Supracoŭnikam Nacbiblijateki treba ŭžo zaraz zavieści specyjalny kataloh ab prezydenckich vybarach. U chutkim časie jon moža papoŭnicca cikavymi knihami. Nakštałt... Feljeton Lolika Uškina .
Arens H.-Ch. Ja prosta fihieju. — Berlin, 2006. — 152 s.
Memuary pradstaŭnika kamisii ABSE pa pravach čałavieka. Cikavyja ŭražańni zachodniaha dyplamata padčas pieradvybarčaj kampanii, jakija cudoŭna paćviardžajuć narodny afaryzm: «Što nam dobra, to niemcu — śmierć».
Miłošavič, Słabadan. Z dumaju pra Biełaruś. — Haaha, 2006. — 46 s.
Pryśviečanyja Biełarusi frahmenty dziońnika, jaki vioŭ u turmie najlepšy siabra biełaruskaha narodu.
Knihu varta nabyć chacia b dziela apošniaj frazy: «Siońnia daviedaŭsia, što ZŠA pahražajuć jamu sankcyjami. Ad perspektyvy ciopłaj sustrečy sa starym siabram prosta tut u Haazie mnie zaniało dychańnie. Oj, niešta mnie drenna…. sapraŭdy dren…»
Niekatoryja pytańni ŭdaskanaleńnia praktyki asudžeńnia apazycyjaneraŭ za łajanku matam i niepadparadkavańnie pradstaŭnikam milicyi. Materyjały schodu biełaruskich sudździaŭ. — Miensk, 2007. — 280 s.
Paŭličenka, Dźmitry. Razmova pa-mužčynsku: novy styl bajavoha mastactva. — Miensk, 2006. — 4 s.
Absalutna novaje słova ŭ technicy rukapašnaj baraćby. Kab zavalić praciŭnika, vam nie spatrebicca bolej hadami pacieć u kačałkach. Dastatkova zabić jamu «strełku», prychapić z saboj 30 siabroŭ — i sam Klod Van Dam adpačyvaje!..
Sidaraŭ A. Jak pieražyć pieradvybarčyja kampanii ŭ Biełarusi. Parady dla ludziej, jakija chvarejuć na alerhiju ad čyrvonych i zialonych koleraŭ. — Małaja Bahaćkaŭka, 2006. — 76 s.
Kniha, pryznačanaja dla alerhikaŭ, padrabiazna raspaviadaje, jak pazbavicca sustrečy z pravakacyjnymi kolerami, naprykład, adziavać, vychodziačy na vulicu, čornyja akulary abo karystacca vyklučna televizaram z čorna-biełym ekranam.
Skobieleŭ, Eduard. Arbuzik, Biabieška i prafesar-debił. U troch tamach. — Miensk: Dziciačaja dumka, 2006.
Praciah viadomaj knihi ab pryhodach dvuch siabroŭ — Biebieški i Arbuzika. Na hety raz im supraćstaić nie siamichvostaja pačvara, a kudy bolš niebiaśpiečny vorah — «prafesar pedahohiki, jaki, atabaryŭšysia na haradzkim śmietniku, pahražaje destabilizavać sytuacyju ŭ horadzie, dzie žyvuć našyja hieroi».
[Biaz aŭtara i vychodnych źviestak.] Stralba pa mašynach u ludnych miescach. — Samavučyciel dla bajcoŭ hrupy «Ałmaz».
Trusaŭ, Aleh. Novyja tosty: Ab apošnich tendencyjach u biełaruskaj piciejnaj kultury, vyklikanych kampanijaj «Za Biełaruś!». — Smalensk: typahrafija Michajłava, 2006. — 555 s. + ilustracyi.
Kniha vyvučaje źmieny zastolnaha rytuału biełarusaŭ, kštałtu źjaŭleńnia pad upłyvam aficyjnaj prapahandy takich ekzatyčnych tostaŭ, jak «Za dastatak», «Za samabytnuju Biełaruś», «Za alimpijskuju Biełaruś», i jaje ŭpłyŭ na intensiŭnaść spažyvańnia alkaholu.
Šejmanovič, Alaksandar. Što rabić, kali vas nie puskajuć u Eŭropu. Brasłaŭ, 2006. — 56 s. + karcinki.
Praspekt rekamendavany dla turystyčnych aperataraŭ i turfirmaŭ, jakija pracujuć z klijentami, jakich pazbavili prava na ŭjezd u Eŭraźviaz.
Jarmolenka, Anatol. Słuchaj baćku: Libreta da adnajmiennaj opery j noty + mikrafon-karaokie. — Miensk: Muzyčnaja myśl, 2006. — 666 s.
Papularny tvor, asnovaj jakomu staŭ viadomy hit «Siabroŭ». Rekamendavany da pastanoŭki ŭ škołach i na ranišnikach u dziciačych sadkach.
Jarmolenka Anatol. Hladzi baćku: Libreta da adnajmiennaha mjuzykłu i noty. — Miensk: Muzyčnaja myśl, 2006. — 550 s.
Lehiendarny tvor, asnovaj jakomu staŭ viadomy hit «Siabroŭ». Rekamendavany da pastanoŭki ŭ škołach i na ranišnikach u dziciačych sadkach.
