 |
Juščanka, jaki siadzieŭ za stałom u pres‑centry sakrataryjatu prezydenta, paviedamiŭ, što padpisaŭ novy ŭkaz, jakim pryznačyŭ inšuju datu daterminovych parlamenckich vybaraŭ — 24 červienia.
Jon pa sutnaści pryznaŭ paśpiachovaść taktyki kaalicyi, jakaja palahała ŭ bajkatavańni jahonaha papiaredniaha rašeńnia.
Juščanka raskazaŭ, što «ŭziaŭ da ŭvahi» zajavu Centrvybarkamu pra adsutnaść kvorumu na ichnich pasiadžeńniach, što zrabiła niemahčymaj padrychtoŭku da vybaraŭ 27 traŭnia.
— Ja davioŭ da premjer‑ministra Ŭkrainy svaju rezkuju ŭsturbavanaść faktyčnaj admovaju Kabinetu ministraŭ zabiaśpiečyć finansavańnie vašaha volevyjaŭleńnia. Heta ŭčynak, jaki miažuje z parušeńniem kryminalnaha zakonu, — paviedamiŭ Juščanka z teleekranaŭ u zvarocie da hramadzianaŭ.
Dalej Juščanka nahadaŭ, što minuŭ užo miesiac, jak u Viarchoŭnaj Radzie była pierafarmatavanaja kaalicyja, kali da jaje na indyvidualnych padstavach dałučyłasia hrupa pradstaŭnikoŭ apazycyi.
Heta, pavodle słoŭ Juščanki, supiarečyć normam Kanstytucyi, što kaalicyja stvarajuć tolki frakcyi.
— Ciapier prezydent Ukrainy ŭ poŭnaj miery moža realizavać svajo prava raspuścić parlament na padstavie artykułu 90 Kanstytucyi Ŭkrainy, — skazaŭ Juščanka. — Ja padpisvaju ŭkaz pra pryznačeńnie pazačarhovych vybaraŭ Viarchoŭnaj Rady Ŭkrainy na 24 červienia 2007 hodu.
Raniej pradstaŭniki apazycyi aburalisia, što Juščanka ŭ pieršym ukazie nie spasyłaŭsia na 90‑y artykuł, dzie vykładzienyja padstavy rospusku parlamentu.
Zrešty, na momant napisańnia hetych radkoŭ sam tekst ukazu na sajcie kiraŭnika dziaržavy nie źjaviŭsia.
Tamu možna tolki mierkavać, što ŭ dakumencie paznačanyja novyja padstavy dla rospusku parlamentu.
Kali nasamreč tak, to Juščanka raźviazaŭ dla siabie prablemu z Kanstytucyjnym sudom, pabojvacca rašeńnia jakoha ŭ prezydenta byli ŭsie padstavy.
Pra toje, što svaim ukazam Juščanka nia prosta pieranios datu vybaraŭ, ale i pa‑sutnaści druhi raz raspuściŭ parlament, śviedčyć i data novaha hałasavańnia — 24 červienia. Heta akurat 60‑y dzień, kali ličyć ad 25 krasavika.
A, jak viadoma, pa Kanstytucyi daterminovyja vybary pravodziacca ciaham 60 dzion paśla prypynieńnia paŭnamoctvaŭ papiaredniaha parlamentu.
Novy ŭkaz, vidavočna, budzie vydadzieny naŭzamien staroha, a tamu ŭ Kanstytucyjnym sudzie daviadziecca zakryć razhlad spravy, jakuju jany słuchali ciaham apošnich vaśmi dzion. Tym samym dziejańni Juščanki dazvolać «abnulić» sytuacyju ŭ KS.
Ciapier, navat kali kaalicyja zachoča abskardzić ukaz prezydenta ŭ Kanstytucyjnym sudzie, ich nia budzie čakać paŭtor takoha tryjumfalnaha razhladu pytańnia, jaki adbyvajecca pad kiraŭnictvam Siuzany Stanik.
Pa sutnaści novy ŭkaz jość kracham hetaj žančyny. Jaho razhlad u Kanstytucyjnym sudzie budzie vymahać abrańnia novaha dakładčyka. A, uličvajučy historyju z spadaryniaj Stanik, druhi raz nia ŭdasca paŭtaryć manipulacyi, jakija faktyčna addali spravu ŭ patrebnyja dla kaalicyi ruki.
Adnačasova, ciapier źjaŭlajucca j inšyja ryzyki — što dakładčykam stanie sudździa, anhažavany na karyść Juščanki.
Jašče adzin niuans, jaki źviartaje na siabie ŭvahu, — ukaz prezydenta źjaviŭsia ŭ momant, kali Janukovič znachodziŭsia va Ŭzbekistanie. Navat ekstranaje viartańnie z hetaj siarednieazijackaj krainy zojmie jak najmieniej paŭsutak, ciaham jakich kaalicyja nia zmoža narmalna vypracavać taktyku dziejańniaŭ u novych umovach.
Fota pres-słužby prezydenta Ŭkrainy
