Pradoŭžym pačataje papiarednim artykułam znajomstva ź cikavymi źviestkami novaha apytańnia NISEPD.
Adna z vyraznych tendencyjaŭ — praciah palaryzacyi hramadztva. U pryvatnaści, heta tyčycca hieapalityčnaha vybaru Biełarusi.
Nahadaju, u sytuacyi hipatetyčnaha vybaru miž abjadnańniem z Rasiejaj i ŭstupleńniem u Eŭraźviaz praporcyja takaja: 47,3% vs 34,7%. Hod tamu było 56,5% vs 29,3%, tak što praeŭrapiejcaŭ paboleła.
Voś vyraznaja charaktarystyka dźviuch hrupaŭ: “…Ideja abjadnańnia z Rasiejaj u bolšaj stupieni padtrymlivajecca žančynami, ludźmi stałaha vieku, mieniej adukavanymi, pensyjanerami, a taksama žycharami ŭschodnich rehijonaŭ krainy i bolej drobnych nasielenych punktaŭ. Prychilniki zachodniaha vektaru zaŭvažna maładziejšyja i bolej adukavanyja. Siarod ich bolej pracaŭnikoŭ niedziaržaŭnaha sektaru, studentaŭ i navučencaŭ, a taksama žycharoŭ zachodnich rehijonaŭ krainy i bolej bujnych pasialeńniaŭ”.
Jašče para štrychoŭ: prarasiejskaja publika bolej biednaja i mieniej talerantnaja da zamožnych suajčyńnikaŭ (32% ź jaje liku staviacca da bahaciejšych admoŭna, u toj čas jak siarod praeŭrapiejcaŭ takich niadobrazyčliŭcaŭ tolki 17,3%). I razam z tym prarasiejcy mieniej schilnyja dałučycca da akcyjaŭ pratestu ŭ vypadku, kali materyjalnaje stanovišča pahoršycca. Voś vam mentalnaść: budu zajzdrościć bahaciejšym, ale što da zmahańnia za lepšaje žyćcio — chaj inšyja łob padstaŭlajuć!
Tut usio nastolki krasamoŭna, što i kamentavać, badaj, nia varta. (Chiba što zastajecca hadać, čamu da Rasiei, dzie žanockaja dola zaŭždy była nialohkaj, bolej ciahnucca kabiety. Mo jany sami patłumačać? :-)
Zrešty, voś jaki momant važny. Nia varta dumać, što ŭsie prychilniki rasiejskaha vybaru hatovyja tak voś uziać dy i achviaravać niezaležnaściu. Peryjad “sajuznaha budaŭnictva”, kali prapahandavaŭsia fantastyčny pražekt ahulnaje dziaržavy pry zachavańni dvuch suverenitetaŭ, mnohim prosta zatłumiŭ mazhi. Kali ž stavicca bolej dyferencyjavanaje pytańnie pra varyjanty stasunkaŭ z uschodniaj susiedkaj, dyk za źlićcio ŭ dziaržavu z adnym prezydentam, ściaham, vojskam, valutaju i h.d. vykazvajucca tolki 8,3%. Inšyja ž — za chaŭrus niezaležnych dziaržaŭ (43,5%) abo uvohule za takija ž dačynieńni, jaki i ź inšymi krainami SND (41,6%).
Tak što ciahu ŭ imperyju pierabolšvać nia varta. Zrešty, i z eŭrapiejskim vybaram nia ŭsio tak prosta. Chaj palityki-eŭraentuzijasty nadta nie łunajuć u empirejach :) Pavodle sacyjolahaŭ, Eŭropa ŭ biełarusaŭ najpierš asacyjujecca z zamožnaściu, dabrabytam. I značna radziej — z palityčnymi kaštoŭnaściami. Zvyš taho, u hramadztvie raście prasłojka tych, kaho sacyjolahi nazyvajuć izalacyjanistami. Maŭlaŭ, nia treba nam ni Rasieja, ni Eŭropa, pražyviem niejak sami pa sabie. Ich dola ŭzrasła da 28,8% (pry kancy 2005 hodu było tolki 18%).
Stanoŭčaja heta źjava ci nie? Jak zaŭvažajuć aŭtary apytańnia, “na ładnaj dystancyi ad ŭsiaśvietnych centraŭ upłyvu trymajucca i Švajcaryja, i Paŭnočnaja Kareja, ale sytuacyja ŭnutry hetych krainaŭ adroźnivajecca kardynalna”.
Tak što hety fenomen izalacyjanizmu treba jašče asensavać. Zastajecca spadziavacca, što durniaŭ žyć, jak u KNDR, usio ž niašmat :-)
