Naviny ź Biełarusi za subotu j niadzielu
Z turmy na źjezd
U subotu dasiedzieŭ za Marš Svabody Anatol Labiedźka. Prosta z Akreścina jaho pavieźli ŭ pałac «Sukno» na źjezd BNF, i tam jon, jašče nia źbiŭšy ź siabie astrožnaha pyłu, kinuŭsia ŭ dyskusii. Chaj by svaju AHP dałučaŭ da novaha Frontu, usim było b na karyść. Aryštam Labiedźki nadta aburyłasia Eŭropa — jon ža źjaŭlajecca specyjalna zaprošanym ŭ Radu Eŭropy.
Spekharda dastali
Denieł Spekhard napisaŭ list Miaśnikoviču, dzie prosić tłumačeńniaŭ: maŭlaŭ, što heny mieŭ na ŭvazie, kažučy, što Zachad daŭ hrošy na toje, kab «łamać, krušyć i padpalvać». Amerykanski pasoł paličyŭ heta źniavahaju. My, piša, za toj hod nadali Biełarusi humanitarnaj dapamohi na 15 miljonaŭ dalaraŭ, u tym liku adnych lekaŭ na 5,8 miljonaŭ, a vy paklopničajecie. A Miaśnikovič aby-što budzie kazać, aby praŭdy nie skazać.
U Rasiejskim teatry — škłoŭski samazvaniec
U Rasiejskim teatry Barys Łucenka pastaviŭ novy spektakal pavodle tvoraŭ Puškina. Nazyvajecca «Biasieda pad čas čumy», ale j z «Zaviruchi», i z «Andžela», i asabliva z «Kamedyi pra Barysa Hadunova dy Ryhorku Atrepjeva» tam šmat jość. Heta i drama, i rok-opera, i teatar adnaho aktora — Uładzimiera Šelestava, jaki adnačasova hraje cara Barysa, falšyvaha Dźmitra, patryjarcha, Šujskaha, bažavolnaha i jašče paru persanažaŭ. Bilety ŭ Rasiejski teatar zusim tannyja — ad 55 tysiačaŭ rubloŭ. Nia toje, što ŭ balet, dzie jany kaštujuć usie bolš za miljon.
Investycyi ŭ Biełaaziorsk
Našy chočuć znajści investycyi na rekanstrukcyju Biarozaŭskaj DRES. Kaliści heta była pieradavaja stancyja, da jakoj ad Biarozy admysłova padviali čyhunku i jakaja pracavała na vuhli j mazucie. Ciapier jana sastareła, zavalvaje vakolicu sažaju. Dyk u Prahu na ekanamičny forum krainaŭ Centralna-Eŭrapiejskaj hrupy paviazuć stratehičny prajekt, kab chto daŭ hrošaj na rekanstrukcyju.
Vykładčyki šyrajucca
U maładoha vykładčyka Mahiloŭskaje vučelni kultury na pracoŭnym miescy milicyja znajšła 60 h marychuany, piša BiełaPAN. Chto na jaho dakazaŭ — ci vučni, ci dyrektar, nieviadoma. Nieviadoma pakul taksama, ci jon sam tyja kanopli siejaŭ, ci dzie ŭ kaho pierakupiŭ.
Dajeździlisia
Palaki ŭviali abmiežavańnie: ciapier biełarusam možna budzie da ich jeździć nie čaściej, čym dva razy na miesiac. Dastali biełarusy palakaŭ svaim špikulanctvam: ciahnuli jany ŭ Polšču ŭkrainski špirt, mienskuju harełku, pinskija zapałki, bieraściejskija lampački, kałhasny superfasfat, i ŭsio na ciele, i ŭsio pad bializnaju. Palaki čakali, čakali, što našych jakaja skuła voźmie. Aniahož. Abrydła palakam łazić da našych ciotak pad bializnu. Ciapier, kab napałochać, taksama vyrašyli jany nia tolki skanfiskoŭvać kantrabandu, ale j davać kantrabandystam vialikuju karu.
