbor srodkaŭ dla dziaciej, chvorych na ankalohiju.
Tak trymać. Treba bolš aziracca navokał i maleńkimi karysnymi spravami nabližać vialikuju pieramohu.
