Štraf za baćku
Baćka 11‑hadovaj Lidy, staršynia abłasnoj arhanizacyi Biełaruskaj sacyjał‑demakratyčnaj partyi (Hramady) Aleh Šabietnik z Rečycy, raskazvaje:
— Nichto z bankaŭskich rabotnikaŭ 323‑ha adździaleńnia nie moh patłumačyć, na jakoj padstavie śpisany hrošy z rachunka dački. Skazali tolki, što jany pajšli na moj šraf.
Historyja štrafa
Naprykancy lutaha pa pošcie Alehu Šabietniku pryjšła pastanova sudździ Centralnaha rajona Homiela Maryny Damnienki ab pryznańni jaho vinavatym ŭ niezakonnym pieramiaščeńni praź miažu drukavanych vydańniaŭ. Partyjny aktyvist pakarany štrafam u pamiery 1 miljon 550 tysiač rubloŭ — prykładna 720 dołaraŭ ZŠA. Sudździa Damnienka aštrafavała Šabietnika zavočna na padstavie administracyjnaha pratakoła Homielskaj mytni.
Nieviadoma pavodle jakich kryteryjaŭ jana zrabiła vysnovu, što «infarmacyja, jakaja ŭtrymlivajecca ŭ kanfiskavanych drukavanych vydańniach u Šabietnika A.V., moža nanieści škodu palityčnym intaresam i dziaržaŭnaj biaśpiecy Respubliki Biełaruś, źjaŭlajecca zabaronienaj da pieramiaščeńnia praz mytnuju miažu Respubliki Biełaruś». Adznačym: razmova išła pra materyjały ŭstanoŭčaj kanfierencyi Sajuzu levych partyj, a taksama piać asobnikaŭ brašury «Ab kulcie asoby Łukašenki».
Sud z pratakołam pahadziŭsia i aštrafavaŭ partyjnaha aktyvista.
Aleh Šabietnik: — Ja nie admaŭlaŭsia płacić štraf. Kožny miesiac pieraličvaŭ pa 200 tysiač rubloŭ. Bolš nie dazvalajuć finansavyja mahčymaści. Ale ž navošta adbirać dapamohu ŭ dziaciej? Niaŭžo dziaržava źbiadnieje, kali atrymaje ad mianie ŭsiu sumu štrafu na dva‑try miesiacy paźniej?
Darečy, mienavita ŭ červieni 1934 hoda ŭ SSSR było ŭviedzienaje ŭ praktyku pakarańnie členaŭ siamji za inšadumstva niekaha z baćkoŭ. Što — historyja paŭtarajecca? Lida Šabietnik aštrafavanaja, bo jana — «člen siamji voraha naroda»?
Daviedka
Jak śćviardžajuć jurysty, artykuł 525 HPK zabaraniaje spahaniać z daŭžnikoŭ «dziaržaŭnyja dapamohi siemjam, jakija vychoŭvajuć dziaciej».
