Razmova idzie pra vierasień
Apazycyja budzie čakać sustrečnych krokaŭ jašče miesiac
Pra heta damovilisia Staršynia VS Siamion Šarecki z pasłom ABSE Hansam-Hieorham Vikam i jahonym namieśnikam sp.Hansam Klajneram.
Sustreča adbyłasia ŭčora, 22 žniŭnia, u Vilni, u siadzibie Tvarystva Biełaruskaj Kultury ŭ Litvie. Paśla pieramovaŭ pry začynienych dźviarach sp.Šarecki adkazaŭ na pytańni karespandenta «NN».
S.Šarecki: Heta ŭžo treciaja maja sustreča z pradstaŭnikami ABSE. Sp.Vik vykonvaje pastanovy hetaj arhanizacyi, u jakuju ŭvachodziać pradstaŭniki parlamentaŭ z 54 krainaŭ, kab znajści vychad z taho kryzysu, što ŭtvaryŭsia ŭ Biełarusi. Jany spadziajucca, što ekanamičny stan i mižnarodnaja izalacyja, u jakich znachodzicca Łukašenka dy jahony ŭrad, zmusiać jaho sieści za stoł pieramovaŭ. Ale ja siońnia padniaŭ pytańnie pra apošnija zajavy Łukašenki pra toje, što jon na pieramovy z apazycyjaj nia pojdzie, a budzie «razmaŭlać z hramadzkaściu». Na što spadar Vik adkazaŭ hetak: «Kali jon sarvie pieramovy, chaj narakaje paśla na siabie».
— Što majecca na ŭvazie?
— Inšyja dziaržavy, mižnarodnyja arhanizacyi adrazu adreahujuć na heta rezka nehatyŭna — dalejšaj izalacyjaj i ihnaravańniem jaho dy jahonaha ŭradu.
— A što da planavanaha Vami padpisańnia zajavy pra pierajmańnie abaviazkaŭ prezydenta?
— Ja hetaje pytańnie pierad Vikam nie padymaŭ. Bo heta ž vynikaje z Kanstytucyi. I nijak nie kranaje pracesu pieramovaŭ. Heta miž saboju nie źviazana. Usio vyrašana ŭ našaj Kanstytucyi.
My damovilisia sustrecca ŭ Vilni nanoŭ praź dziesiać dzion. Spadar Vik pryviazie kankretnyja prapanovy pa składzie delehacyi i pa terminie pačatku pieramovaŭ.
— Ci ŭjaŭlajecie Vy sabie pieramovy z Łukašenkam?
— Admaŭlać hetaha nia treba. Ale viedajučy Łukašenku... Nivodzin dyktatar nie stanaviŭsia demakratam. Pieramovy praduhledžvajuć pavahu da druhoha boku. Sumniajusia, što Łukašenka na heta zdolny.
— Ci vyznačaŭsia termin, da jakoha Vy, biełaruskaja apazycyja i ABSE hatovyja čakać krokaŭ nasustrač?
— Razmova idzie pra vierasień.
Hutaryŭ Siarhiej Chareŭski