Vilenskija mroi
Teatar adnaho aktora «Źnič», jaki kvataruje ŭ Čyrvonym kaściole, pačaŭ svoj 10-y sezon spektaklem «Vilenskija mroi», pastaŭlenym pavodle ŭspaminaŭ Juljany Vitan-Dubiejkaŭskaj pra Ivana Łuckieviča, jejnaje niezabyŭnaje kachańnie. Uspaminy vydała «Naša Niva» ŭ 1994 hodzie. Kvietku Vitan ihraje Halina Dziahileva.
Łukašenka nakryčaŭ na Sieviaryna
U subotu paśla abiedu Łukašenka pryniaŭ kiraŭnika rabočaj hrupy Parlamenckaj Asamblei Sieviaryna i niebaračku pradstaŭnika ABSE ŭ Biełarusi Vika. Tyja stali kazać pra pierarvany dyjaloh, pra aryšty. Tady Łukašenka daŭ im jasnuju pytlu: «My znajem, chto choča sarvać hety dyjaloh. My možam pradastavić vam dakumenty z usimi proźviščami, u tym liku i vašymi». Hety i čortu ŭ piekle daść fajeru.
MAHATE budzie nas rapsam karmić
U Miensk pryjaždžaŭ dyrektar MAHATE Cichuj Ciań i sustarkaŭsia z Łukašenkam. Damovilisia, što hetaje ahienctva pa atamnaj enerhii daść Biełarusi na nastupnyja dva hady 1,2 miljony dalaraŭ, kab na hetyja hrošy pačali ŭ Čarnobylskaj zonie sadzić raps. Byccam by raps usiu radyjacyju ŭsmoktvaje ź ziamli ŭ ściabło i liście, a kvietki i nasieńnie zastajucca čystymi. Paśla hetaha ŭ Biełarusi ŭžo aleju nia budzie brakavać. MAHATE — heta takaja arhanizacyja, što pry kancy 80-ch chacieła, kab biełarusy žyli la samaha Čarnobyla, a MAHATE pryjaždžała dy hladzieła, jak jany da radyjacyi pryžyvajucca. A raps — heta takaja raślina, što ŭ červieni žoŭcieńkim ćvicie.
Što rańš było
Siońnia ŭ Mahilovie adkryvajuć festyval «Załaty šlahier». Pryjeduć Zykina, Antonaŭ, Kikabidze i jašče niejki Siarebranikaŭ. Heta byli takija śpievaki ŭ Savieckim Sajuzie.
Vyradžeńnie
Zbožža sioleta sabrali 17 c z hiektaru, bulby 96 c (miech siejem, čatyry źbirajem), burakoŭ cukrovych — 214 z ha, karmavych — 245 z ha. Pa ŭradžajach Łukašenka nas z Rasiejaju ŭžo zraŭniaŭ.
Barys Tumar
Turemnyja leki
Choć maładafrontaviec Afnahiel i chvory na serca, jaho ŭsio ž zasudzili na 15 dzion astrohu za Marš Svabody. Adzin čałaviek, što ź im adsiedžvaŭ, vyzvalaŭsia, dyk jon ź im pieradaŭ na volu zapisku. Piša, što jak u jaho baleła ŭ hrudziach, dyk nahladčyki nia tolki nia vyklikali doktara, ale dali takija tabletki, ad jakich serca stała jašče bolš baleć.
Taciana Raviaka, «Viasna '96»
Budzie z vas hazetaŭ
U Pinsku ŭłady nie dali dazvołu na adkryćcio troch novych pryvatnych hazetaŭ, siarod ich hazety Pinskaha adździaleńnia Hielsynskaha kamitetu. Adkaz pryjšoŭ ad uładaŭ prosty: «užo j tak isnuje dastatkovaja kolkaść hazet». No comment.
Ź Pinsku — Juraś Čarniakievič
Kamientary