PIVA ZA BIEŁARUŚ
Alaksandar KUDRYCKI
MUŽČYNY LEPŠ LUBIAĆ ŚVIETŁAJE PIVA, A ŽANČYNY – CIOMNAJE
Konkurs "Piva za Biełaruś" vyjaviŭ, što biełarusy najbolš lubiać napoi mienskaj "Krynicy". Naš karespandent zavitaŭ da inžynera-technolaha brovaru. Hutarka išła za butelkaj chałodnaje "Krynicy-1". Na žal, jon nie zachacieŭ, kab my pisali jahonaje imia (i heta vielmi typova dla biełarusaŭ), maŭlaŭ, jon nie vysoki načalnik, a zvyčajny pracoŭny, i toje, što jon raskazaŭ, moh by raskazać luby inšy rabotnik "Krynicy".
– My ŭsie pjem piva, ale daloka nia kožny viedaje, jak jaho vyrablajuć. Choć raniej šmat chto ŭ Biełarusi ŭmieŭ varyć piva (tut zhadvajecca i cudoŭny Karatkievičaŭ vierš "Zajac varyć piva").
– Pieršaja stadyja – soładaraščeńnie. Jačmień padsušvajuć, a zatym praroščvajuć u admysłovych umovach na hradach i vysušvajuć u soład. Soład byvaje rozny – śvietły, ciomny, karamielny. Časam da jaho dadajuć rys, cukar, kukuruzu (heta, praŭda, na Zachadzie, u nas – redka). Potym na praciahu sutak varycca susła, jakoje zatym achałodžvajecca i filtrujecca, šeść-siem dzion brodzić i dabrodžvaje ad vasiamnaccaci da piacidziesiaci dzion u zaležnaści ad hatunku.
– Našy čytačy nazvali lepšym mienavita ciomnaje piva. A ŭ čym roźnica pamiž ciomnymi i śvietłymi hatunkami?
– Ciomnyja i śvietłyja pivy hatujuć pa-roznamu. Śvietłaje piva zvaryć trochi lahčej. Pry vyrabie ciomnaha piva za košt padvyšeńnia temperatury idzie reakcyja karamielizacyi. Toj, chto kali-niebudź varyŭ cukar, viedaje, što na ahni jon patrochu žaŭcieje, a potym uvohule ciamnieje. Niešta padobnaje adbyvajecca i ź pivam. Mienavita z-za karamielizacyi piva atrymlivaje hłyboki ciomna-burštynavy koler.
– U konkursie «Piva za Biełaruś» pieramahli «Staražytnaje» i «Porter». «Leŭ» taksama zaniaŭ nie apošniaje miesca. Čym roźniacca hetyja, usie ciomnyja, hatunki?
– Pierš za ŭsio ščylnaściu – masavaju dolaj suchich rečyvaŭ, raspuščanych u napoi. «Staražytnaje» varycca na kancentracyi kvasnoha susła i maje ščylnaść 12 %, a "Leŭ" i "Porter" hatujucca na karamielnym suśle i majuć ščylnaść adpaviedna 13 % i 20 %. Hatunki adroźnivajucca taksama i masavaju dolaj śpirtu – u «Staražytnym», naprykład, jana moža dasiahać 16 %. Roźnicca i čas dabrodžvańnia. Daŭžej za ŭsich dabrodžvaje "Porter" – 50 dzion, a voś dla piva kštałtu "Žyhuloŭskaha" dastatkova 21 dnia.
– Čym vy rastłumačycie toj fakt, što "Žyhuloŭskaje" pryznanaje samym horšym hatunkam?
– Ciažka skazać. Mahčyma, syravina ŭ hetym hodzie nia vielmi ŭdałaja. Darečy, hatunak "Krynica-1" – heta, faktyčna, tyja samyja "Žyhuli". Daviałosia pierajmienavać, bo pradavać u Rasiei piva z nazovam "Žyhuloŭskaje" my paprostu nia majem prava. A voś "Krynica-2, -3, -4" – našy ŭłasnyja raspracoŭki.
– Jak stvarajecca novy hatunak?
– Nielha prosta vyhuknuć "eŭryka!" i adrazu zvaryć novaje piva. U jaho stvareńni ŭdzielničajuć amal usie supracoŭniki – hałoŭny pivavar, astatniaje načalstva, technolahi, labaratoryja źbirajucca razam i abhavorvajuć skład novaha hatunku, padbirajuć syravinu. U piva zvyčajna niama peŭnaha aŭtara, ale i tut byvajuć vyniatki. Tak, ideju stvaryć piva "Leŭ" prapanavaŭ paru hod tamu sam hieneralny dyrektar "Krynicy" sp. Badroŭ. A voś hatunak "Dražnia" (pa pakazalnikach taksama vielmi padobny da "Žyhuloŭskaha") nie pryžyŭsia. Bolšaść pakupnikoŭ prosta nie razumieli nazvy i piva raskuplałasia nia tak, jak nam hetaha chaciełasia b.
– Ci možacie vy paraŭnać biełaruskaje piva i pradukcyju zachodnieeŭrapiejskich brovaraŭ?
– Heta zrabić dosyć ciažka, bo padychody da piva tam i tut vielmi roznyja. Zachodniaje piva ŭtrymlivaje šmat ałkaholu i tamu maje mienšuju ščylnaść. Asabista mnie jano padajecca trochi pustym na smak, tamu mnie bolš padabajecca biełaruskaje, asabliva – "Mienskaje". Darečy, u nas na zavodzie žančyny lubiać ciomnaje, a mužčyny – śvietłaje piva. Ale heta ŭžo sprava hustu. "Krynica" vyrablaje kala 6,5–6,7 miljonaŭ dekalitraŭ piva ŭ hod, vybirać jość z čaho.
