BT vačyma biełarusa
Chmary nad Kisialom
Byccam by znajšlisia hrošy na BT-2. Investarami žadajuć być ci rasiejski bok («Itera» – hazavyja mahnaty), ci navat niamiecki. Tym časam pad šumok novych prajektaŭ na BT-1 idzie prychavanaja baraćba. Kažuć, kahości z kiraŭnictva krainy z kiraŭnikom BT Kisialom. Pavodle čutak, niejkija ludzi ŭ łukašenkaŭskaj administracyi adsočvajuć u efiry lubuju kramołu dy «kapajuć» užo nie pad aŭtaraŭ padazronych prahramaŭ, a adkryta pad Kisiala. A dysydenctva čas ad času źjaŭlajecca: 26 krasavika była «Čarnobylskaja rapsodyja», u jakoj praŭdu pra siońniašnija čarnobylskija prablemy kazaŭ akademik Nikitčanka, staršynia arhkamitetu «Čarnobylskaha šlachu-2000». Paru razoŭ vyjšła nievialičkaja videazamaloŭka na vierš Pietrusia Makala z słovami pra toje, što nie šancuje biełarusam na razumnaje kiraŭnictva. Nieistotna, što vierš napisany daŭno — usio adno «paklop na prezydenta». Aŭtaraŭ, u adroźnieńnie ad Bieklamišava z «Kroku», nia zvolnili. Uva ŭsim stanovicca vinavaty staršynia BT: niechta sprabuje vystavić Ryhora Kisiala tajemnym apazycyjaneram i dyversantam. Kažuć, što chočuć skaracić viaščańnie BT-1 na karyść BT-2...
A z druhoha boku, Kisiala čakaje sud. Zvolnieny Bieklamišaŭ dy Biełaruskaja Asacyjacyja Žurnalistaŭ padali na jaho ŭ sud za niezakonnaje zvalnieńnie. Praces musić adbycca pry kancy traŭnia, pryčym žurnalisty ŭpeŭnienyja ŭ svajoj pieramozie.
Padrychtoŭka ž novych prahramaŭ BT pakul nahadvaje niadobraje pamiaci staryja. «Našym pieśniam» Anatola Jarmolenki praročać sumny los inšych aŭtarskich prajektaŭ tvorčych asobaŭ, ad pryrody ehaistyčnych, kali prahrama ledź nie aŭtamatyčna pieratvarajecca ŭ «Maje pieśni» Jarmolenki. «Budni» ž, kažuć, vychodziać prosta słabyja z prafesijnaha boku.
Arciom Łukjanovič
