Telekanał VVS2 pakaža siońnia dakumentalny film, u jakim raskazvajecca pra rolu savieckich pavietranych sił u praduchileńni raspaŭsiudžvańnia radyjeaktyŭnaha zabrudžvańnia na terytoryju Rasiei paśla vybuchu na Čarnobylskaj AES u 1986 hodzie.
The Sunday Telegraph cytuje interviju z majoram savieckich VVS Alaksiejem Hrušynym, jaki raskazaŭ brytanskim dakumentalistam, jak u 1986‑m hodzie ŭdzielničaŭ u aperacyi, metaj jakoj było stvareńnie štučnych apadkaŭ nad rajonam Čarnobylu, kab «zmyć» radyjeaktyŭnyja čaścicy i nia dać im raspaŭsiudzicca ŭ bok bujnych nasielenych punktaŭ — pierš za ŭsio ŭ bok Maskvy.
Lotčyki raspylali nad Čarnobylem jodyd srebra (AgJ), što pryvodziła da ŭtvareńnia ŭ pavietry bujnych kroplaŭ vady, jakija vypadali daždžom. Aŭtary filmu adznačajuć, što dziela vyratavańnia stalicy SSSR ad radyjeaktyŭnych apadkaŭ achviaravali bolš jak 4000 kvadratnych milaŭ terytoryi Biełarusi.
«Viecier dźmuŭ z zachadu na ŭschod, — zhadvaje Hrušyn, — i radyjeaktyŭnyja abłoki mahli dasiahnuć Maskvy, Varoniežu, Nižniaha Noŭharadu, Jarasłaŭlu. Kali b doždž prajšoŭ nad hetymi haradami, heta było b katastrofaj dla miljonaŭ. Rajon, dzie maja kamanda ŭździejničała na abłoki, znachodzicca pobač z Čarnobylem — nia tolki ŭ 30‑kilametrovaj zonie, ale i na adlehłaści 50, 70 i navat 100 km».
Jak adznačaje The Sunday Telegraph, u Kramli zaŭždy admaŭlali, što nad Biełaruśsiu stvaralisia štučnyja daždžy paśla Čarnobylskaj katastrofy. Ale letaś, kali adznačałasia 20‑hodździe katastrofy, Alaksiej Hrušyn apynuŭsia adnym z tych, chto znajšoŭ u sabie mužnaść raskazać praŭdu. Jon taksama kaža pra toje, što za svaju pracu atrymaŭ dziaržaŭnuju ŭznaharodu.
Žychary Homielu pamiatajuć, jak nieŭzabavie paśla vybuchu ŭ Čarnobyli na horad praliŭsia «čorny doždž». Siońnia viadoma, što hety doždž byŭ radyjeaktyŭnym i stvoranym štučna.