Vadzim Karcaŭ. Čałaviek z ružžom

Vadzim Karcaŭ

Čałaviek z ružžom

Stałasia tak, što naša milicyja, nadzvyčaj zaniataja palityčnym pieraśledam apanentaŭ režymu, nia moža siońnia vystupić harantam biaśpieki žyćcia j zdaroŭja dla ŭsich hramadzianaŭ. Ź inšaha boku, na padmohu miascovym bandytam praz adčynienuju ŭschodniuju miažu na «hastroli» j na «pastajanku» bieśpieraškodna jeduć da nas kryminalniki roznaha ranhu: ad kišeńnikaŭ da varoŭ u zakonie.

U hetkich umovach adnym sa šlachoŭ supraćstajańnia złačynnaści zastajecca samaŭzbrajeńnie. Pryčym, kali ad napadu na vulicy možna adbicca z dapamohaju elektrašokiera, hazavaha pistaleta ci balončyka, dyk nadziejna abaranić žytło ad uvarvańnia niaprošanych haścioŭ ni pamianionymi srodkami, ni ŭstanoŭkaju ŭzmocnienych dźviarej niemahčyma.

Statystyka śviedčyć, što mienavita kvatery z stalnymi dźviaryma stanoviacca abjektam pilnaj uvahi złodziejaŭ, jakija imknucca patrapić tudy padmanam ci praz vokny. Spraŭdzić pryncyp «moj dom — maja krepaść», abzavioŭšysia adno pasyŭnymi srodkami achovy, ciažka. Kompleksny padychod da arhanizacyi biaśpieki svaje j svaich rodnych patrabuje najaŭnaści ŭ chatnim arsenale instrumenta aktyŭnaha ŭździejańnia — sama mała siakiery. Aptymalnym ža bačycca nabyćcio ahniastrelnaj zbroi. Biełaruskaje zakanadaŭstva praduhledžvaje dastatkova liberalny paradak pakupki spartova-palaŭničych ružžaŭ. Isnujuć, praŭda, abmiežavańni techničnaha planu: rula nie pavinna być naraznoju j karaciejšaju za paŭmetry.

Ale ŭ haradzkich umovach, na blizkich adlehłaściach, efektyŭnaść hładkastvolnaj zbroi ci nie najbolšaja z-za šyrokaha vuhła paražeńnia i, adpaviedna, mahutnaha spyniajučaha ŭździejańnia pry strele šrotam, u adroźnieńnie ad strełu kulaj z naraznoha stvała, kali isnuje vialikaja ryzyka niepažadanaha patrapleńnia rykašetam. Z hetych pryčynaŭ, darečy, «vinčester» — zvykłaja zbroja palicejskich na Zachadzie. Jak tut nie zhadać doblesnych aŭtamatčykaŭ na mienskich vulicach. Viedajučy charaktarystyki «kałašnikava», ja rekamendavaŭ by haradžanam spać na padłozie j nie padychodzić da voknaŭ, kab nie schapić ad jakohaś achoŭnika paradku šalnuju kulu.

Pieršaj farmalnaściu pierad nabyćciom strelby stanie vašaje ŭstupleńnie ŭ Biełaruskaje vajskova-palaŭničaje tavarystva z atrymańniem jehierskaha biletu paśla zdačy prostaha tearetyčnaha ispytu j piaci strełaŭ pa mišeni na stendzie. Spadziajusia, hetaja pracedura nie natchnić kahości sapraŭdy pajści ŭ les i zabivać biednaje źviarjo. Potym u dazvalalnaj systemie adździeła ŭnutranych spravaŭ pa miescy žycharstva vam raspaviaduć, jakich pamieraŭ musić być žaleznaja skrynia dla zachoŭvańnia zbroi ŭ chacie (pravieryć učastkovy); jakich lekaraŭ treba abyści dla atrymańnia medyčnaje daviedki; čaho nielha rabić, kab nie patrapić pad dziejańnie Kryminalnaha kodeksu.

Treci etap — pachod u kramu. Nie abciažarvajciesia rozdumam — nabyvajcie samaje tannaje, bo ryzyki kupić niešta niajakasnaje, što moža razarvacca ŭ rukach, praktyčna nie isnuje: usie madeli pierad pastupleńniem u prodaž prachodziać ščylny kantrol i vyprabavańni ŭ admysłovym sertyfikacyjnym centry. Najlepšy piacizaradnik amerykanskaj vytvorčaści kaštuje siońnia kala 250 dalaraŭ; ižeŭskaja dubaltoŭka — blizu $180; naboi — pa 50 centaŭ.

Nie praminu skazać kolki słovaŭ pra palityčny aspekt uzbrojvańnia nasielnictva. Kali ŭ balšyni chataŭ budzie pa stvale, dyk abychodzicca z narodam całkam i z kožnym paasobku ŭłady buduć bolš akuratna, čym ciapier. I kanstytucyjnyja pravy padumajuć ci kranać, i suverenitet pad sumnieŭ nie pastaviać, i vydaču zarobkaŭ nie zaciahnuć. A čaho-niebudź pra jakich-niebudź surhuckich niedanoskaŭ i blizka nie pačujem. Čałaviek z ružžom — subjekt palityki, tradycyjna varty pavahi.