Mikoła Statkievič haładaje 15 dzion
Znachodziačysia pad vartaju ŭ śledčym izalatary UŽ 15/I31 Miensku, na Vaładarcy, lider Narodnaj Hramady Mikoła Statkievič užo 15-y dzień trymaje haładoŭku pratestu. Jaho zatrymali ŭviečary paśla «Maršu Svabody» jak arhanizatara. Jak viadoma, sacyjał-demakraty-Narodnaja Hramada nie pryznajuć Łukašenku prezydentam, bo ličyć jaho nielehitymnym. Tamu, a taksama dziela taho, što jahony aryšt — jaŭna palityčny, Statkievič i abviaściŭ haładoŭku.
Namieśnik staršyni BNF Jury Chadyka, jaki haładoŭkaju dabiŭsia vyzvaleńnia z Vaładarki, kaža, što pad čas haładoŭki hałoŭnaje — bolš dychać śviežym pavietram (nie prapuskać prahułak), pić bolš vady, karystacca klizmaju dla ačystki arhanizmu.
Prykładna na 10—11 sutki, kaža, źnikaje pačućcio hoładu, a na 15-yja ŭźnikaje niejkaja lohkaść, svojeasablivaja eŭfaryja. Paśla hetaha vychodzić z haładoŭki ŭžo vielmi ciažka. Padzieńnie cisku ž i strata prytomnaści adbyvajecca krychu paźniej, dzieści na 23—25-yja sutki haładoŭki.
Statkieviča naviedvajuć naša słaŭnaja advakatka Taciana Stankievič, što ŭžo nie adnaho dobraha čałavieka abaraniała, i jahonaja žonka Valancina, što schacieła być mužavym hramadzkim abaroncam.
Na 11-ja sutki turmy Statkieviča za haładoŭku pieraviali ŭ PKT, to bok karcer, jak złosnaha parušalnika režymu. Kinuŭšy źniasilenaha čałavieka ŭ kamoru z betonnaju padłohaju i vuličnaju temperaturaj, turemščyki chočuć złamać volu Statkieviča, kab jon spyniŭ haładoŭku. Siłkom jaho jašče nie karmili.
My z Vami, spadar Mikoła, trymajciesia, nie paddavajciesia!
Alaksiej Šydłoŭski
Kamientary