Naviny kultury
Uhodki
U Čyrvonym kaściole prajšoŭ dabračynny kancert, pryśviečany hadavinie trahiedyi na Niamizie. Kapeła imia Šyrmy i symfaničny arkiestar Biełaruskaha radyjo vykanali pierad baćkami zahinułych na Niamizie dziaciej «Rekvijem» Mocarta. Pravaabarončy centar «Viasna» paśla žałobnaha kancertu pradstaviŭ słuchačam knihu ŭspaminaŭ pra achviaraŭ Niamihi. Aformiŭ knihu Adam Hlobus.
Čarnobylskaja madonna
U niamieckim horadzie Ninburhu adčyniŭsia pomnik «Čarnobylskaja madonna». Stvaryŭ manument na hrošy miascovych mecenataŭ viciebski skulptar Ivan Kazak, aŭtar pomnika Marku Šahału ŭ Viciebsku.
Puškin nievyjazny
Ułady nie dazvolili Alesiu Puškinu ŭziać udzieł u vystavie sučasnaha mastactva ŭ varšaŭskim Zamku Ŭiazdoŭskim, kudy jon byŭ zaprošany z perfomansam «Feniks Biełarusi». U Varšavie Puškin mierkavaŭ padpalić siabie na paru sekundaŭ, a potym, prydušany rasiejskim ściaham i źbity bajcami RNIE, pieratvarycca ŭ biaspłotnuju zdań. Hety ž performans Aleś źbiraŭsia pakazać na niadaŭniaj vystavie supołki «Pahonia», ale kiraŭnictva supołki nie dało jamu dazvołu na heta. Staršy inspektar papraŭča-vychavaŭčych pracaŭ Krupskaha rajonu, dzie žyvie mastak, major Valancin Hurko, pastaviŭ jamu ŭ pašpart štamp pra zabaronu vyjezdu ŭva ŭsie krainy śvietu na paŭtara hady, pakul nia skončycca termin pakarańnia za hepeninh «Hnoj dla prezydenta».
Juraś Barysievič
Vystava Cišyna
U mastackim centry «Žylbieł» adčyniłasia persanalnaja vystava najbolš jarkaha pradstaŭnika biełaruskaha postmadernizmu ŭ žyvapisie Ihara Cišyna. Na vystavie šmat karektna rasfasavanaha epatažu, pačynajučy z zaprašalnika — całkam čornaj paštoŭki. Aŭtar «epatuje buržua», vystaŭlajučy karcinu, raśpiłavanuju na drobnyja frahmenty, žartuje na śviatuju dla kožnaha savieckaha biełarusa partyzanskuju temu, daścipna žanhluje cytatami z Sucina, Ejzenštejna, Frensysa Bekana, Maksima Hareckaha. Uvohule ŭsio heta nahadvaje całkam racyjanalnaje i vielmi zhrabnaje tryźnieńnie. Mastactvaznaŭcy ličać vystavu adnoj ź lepšych za ŭsiu historyju «Žylbiełu».
