Čałaviek, jaki moža sumlenna hladzieć u vočy lubomu biełarusu...
6 listapada ŭ Rezydencyi Biełaruskaha Narodnaha Frontu «Adradžeńnie» adbyłasia viečaryna, pryśviečanaja 60-m uhodkam mastaka j hramadzkaha dziejača Jaŭhiena Kulika. Ja.Kulik naradziŭsia ŭ Miensku, skončyŭ Mienskuju mastackuju vučelniu i Biełaruskuju akademiju mastactvaŭ (adździaleńnie žyvapisu) ŭ 1963 hodzie. Siabra Biełaruskaha Sajuzu mastakoŭ. Pracuje ŭ halinie knižnaj i stankovaj hrafiki. Tema tvoraŭ — biełaruskaja historyja i kultura. Aŭtar šerahu chrestamatyjna viadomych tvoraŭ.
Viali viečarynu Alaksiej Maračkin i Mikoła Kupava. Jubilara vinšavali Vasil Bykaŭ, Lavon Barščeŭski, Jury Chadyka, Ryhor Baradulin dy inšyja.
Vincuk Viačorka: «... Vy brali na siabie misiju idejnaha natchnieńnia biełaruskaha nacyjanalnaha vyzvaleńnia... Idealny mastacki hust. Kali mastackuju źjavu acaniŭ Jaŭhien Kulik, uchvaliŭ jaje, to heta reč vartaja žyćcia, vartaja Biełarusi... I, napeŭna, samy važny ŭrok, jaki ja ŭziaŭ ad Vas — heta viernaść, kamiennaja ćviordaść i addanaść biełaruskaj idei».
Uładzimier Višnieŭski, mastak-hrafik, akademik Biełaruskaj akademii mastactva: «Dla našaha pakaleńnia Jaŭhien Siarhiejevič Kulik byŭ jak by patryjarcham najnoŭšaha adradžeńnia biełaruskaj śviadomaści. Va ŭsiakim razie dla našaha pakaleńnia mastakoŭ, jakija pryjšli ź viadomaj škoły-internata Achremčyka. Byŭ jak by zorkaj dla nas».
Nił Hilevič: «Kab mnie pryjšłosia znajomić niekaha ź Jaŭhienam Kulikom, ja skazaŭ by: voś čałaviek, jaki moža zusim spakojna, sumlenna hladzieć u vočy lubomu biełarusu i ŭsiamu biełaruskamu narodu, i ŭsioj siniavokaj našaj Biełarusi. I ja dumaju, što my budziem žyć. Zyjdzie ŭsia hetaja šumapiena, usia šumamieć, hety brud. Moža być, projdzie vialiki čas, doŭhi čas. 100 hadoŭ... I tady hlanuć na partret Kulika i skažuć: voś čałaviek, jaki ŭsim svaim žyćciom zasłužyŭ prava sumlenna hladzieć u vočy nam, naščadkam, u našaj novaj svabodnaj naviek Biełarusi. Heta niamała. Ja hanarusia našym znajomstvam, tym, što my razam zmahajemsia».
Anatol Klaščuk, fatohraf-mastak: «... Liču jaho svaim duchoŭnym nastaŭnikam. Hety čałaviek navučyŭ mianie canić kaštoŭnaści. Kali mnie niešta ŭdajecca ŭ fatahrafii, to ŭ lepšych zdymkach jość čaścinka jahonaje navuki».
Eduard Ahunovič, mastak-muzeohraf: «Uspaminajecca jahonaja majsternia, tam nia tolki zaradziłasia jadro vystavak, idei vystavak. Jaŭhien Kulik ich zadumvaŭ. A my ich vykonvali. Uspaminajucca tyja pytańni, jakija my abmiarkoŭvali. Pamiataju, jak hadzińnik, jaki nie pracavaŭ, raptam zabiŭ na ścianie. Ja dziakuju losu, što sustreŭ jaho ŭ svaim žyćci, i jon adyhraŭ vialikuju rolu ŭ tym, što ja staŭ mastakom-muzejnikam».
Maja Janickaja, historyk mastactva: «Vy stajali la vytokaŭ našaha adradžeńnia. I ja ŭdziačnaja Ŭładzimieru Karatkieviču, što jon paznajomiŭ mianie z Valancinam Ždanovičam, a toj z vami... vy vydatny biełaruski mastak. Ja paraŭnoŭvaju Vas z Napaleonam Ordam».
Sułkoŭski Ŭładzimier: «... Jak ciažka arhanizavać druhoha mastaka. Treba prykłaści šmat enerhii, svajho ŭłasnaha času...»
Leŭ Miračycki, historyk: «Vy pradaŭžalnik spravy Drazdoviča i Sierhijeviča, Paŭłoviča i Ordy».
Ryhor Baradulin, paet: «... Maja mama ciabie duža lubiła. Ty aformiŭ adnu maju knižku z partretam mamy».
Jaŭhien Kulik: «... U maim žyćci heta vialikaja padzieja, i vašaje słova vyklikaje ŭ mianie hordaść i ščaście. Ja ŭsim rady. Usie my za adnu spravu. Za kulturu, za našu movu. I hałoŭnaje — za našu niezaležnaść. Sałodkaje słova svaboda, ale jano horkaje, kali nie svabodnaja baćkaŭščyna. Dyk za volnuju baćkaŭščynu, za volnuju Biełaruś. Žyvie Biełaruś volnaja, niezaležnaja i demakratyčnaja. A pieramoha budzie za nami. Što datyčycca majho jubileju, dyk jubilei prychodziać i adychodziać, a zaŭtra my ŭprahajemsia ŭ pracu, zaŭtra ŭ nas sojm i znoŭ naša baraćba. Niachaj jana doŭžycca da taho času, pakul my nie pieramožam. A my pieramožam. A my pieramožam».
Hienadź Sakałoŭ-Kubaj
